Maak 13:1-37
13 Az Jeezas mi-di lef di templ, wan a ih disaipl dehn tel ahn: “Teecha, luk how wandaful dehnya stoan ahn dehnya bildin luk ya!”
2 Bot Jeezas tel ahn: “Unu si dehnya big bildin ya? Ah di tel unu, di dayz wahn kohn wen dehnya stoan wahn geh nak dong, ahn nat wan a dehn wahn lef eena ih plays.”
3 Now Jeezas mi-di sidong pahn di Mongt a Alivz di fays di templ. Den Peeta, Jaymz, Jan, an Anjru aks ahn praivit-wan:
4 “Tel wi, da wen dehnya tingz wahn hapm, ahn wat wahn bee di sain wen aala dehnya tingz wahn kohn tu wahn en?”
5 Soh Jeezas staat tu tel dehn: “Unu wach owt ahn noh mek nobadi fool unu.
6 Kaaz lata peepl wahn kohn di yooz mai naym ahn seh, ‘Ai da di Krais,’ ahn dehn wahn fool op lata peepl.
7 Moroava, wen unu hyaa bowt waar di tek plays kloas tu unu ahn faar fahn unu, noh geh fraitn, kaaz dehnya tingz haftu hapm, bot dis noh meen dat di en wahn kom az yet.
8 “Di nayshan dehn wahn fait gens wan anada ahn di kingdom dehn wahn fait gens wan anada. Ahn wahn lata ertkwayk wahn hapm da difrent plays, ahn food shaatij wahn deh tu. Aala dehnya tingz wahn bee di biginin a plenti sofarin, jos laik di payn weh wahn pregnant uman feel wen shee soon fi gi bert.
9 “Az fi unu, unu mos bee kyaaful. Kaaz peepl wahn han unu oava tu di koat dehn, ahn dehn wahn beet unu eena di sinagag dehn ahn dehn wahn kehr unu fronta di govnaz ahn di king dehn bikaaz unu da mai disaiplz, bot dis wahn giv unu wahn chaans fi tel dehn weh unu bileev eena.
10 Aalso, di gud nyooz haftu geh preech aal oava di werl fers, ahn den di en wahn kom.
11 Ahn wen dehn di han unu oava tu di koat dehn, noh wori bowt weh fi seh; kaaz da noh unu wahn di taak, bot da di hoali spirit wahn di taak fi unu.
12 Pahn tap a dat, wahn man wahn bichray ih oan breda, an ih wahn mek dehn kil ahn. Wahn pa wahn du ih pikni di saym ting, ahn di pikni dehn wahn ton gens dehn oan payrents ahn mek dehn put dehn tu det.
13 Ahn peepl wahn hayt unu bikaaz unu da mai falowaz. Bot di wan weh stay faytful tu di en a dis sistem a tingz wahn geh sayv.
14 “Bot, wen unu si di disgostin ting weh kaaz dischrokshan di stan op weh ih noh sopoas tu stan op (di persn weh reed da prafesi* need fi andastan it gud), den mek dehn wan eena Judeeya ron tu di mongtin dehn.
15 If wahn man deh pan ih howstap, ih noh fi kohn dong ner goh eensaida ih hows fi tek owt eniting.
16 Ahn di man weh di werk eena di feel noh fi goh bak hoam ahn get di tingz weh ih mi lef bihain, laik ih jakit.
17 Eena dehndeh dayz, di pregnant uman dehn ahn di wan dehn weh di ners dehn baybi wahn ga wahn harabl taim!
18 Unu kip aan di pray dat unu noh wahn haftu ron joorin winta taim.
19 Bikaaz dehndeh dayz wahn bee wahn taim a chribyulayshan; sohnting laik dis neva hapm yet fahn di biginin a kriyayshan til now, ahn notn laik dat wahn eva hapm agen.
20 If Jehoava noh kot dehndeh dayz shaat, nobadi wuda geh sayv. Bot fi di sayk a di wan dehn weh hihn pik, hihn wahn kot dehndeh dayz shaat.
21 “Den if enibadi tel unu, ‘Si di Krais ya!’ er ‘Si ahn deh!’ noh bileev dehn.
22 Kaaz lata faals Krais ahn lata faals prafit wahn kom ahn du aal kaina miraklz ahn wandaz fi fool op peepl, an if pasabl, eevn di wan dehn weh Gaad pik.
23 Soh den, unu mos wach owt. Ah don waan unu heda taim bowt weh wahn hapm.
24 “Bot joorin da taim deh, afta da chribyulayshan, di son eena di skai wahn geh daak, ahn di moon noh wahn shain ih lait nohmoh,
25 ahn di staar dehn wahn di jrap owta di skai, ahn di powaful tingz eena hevn wahn geh shayk op.
26 Ahn den peepl wahn si di Son a man di kom eena di klowd dehn wid grayt powa ahn gloari.
27 Den hihn wahn sen owt ih aynjel dehn ahn dehn wahn gyada op di wan dehn weh Gaad pik, fahn naat tu sowt an ees tu wes, fahn hevn ahn fahn ert.
28 “Now Ah waahn unu laan sohnting fahn dis iloschrayshan bowt di fig chree: Wen unu si di branch dehn a di fig chree staat groa ahn ga leef, unu noa dat soma deh kloas, noh chroo?
29 Saym way, wen unu si dehnya tingz di hapm, unu wahn noa dat di Son a man deh rait da unu doa.
30 Ah di tel unu di chroot, di peepl a dis jenarayshan noh wahn ded til dehn geh fi si aala dehnya tingz hapm.
31 Hevn an ert wahn geh dischrai, bot weh Ai seh wahn laas fareva.
32 “Nobadi noh noa di day ner di owa wen dehnya tingz wahn hapm. Di aynjel dehn da hevn noh noa, ahn di Son a Gaad noh noa needa, bot onli di Faada noa.
33 Soh den, unu kip pahn di lukowt ahn noh jrap asleep, kaaz unu noh noa wen da taim wahn kom.
34 Da laik wahn man weh lef ih hows ahn gaahn pahn wahn lang jerni ahn lef ih servant dehn in chaaj a evriting; ih lef werk fi mek eech wan a dehn du. An ih koman di wan weh main di doa fi stay pahn di lukowt.
35 Soh den, unu kip pahn di lukowt, kaaz unu noh noa wen di maasta a di hows wahn kohn bak, weda da layt eena di eevnin er midl a di nait er wen di roosta dehn staat kroa er wen di son kom op.
36 If nat, wen ih kohn bak sodn-wan, ih wahn fain unu di sleep.
37 Soh weh Ah tel unu, Ah tel evribadi: Kip pahn di lukowt.”
Futnoat
^ Di prafesi weh Danyel mi rait bowt.
