Maak 16:1-8
-
Jeezas rezorek (1-8)
16 Now wen di Sabat mi don, Mayri Magdaleen, Mayri, weh da-mi Jaymz ma, ahn Saloami mi bai sohn spais ahn miks dehn wid ail fi put pahn Jeezas badi.
2 An erli maanin pahn di fers day a di week* wen di son jos mi-di kom op, dehn gaan da di toom.
3 Az dehn mi-di goh pahn dehn way, dehn staat aks wan anada: “Da hoo wi wahn get fi roal di rak fahn fronta di toom fi wi?”
4 Bot wen dehn get deh, dehn si dat di rak mi don moov aredi, eevn doa ih mi big.
5 Wen dehn gaan eena di toom, dehn si wahn yong man di sidong pahn di rait han said. Ih mi gat aan wahn lang wait roab. Wel, di laydi dehn mi sopraiz.
6 Di yong man tel dehn: “Noh bee sopraiz. Ah noa unu di luk fi Jeezas di Nazareen hoo dehn mi heng pahn di stayk. Hihn rayz op bak fahn di ded aredi. Ih noh deh ya. Luk, da rait ya dehn mi put ih badi.
7 Now, goh tel ih disaipl dehn ahn tel Peeta tu, ‘Hihn di goh heda unu da Gyalilee. Unu wahn si ahn deh, jos laik weh ih mi tel unu.’”
8 Soh wen di laydi dehn kom owta di toom, dehn ron fahn deh; dehn mi-di chrimbl ahn feel kanfyooz. Ahn dehn neva seh wahn werd tu nobadi, kaaz dehn mi frayd.*
Futnoat
^ Nowadayz, wi kaal dis day Sondeh.
^ Akaadn tu oalda manyuskrips, di Gaspl a Maak don rait ya wid vers 8.
