Maak 11:1-33
11 Now wen dehn mi soon reech Jeroosalem, dehn gaan da di Mongt a Alivz wehpaat di vilij a Betfaji ahn Betani mi deh. Ahn Jeezas sen too a ih disaipl dehn
2 ahn tel dehn: “Unu goh da di vilij weh deh heda wi; az soon az unu get deh, unu wahn fain wahn yong dongki weh tai op, weh nobadi eva raid yet. Unu loos ahn an bring ahn ya fi mi.
3 An if enibadi aks unu, ‘Wai unu di loos da dongki?’ jos seh, ‘Di Laad need it bot az soon az ih don wid it, ih wahn sen ahn bak.’”
4 Soh dehn gaan ahn fain di yong dongki; ih mi deh tai op pahn di schreet fronta di doa a wahn hows, ahn dehn loos ahn.
5 Bot som a di peepl weh mi deh rong deh aks dehn: “Da weh unu di loos da dongki fa?”
6 Dehn tel dehn egzakli weh Jeezas mi tel dehn fi seh, ahn di peepl lef dehn loan.
7 Den dehn kehr di dongki fi Jeezas, ahn dehn put dehn jakit pahn di dongki, ahn den Jeezas sidong pan ahn.
8 Ahn lata peepl staat tu spred dehn jakit pahn di road, ahn sohn adaz mi-di chroa sohn branch weh dehn mi kot fahn di feel dehn.
9 Ahn di peepl weh mi-di goh heda Jeezas ahn dehn wan weh mi-di fala ahn, mi stay di hala: “Wi pray, pleez sayv dis man! Jehoava bles di wan weh kom eena fi hihn naym!
10 Mek Gaad bles di Kingdom a wi faada Dayvid—di Kingdom weh di kom! Sayv ahn, wi pray, yoo weh liv da hevn!”
11 Den Jeezas gaan da Jeroosalem, ahn wen ih gaan eena di templ, ih luk rong pahn evriting, bot sins ih mi-di geh layt, hihn ahn di 12 apaslz gaan da Betani.
12 Di neks day wen dehn mi-di lef Betani, Jeezas mi feel hongri.
13 Fahn faar ih kech sait a wahn fig chree weh mi ful a leef, soh ih gaahn fi si if eni fig mi deh pan it. Bot wen ih geh kloas tu it, ih neva fain non, kaaz da neva fig seezn; onli leef ih si.
14 Soh ih tel di chree: “Nobadi fi eet froot fahn yoo eva agen.” An ih disaipl dehn hyaa weh ih mi seh.
15 Now wen dehn get tu Jeroosalem, Jeezas gaan eena di templ an ih staat tu chays owt aala di peepl weh mi-di bai ahn sel. An ih ton oava di taybl dehn fahn di peepl weh chaynj moni ahn di bench dehn fahn dehn wan weh sel dov.
16 Ih wudn mek enibadi kehr tingz chroo di templ.
17 An ih mi-di teech dehn ahn seh: “Di Skripchaz seh, ‘Mai hows wahn bee wahn hows a pryaa fi peepl fahn aala di nayshan dehn.’ Bot unu ton it intu wahn hows fi di teef dehn.”
18 Wen di cheef prees dehn ahn di skraibz hyaa weh Jeezas seh, dehn staat tu plan op how fi kil ahn. Bot dehn mi frayd far ahn kaaz di krowd mi impres wid di way ih teech.
19 Ahn rait bifoa ih staat geh daak, Jeezas an ih disaipl dehn lef di siti.
20 Erli di neks maanin, wail dehn mi-di chravl, dehn si di fig chree jrai op rait dong tu di root dehn.
21 Peeta memba weh mi hapm tu di chree, soh ih seh: “Teecha, luk deh! Di fig chree weh yu put wahn kers* pan jrai op.”
22 Jeezas tel dehn: “Ga fayt eena Gaad.
23 Ah di tel unu di chroot, hooeva tel dis mongtin, ‘Get op ahn chroa yuself eena di see,’ ahn noh dowt eena ih haat bot ga fayt dat dis wahn hapm, ih wahn hapm.
24 Dis da wai Ah di tel unu dat eniting weh unu pray an aks fa, ga fayt dat unu wahn get it, an unu wahn definaytli get it.
25 Ahn wen unu pray, if unu ga eniting gens enibadi, fergiv dehn. Den unu Faada weh deh da hevn wahn fergiv unu fi unu sin dehn tu.
26 *——
27 Den dehn gaan da Jeroosalem agen. An az ih mi-di waak chroo di templ, di cheef prees dehn ahn di skraibz ahn di Jooish rilijos leedaz kohn tu ahn
28 an aks ahn: “Weh atariti yoo ga fi du dehnya tingz? Ahn da hoo gi yoo di atariti fi du dehn?”
29 Jeezas tel dehn: “Ai waahn aks unu wahn kweschan tu. If unu ansa mi, den Ah wahn tel unu fahn hoo Ai geh di atariti fi du dehnya tingz.
30 Da fahn hoo Jan mi geh di atariti fi baptaiz peepl, fahn Gaad* er fahn man? Unu giv mi wahn ansa.”
31 Soh dehn staat taak monks dehnself, ahn seh: “If wi seh, ‘Fahn Gaad,’ den ih wahn seh, ‘Wai unu neva bileev Jan den?’
32 Bot if wi brayv inof fi seh, ‘Fahn man,’ da weh wuda hapm tu wi?” Dehn mi frayd fi di krowd a peepl, kaaz di peepl mi bileev dat Jan da-mi wahn prafit.
33 Soh dehn tel Jeezas: “Wee noh noa.” Jeezas tel dehn: “Wel den, Ai noh wahn tel unu da hoo gi mee di atariti fi du dehnya tingz needa.”
