Maak 14:1-72
-
Di prees dehn plan fi kil Jeezas (1, 2)
-
Wahn uman poar perfyoom ail pahn Jeezas badi (3-9)
-
Joodas bichray Jeezas (10, 11)
-
Di laas Paasoava (12-21)
-
Jeezas staat op di selibrayshan a di Krais Eevnin Meel (22-26)
-
Jeezas mi seh dat Peeta wahn disoan ahn (27-31)
-
Jeezas pray eena di gyaadn a Getsemani (32-42)
-
Dehn ares Jeezas (43-52)
-
Di Jooish Sopreem Koat joj Jeezas (53-65)
-
Peeta disoan Jeezas (66-72)
14 Now di selibrayshan a di Paasoava ahn di Festival a di Bred Widowt Ees mi wahn tek plays too dayz layta. Ahn di cheef prees dehn ahn di skraibz mi-di chrai kom op wid wahn wikid plan fi ares Jeezas ahn kil ahn.
2 Bot dehn seh: “Wi kyaahn du it da di festival doh, kaaz di peepl mait staat wahn raiyat.”
3 Now Jeezas mi deh da Saiman hows, da Betani, di eet rong di taybl. Ahn Saiman yoostu ga leprosi. Wail Jeezas mi dehdeh, wahn uman kohn wid wahn alabasta jaar weh mi gat een ekspensiv perfyoom ail. Di ail mi mek owta reel naad.* Ih brok oapm di jaar an ih staat poar di ail pahn Jeezas hed.
4 Wen ih apasl dehn si dat, dehn geh beks ahn seh tu wan anada: “Da wai shee di ways dis perfyoom ail laik dat?
5 Wee kuda mi sel dis perfyoom ail fi moa dan 300 denayriyai* ahn den gi di moni tu poa peepl!” Ahn dehn mi beks bad wid* di laydi.
6 Bot Jeezas seh: “Unu lef shee loan. Da wai unu di taak laik dat bowt dis uman? Shee di du wahn gud ting fi mi.
7 Unu wahn aalwayz ga poa peepl wid unu, an unu ku help dehn enitaim, bot Ai noh wahn aalwayz deh wid unu.
8 Shee du weh shee kuda mi du; wen shee mi poar di perfyoom ail pahn mi badi, shee mi-di pripyaa mi fi wen dehn beri mi.
9 Bileev mi, eniway eena di werl weh dehn preech dis gud nyooz, peepl wahn memba weh dis uman mi du fi mi.”
10 Den Joodas Iskariyat, hoo da-mi wan a di 12 apasl, gaahn tu di cheef prees dehn fi bichray Jeezas.
11 Wen dehn hyaa weh ih mi seh, dehn mi onli hapi ahn dehn pramis fi giv ahn silva moni. Soh ih staat luk fi wahn gud apachooniti fi bichray ahn.
12 Now pahn di fers day a di Festival a di Bred Widowt Ees, da mi di kostom fi aafa op di Paasoava sakrifais, soh ih disaipl dehn aks ahn: “Wehpaat yu waahn wi pripyaa di meel fi di Paasoava?”
13 Wid dat, ih sen too a ih disaipl dehn ahn tel dehn: “Unu goh eena di siti, ahn wahn man weh di bak wahn waata jaar wahn kohn meet unu. Unu mos fala ahn.
14 Ahn wen unu reech di hows weh ih goh eena, tel di oana, ‘Di Teecha seh: “Wehpaat di ges room deh weh Ah ku eet di Paasoava meel wid mi disaipl dehn?”’
15 Den hihn wahn shoa unu wahn big opstayz room weh ga evriting weh wi need. Unu pripyaa di meel rait deh fi wi.”
16 Ih disaipl dehn gaan eena di siti, an evriting mi hapm jos laik how Jeezas mi tel dehn. Soh dehn pripyaa evriting fi di Paasoava.
17 Wen eevnin kom, Jeezas an ih 12 apasl gaahn deh.
18 Wail dehn mi-di sidong rong di taybl di eet, Jeezas seh: “Bileev mi, wan a unu weh deh rait ya di eet wid mi wahn bichray mi.”
19 Wen dehn hyaa dat, dehn geh sad, ahn wan bai wan dehn aks ahn: “Da noh mee, noh chroo?”
20 Hihn tel dehn: “Da wan owta di 12 a unu; da di saym wan weh di dip ih bred eena di bowl wid mi.
21 Di Son a man wahn soon lef unu, jos laik weh di Skripchaz mi seh, bot ih wahn bee wahn terabl ting fi di man weh bichray di Son a man! Ih wuda mi beta if hihn neva eevn baan.”
22 Wail dehn mi-di eet, Jeezas tek wahn bred ahn seh wahn pryaa. Den ih brok it an ih gi dehn; den ih seh: “Unu tek dis bred an eet it; dis stan fi mai badi.”
23 Den ih tek wahn kop ahn tank Gaad far it, den ih gi dehn, an aala dehn jrink fan it.
24 An ih tel dehn: “Dis stan fi mai blod weh wahn geh poar owt fi benifit lata peepl; di ‘blod weh leegalaiz di kovenant a Gaad.’
25 Bileev mi, Ah noh wahn jrink nohmoh wain til di day wen Ah jrink nyoo wain eena di Kingdom a Gaad.”
26 Den, afta dehn sing prayz* tu Gaad, dehn gaan da di Mongt a Alivz.
27 Den Jeezas tel dehn: “Aala unu wahn ron lef mi, kaaz di Skripchaz seh: ‘Ah wahn atak di shepad, ahn di sheep dehn wahn skyata.’
28 Bot afta Ah don rayz op bak fahn di ded, Ah gwehn heda unu da Gyalilee.”
29 Bot Peeta tel ahn: “Eevn if aala dehn ron lef yu, Ai wahn neva lef yu.”
30 Jeezas tel ahn: “Bileev mi, tunait, eevn bifoa wahn roosta kroa too taimz, yoo wahn disoan mi chree taimz.”
31 Bot Peeta kip aan di insis ahn seh: “Eevn if Ah haftu ded wid yu, Ah wahn neva disoan yu.” An aala di ada disaipl dehn staat seh di saym ting.
32 Den dehn gaan da di gyaadn a Getsemani, ahn Jeezas tel ih disaipl dehn: “Unu sidong ya meenwail Ai goh pray.”
33 An ih kehr Peeta, Jaymz, ahn Jan lang wid ahn, an ih staat tu feel sad an ih haat geh hevi.
34 Soh ih tel dehn: “Mi haat soh hevi* dat Ah feel laik Ah wahn ded. Unu stay ya ahn kip pahn di wach.”
35 Den ih gaahn wahn lee wayz heda dehn, an ih neel dong ahn staat tu pray an aks Gaad if ih pasabl fi noh mek ih haftu fays di haad taim weh di kom.
36 An ih seh: “Aba,* Faada, evriting pasabl wid yoo; pleez noh mek Ah jrink owta dis kop. Bot, Ai wahn du weh yoo waahnt, noh weh Ai waahn.”
37 Wen Jeezas gaahn bak tu dehn, ih fain dehn di sleep, soh ih tel Peeta: “Saiman, yoo di sleep? Unu kudn kip pahn di wach fi jos wan owa?
38 Unu kip pahn di wach an aalwayz pray, soh dat unu noh giv een tu temtayshan. Bot Ai noa dat eevn doa wahn persn eega* fi du sohnting, ih badi* mait noh ga di schrent fi du it.”
39 Den ih gaahn bak agen fi pray, an ih seh di saym ting.
40 Wen ih kohn bak, ih fain dehn di sleep agen, kaaz dehn mi sleepi bad, soh dehn neva noa weh fi tel ahn.
41 Now wen Jeezas kohn bak di terd taim, ih tel dehn: “Dis da noh di taim fi mek unu di sleep ahn res! Unu stap sleep! Di taim don kohn fi mek dehn bichray di Son a man tu sinaz.
42 Unu get op, mek wi goh fahn ya. Kaaz di wan weh wahn bichray mi di kom.”
43 Ahn wail Jeezas mi stil di taak, Joodas, hoo da-mi wan a di 12 apasl, kohn wid wahn krowd weh mi gat soad ahn klob. Da di cheef prees dehn ahn di skraibz ahn di Jooish rilijos leedaz mi sen dehn.
44 Now di wan weh mi wahn bichray ahn, mi gi dehn wahn sain; ih seh: “Di wan weh Ah kis, hihn da di wan unu fi ares; unu kehr ahn, an mek shoar ih noh get weh.”
45 An ih gaahn schrayt op tu Jeezas ahn seh, “Teecha!” an ih giv ahn wahn tenda kis.
46 Soh dehn ares Jeezas ahn kehr ahn weh.
47 Saym taim, wan a dehn weh mi-di stan op deh, haal owt ih soad ahn chap aaf di ayz a di slayv a di hai prees.
48 Bot Jeezas aks dehn: “Ai luk laik wahn teef fi mek unu kohn ares mi wid soad ahn klob?
49 Evri day Ai yoostu deh wid unu da di templ di teech unu, wai unu neva ares mi den? Bot aala dis tek plays soh dat weh di Skripchaz seh ku kohn chroo.”
50 An aala ih disaipl dehn ron lef ahn.
51 Bot, wahn sertn yong man weh onli mi-di wayr wahn linen klaat* oava ih badi staat tu fala bihain Jeezas. Ahn dehn mi chrai ares ahn,
52 bot hihn ron weh haaf-naykid ahn lef ih linen klaat eena dehn han.
53 Dehn kehr Jeezas da di hai prees, an aala di cheef prees dehn ahn di Jooish rilijos leedaz ahn di skraibz mi gyada tugeda deh.
54 Bot Peeta mi-di fala ahn fahn faar, aal di way op tu di koatyaad a di hai prees. Ih mi-di sidong wid di servant dehn rong di faiya fi waam ihself.
55 Now di cheef prees dehn ahn di hoal Jooish Sopreem Koat* mi-di luk fi faals evidens gens Jeezas soh dat dehn kuda mi put ahn tu det. Bot dehn kudn fain non.
56 Lata peepl mi-di tel lai pan ahn, bot non a dehn stoari mi-di ad op.
57 Ahn sohn ada peepl stan op ahn tel lai pan ahn; dehn seh:
58 “Wee mi hyaa ih seh, ‘Ah wahn brok dong dis templ weh hyoomanz bil, an eena chree dayz Ah wahn bil wahn nada wan weh noh bil bai hyoomanz.’”
59 Bot eevn wid dis lai, dehn kudn agree wid wan anada.
60 Den di hai prees stan op fronta dehn an aks Jeezas: “Yoo noh ga notn fi seh fi yuself? Yoo noh hyaa weh dehnya man di seh bowt yu?”
61 Bot Jeezas kip kwaiyet an ih neva seh notn. Soh di hai prees aks ahn agen: “Yoo da di Krais, Son a di Hoali Gaad?”
62 Jeezas tel ahn: “Yes; an unu wahn si di Son a man di sidong pahn di rait han said a di Powaful Wan, an ih wahn di kohn pahn di klowd dehn a hevn.”
63 Wen di hai prees hyaa dat, ih tayr ih kloaz ahn seh: “Wi noh need nohmoh witnis!”
64 Aala unu don hyaa how ih taak gens Gaad! Soh weh unu tink?” Aala dehn mi agree dat ih dizerv fi ded.
65 Ahn som a dehn staat tu spit pan ahn. Ahn dehn kova ih fays, ponch ahn, an tel ahn: “If yoo da wahn prafit, tel wi da hoo nak yu!” Den di koat ofishal dehn slap ahn an kehr ahn weh.
66 Now wail Peeta mi deh eena di koatyaad, wan a di servant gyal a di hai prees kom.
67 Ahn wen shee kech sait a Peeta di waam ihself, ih luk schrayt pan ahn an seh: “Yoo mi deh wid Jeezas di Nazareen tu.”
68 Bot Peeta dinai it ahn seh: “Ai noh noa da hoo hihn an Ai noh noa weh yoo di taak bowt,” an ih gaan owtsaid bai di gayt.
69 Bot di servant gyal si ahn deh agen, ahn shee staat tu tel evribadi rong deh: “Hihn da wan a ih disaipl dehn fi chroo.”
70 Agen Peeta dinai it. An afta wahn lee wail, di peepl rong deh staat tu tel ahn: “Fi shoar yoo da wan a dehn, kaaz yoo da fahn Gyalilee.”
71 Bot ih staat tu kaal dong eevl pan ihself ahn swayr: “Ai noh eevn noa hoo dis man weh unu di taak bowt!”
72 Ahn saym taim wahn roosta kroa di sekant taim, ahn Peeta memba weh Jeezas mi tel ahn: “Bifoa wahn roosta kroa too taimz, yu wahn disoan mi chree taimz.” Wel, ih kudn tek it an ih staat tu baal.
Futnoat
^ Naad da wahn plaant weh smel nais.
^ Si di Glasari, “Denayriyos.”
^ Er “dehn skoal op.”
^ Er “sohn him; saamz.”
^ Er “Mi soal feel soh moch sadnis.”
^ Dis da wahn Heebroo er Aramayik werd weh meen “Faada.” Da wahn rispekful werd weh chiljren yooz wen dehn taak tu dehn pa.
^ Er “wilin.”
^ Dis di rifaa tu di sinful kandishan a wahn persn.
^ Er “wahn gud kwaliti linen klaat.”
^ Lit., “Sanhejrin.” Si di Glasari, “Sanhejrin.”
