Maak 3:1-35
3 Agen, pahn wahn nada okayzhan, Jeezas gaan eena wahn sinagag, ahn wahn man wid wahn kripl* han mi dehdeh.
2 Soh di Farisee dehn mi-di wach ahn haad fi si if ih wuda kyoar di man pahn di Sabat. Dehn mi-di luk fi wahn reezn fi akyooz ahn.
3 Jeezas tel di man wid di kripl han: “Get op. Kohn stan op ya fronta evribadi.”
4 Den ih aks dehn: “Ih gens di Laa fi du sohnting gud er bad pahn di Sabat, fi sayv wahn laif* er fi kil?” Bot dehn neva seh notn.
5 Afta Jeezas luk pahn dehn, ih mi beks, kaaz ih mi hert ahn fi si how haad dehn haat mi haad. Soh ih tel di man: “Schrech owt yu han.” Ahn di man schrech owt ih han, an ih geh heel.
6 Az soon az di Farisee dehn si dat, dehn gaahn meet wid di paati falowaz a Herod fi plan op how fi kil Jeezas.
7 Bot Jeezas an ih disaipl dehn lef ahn gaahn bai di see, ahn wahn krowd a peepl fahn Gyalilee ahn fahn Judeeya fala dehn.
8 Eevn peepl fahn Jeroosalem an Idumeeya, ahn peepl fahn kraas di Jaadn Riva, ahn fahn Taiya ahn Saidan fala ahn. Wahn big krowd a peepl kohn tu ahn wen dehn hyaa bowt di wandaful tingz weh ih mi-di du.
9 An ih tel ih disaipl dehn fi geh wahn smaal boat redi far ahn jos in kays di krowd geh tu moch fi handl,
10 bikaaz hihn mi don kyoar wahn lata peepl da day, ahn moa ahn moa peepl weh mi sik bad mi-di krowd op rong ahn fi chrai toch ahn.
11 An enitaim di peepl weh mi ga deemon eena dehn si ahn, dehn wuda jrap da grong fronta ahn, an hala owt: “Yoo da Gaad Son!”
12 Bot pahn da day, ih mi stay di gi dehn schrik aadaz noh fi tel enibadi da hoo hihn.
13 Den ih gaan op pahn wahn mongtin ahn kaal som a ih disaipl dehn fi goh wid ahn.
14 An ih pik owt* 12 a dehn fi bee ih apaslz. Dehn mi fi fala ahn. An laytaraan hihn mi wahn sen dehn owt fi preech,
15 an ih gi dehn di atariti fi jraiv owt di deemon dehn.
16 Ahn di naym a di 12 weh ih mi pik owt* da-mi Saiman, di wan weh Jeezas kaal Peeta,
17 Jaymz an ih breda Jan, hoo da-mi Zebidee son dehn (Jeezas mi aalso kaal dehn Bowanerjeez, weh meen “Sonz a Tonda”).
18 Den yu mi ga Anjru, Filip, Bartalamyoo, Machyu, Tamas, Jaymz, hoo da-mi Alfyos son, Tadeeyos, Saiman di Kaynaneeyan,*
19 ahn Joodas Iskariyat, hoo da-mi di wan weh mi bichray ahn.
Den Jeezas gaan da wahn hows,
20 ahn di krowd a peepl gyada op rong dehn agen, da mi soh moch a dehn dat Jeezas an ih disaipl dehn neva eevn ga wahn chaans fi eet wahn meel.
21 Bot wen ih famili hyaa weh aal mi-di hapm, dehn gaahn chrai get ahn, kaaz dehn mi-di seh: “Hihn noh soh karek eena ih hed.”
22 Ahn di skraib dehn weh mi kohn dong fahn Jeroosalem mi-di seh: “Hihn ga Biyelzibob* eena ahn, an hihn get ih powa fi jraiv owt di deemon dehn fahn di roola a di deemonz.”
23 Soh Jeezas kaal dehn tu ahn, an ih yooz sohn iloschrayshan fi taak tu dehn; ih seh: “How Saytan wahn jraiv owt Saytan?
24 If di peepl eena wahn kingdom di fait gens wan anada, da kingdom noh wahn mek it;
25 an if di membaz a wahn famili di fait gens wan anada, da famili noh wahn mek it needa.
26 Saym way, if Saytan fait gens ih oanself, dat wahn bee di en a hihn.
27 Nobadi kyaahn jos goh eena di hows a wahn schrang man ahn teef owt ih tingz; ih wuda haftu tai ahn op fers. Da onli soh ih wahn ku teef ih tingz.
28 Bileev mi, evriting weh wahn man du, Gaad wahn fergiv ahn, noh mata weh sin ih komit er weh kaina insoltin tingz ih seh.
29 Bot hooeva taak gens di hoali spirit, Gaad wahn neva fergiv dehn. Di gilt fahn dis sin wahn laas fareva.”
30 Hihn tel dehn dat bikaaz dehn mi-di seh: “Hihn ga wahn deemon eena ahn.”
31 Den Jeezas ma an ih breda dehn kom, ahn dehn mi-di stan op owtsaid, ahn dehn sen sombadi fi kaal ahn.
32 Wahn krowd a peepl mi deh rong ahn di sidong, ahn wan a dehn tel ahn: “Teecha! Yu ma ahn yu breda dehn deh owtsaid di luk fi yu.”
33 Bot hihn tel dehn: “Hoo da mai ma ahn mai breda dehn?”
34 Den ih luk pahn dehn wan weh mi-di sidong rong ahn, an ih seh: “Si, dehn da mai ma ahn mai breda dehn!
35 Enibadi weh du di wil a Gaad, da mi breda, mi sista, ahn mi ma.”
Futnoat
^ Er “paralaiz.”
^ Er “soal.”
^ Er “ih apoint.”
^ Er “ih apoint.”
^ Er “di eega wan.”
^ Wahn neks naym fi Saytan.
