Maak 5:1-43
5 Den dehn reech di ada said a di see eena di ayrya rong di siti a Jerasa.
2 Den Jeezas get owta di boat, ahn rait away wahn man weh mi deh anda di kanchroal a wahn wikid deemon kom owt fahn di semiteri fi meet ahn.
3 Ih mi-di liv eena di semiteri, an op tu da taim deh, nobadi kuda mi kip ahn tai op, nat eevn wid wahn chayn.
4 Aldoa peepl mi tai op ih han ahn fut dehn wid chayn, ih bos op di chayn dehn fahn aafa ih han ahn fut dehn. Nobadi mi ga di schrent fi kanchroal ahn.
5 Day ahn nait ih mi-di baal owt eena di semiteri ahn pahn di mongtin dehn. Ih mi-di kot op ihself wid sohn shaap stoan.
6 Bot wen ih si Jeezas fahn faar, ih ron op tu ahn, an neel dong fronta ahn.
7 Den ih hala owt wid wahn lowd vais: “Jeezas, Son a di Moas Hai Gaad, lef mi loan! Swayr tu mi bai Gaad naym dat yu noh wahn taament mi.”
8 Kaaz Jeezas mi-di tel ahn: “Kom owta di man, yoo wikid deemon.”
9 Bot Jeezas aks ahn: “Weh yu naym?” An ih ansa seh: “Mai naym da Leejan,* bikaaz da lata wi.”
10 Ahn di deemon dehn bayg Jeezas oava ahn oava fi noh sen dehn owta di konchri.
11 Now wahn herd a pig mi-di feed pahn di mongtin.
12 Soh di deemon dehn bayg Jeezas: “Pleez sen wi eena di pig dehn; mek wi goh eena dehn.”
13 An ih gi dehn permishan fi goh eena di pig dehn. Rait away di deemon dehn kom owta di man ahn gaan eena di pig dehn. Den di hoal herd a pig ron oava di klif* an eena di see, bowt 2,000 a dehn, ahn dehn jrongdid eena di see.
14 Bot di man dehn weh mi-di main di pig dehn ron ahn gaahn ripoat it eena di siti an eena di konchrisaid. Ahn peepl kohn fi si weh mi hapm.
15 Soh dehn kohn tu Jeezas ahn si di man weh Leejan mi-di kanchroal. Dehn si di man di sidong deh wid kloaz aan an eena ih rait main, soh dehn geh frayd.
16 Pahn tap a dat, dehn wan weh mi si di hoal ting tel evribadi bowt weh mi hapm tu di man weh di deemon mi-di kanchroal ahn weh mi hapm tu di pig dehn.
17 Soh di peepl dehn staat tu bayg Jeezas fi lef dehn ayrya.
18 Now wen Jeezas mi-di get eena di boat, di man weh mi ga di deemon eena ahn bayg ahn fi goh wid ahn.
19 Bot ih neva mek ih gaan; ih tel ahn: “Goh hoam tu yu relitiv dehn, ahn tel dehn bowt evriting weh Jehoava mi du fi yu ahn how hihn mi shoa yu mersi.”
20 Den di man gaan ahn staat tu preech eena di Dekapolis* bowt aala di tingz weh Jeezas mi du far ahn. An evribadi kudn bileev weh dehn mi-di hyaa.
21 Afta Jeezas gaahn kraas tu di ada said a di see eena di boat, wahn big krowd gyada rong ahn wail hihn mi stil deh kloas tu di see.
22 Wan a di hed aafisa a di sinagag, weh mi naym Jairos, kohn fi meet Jeezas. Wen ih si Jeezas, ih neel dong fronta ahn.
23 Ih bayg ahn oava ahn oava; ih mi-di seh: “Mi lee daata deh pahn daiyin. Pleez kom ahn kyoar ahn soh shee ku liv.”
24 Soh Jeezas gaahn wid ahn. Ahn wahn lata peepl mi-di fala ahn, an shub op gens ahn.
25 Now dehn mi ga wahn uman weh mi-di hemrij fi 12 yaaz.
26 Shee mi tek lata chreetment fahn difrent dakta ahn sofa wahn lat. Shee mi spen aala ih moni di chrai geh beta, bot notn neva werk. Insted, shee jos geh wers.
27 Wen shee geh fi hyaa weh peepl mi-di seh bowt Jeezas, shee kom op bihain ahn an toch ih kloaz,
28 kaaz shee mi stay di tel ihself: “If Ah kuda onli jos toch ih kloaz, Ah wuda geh beta.”
29 Ahn rait away di bleedn stap, ahn shee mi noa seh dat eena fi shee oan badi shee mi geh heel fahn dis terabl siknis.
30 Rait away Jeezas riyalaiz dat powa gaan owta ahn. Soh ih ton rong eena di krowd an aks: “Da hoo toch mi kloaz?”
31 Bot ih disaipl dehn aks ahn: “Yu noh di si how dis krowd di push op gens yu, ahn yu wahn aks da hoo toch yu?”
32 Bot ih stil luk rong fi si da hoo mi toch ahn.
33 Di uman mi noa seh dat shee mi geh heel, soh shee staat tu chrimbl ahn geh fraitn. Den, shee kom ahn neel dong fronta Jeezas ahn tel ahn evriting weh mi hapm tu ahn.
34 Hihn tel ahn: “Mi daata, bikaaz a yu fayt, yu geh heel. Goh, ahn noh wori bowt yu siknis nohmoh. Yu geh heel.”
35 Wail Jeezas mi stil di taak, sohn man fahn Jairos hows kom ahn tel ahn: “Yu daata don ded; noh bada di Teecha nohmoh.”
36 Bot Jeezas hyaa weh dehn mi-di seh, an ih tel Jairos: “Noh frayd, jos ga fayt.”
37 Den Jeezas neva mek enibadi fala ahn. Ih onli kehr Peeta, Jaymz, ahn Jan, weh da-mi Jaymz breda, lang wid ahn.
38 Soh wen dehn reech da Jairos hows, dehn hyaa wahn lata naiz ahn peepl di moan ahn baal.
39 Afta Jeezas gaan eensaid, ih tel di peepl dehn: “Wai unu di moan ahn baal ahn kaaz aala dis kanfyoozhan? Di lee gyal noh ded, shee di sleep.”
40 Wel, di peepl staat tu laaf aata ahn. Soh ih sen evribadi owtsaid, an ih kehr di lee gyal ma ahn pa ahn di disaipl dehn tu wehpaat di lee gyal mi-di lidong.
41 Den, ih hoal di lee gyal han ahn tel ahn: “Talita koomi,” weh meen: “Lee gyal, Ai di tel yu, get op!”
42 Ahn rait way, di lee gyal get op ahn staat waak rong. (Shee mi 12 yaaz oal.) Ahn di famili kuda mi bayli kanchroal dehn feelinz bikaaz a di amonk a jai weh dehn mi-di feel.
43 Soh Jeezas gi dehn schrik aadaz noh fi tel nobadi bowt dis, an ih tel dehn fi gi di lee gyal sohnting fi eet.
Futnoat
^ Leejan da wahn groop a Roaman soalja, bowt 4,000 tu 6,000. Eena di Baibl, “Leejan” ku aalso meen wahn laaj groop wid no spesifik nomba.
^ Er “steep bank.”
^ Si di Glasari, “Dekapolis.”
