Machyu 15:1-39
15 Den sohn Farisee ahn skraib weh da fahn Jeroosalem kohn tu Jeezas ahn tel ahn:
2 “Wai yu disaipl dehn brok di chradishan a fi wee ansesta dehn? Fi egzampl, dehn noh wash* dehn han bifoa dehn eet wahn meel.”
3 Jeezas ansa dehn: “Wai unu brok Gaad komanment wid fi unu chradishan?
4 Fi egzampl, Gaad seh, ‘Aana yu ma ahn yu pa,’ an, ‘Unu mos put tu det enibadi weh seh bad tingz bowt* ih ma er ih pa.’
5 Bot unu di seh, ‘Wahn persn weh tel ih ma er ih pa: “Wateva Ai ga weh kuda benifit yu, Ah wahn giv it tu Gaad az wahn gif weh dedikaytid tu hihn,”
6 noh need fi aana ih pa non ataal.’ Soh unu mek di werd a Gaad az sohnting weh noh wert notn bikaaz a fi unu chradishan.
7 Unu da sohn hipokrit. Weh Aizaiya mi prafesai bowt unu da chroo; ih mi seh:
8 ‘Dehnya peepl aana mi wid dehn mowt, bot dehn noh ga no lov fi mi.
9 Ih noh mek no sens fi mek dehn wership mi, kaaz dehn teechinz bays pahn roolz weh man mek op ahn dehn mek ih luk laik if di teechinz kohn fahn Gaad.’”
10 Afta dat ih kaal di krowd fi mek dehn kohn kloas tu ahn; ih tel dehn: “Lisn ahn geh di sens a wat Ah di seh:
11 Da noh weh goh eena wahn persn mowt weh mek ahn doti, bot da weh kom owta ih mowt mek ih bee doti.”
12 Den di disaipl dehn kom op tu ahn an tel ahn: “Yoo mi noa dat di Farisee dehn mi feel ofendid sayka weh yu mi seh?”
13 Ih tel dehn: “Mai Faada da hevn wahn root op evri plaant weh hihn neva plaant.
14 Lef dehn loan. Dehn da sohn blain leedaz. If wahn blain man leed wahn nada blain man, di too a dehn wahn jrap eena wahn hoal.”
15 Peeta seh: “Eksplayn di meenin a di iloschrayshan weh yu mi menshan lee erliya tu wi.”
16 Jeezas tel dehn: “Unu stil noh andastan?
17 Unu noh noa dat wateva goh eena wahn persn mowt paas chroo ih stomok ahn den owta ih badi?
18 Bot weh kom owta wahn persn mowt di kohn fan ih haat, ahn da dehndeh tingz da weh mek wahn persn doti.
19 Fi egzampl, wahn persn ku ga wikid tinkin eena ih haat weh ku mek ih goh teef, tel lai, er yooz insoltin speech, er ih ku leed ahn fi komit merda, adolchri, er sekshwal imoraliti.*
20 Da dehnya kaina tingz mek wahn persn doti eena Gaad sait, da noh if ih eet wahn meel widowt wash* ih han.”
21 Afta Jeezas lef fahn deh, ih gaan eena di ayrya weh naym Taiya ahn Saidan.
22 Saym taim wahn uman weh mi liv da Foneesha kohn di bayg ahn hala seh: “Ga mersi pahn mi, Laad, Son a Dayvid. Wahn deemon di kaaz mi daata fi sofa bad.”
23 Bot hihn neva seh wan werd fi ansa di laydi. Soh ih disaipl dehn bayg ahn: “Sen shee weh fahn ya, kaaz shee stay di fala wi ahn mek lata naiz.”
24 Hihn ansa dehn: “Gaad neva sen mi tu evribadi, bot ih mi sen mi tu di peepl a Izrel weh da laik sheep weh laas.”
25 Bot di uman kom ahn neel dong fronta Jeezas ahn seh: “Laad, pleez help mi!”
26 Den ih tel di laydi: “Ih noh rait fi tek weh di bred fahn di chiljren ahn giv it tu di lee daag dehn.”
27 Den shee seh: “Yes, Laad. Bot di lee daag dehn eet di kromz weh jrap aafa dehn maasta taybl, noh chroo?”
28 Den Jeezas tel ahn: “Oa uman, yoo ga lata fayt; yu wahn geh weh yu di aks fa.” Ahn saym taim, di laydi daata geh heel.
29 Afta dehn lef fahn deh, Jeezas waak kraas di konchri tu sohnweh kloas tu di See a Gyalilee, den ih gaan op pahn di mongtin gaahn sidong.
30 Den di krowd a peepl kohn fi bring difrent wanz weh kudn waak, weh mi kripl, ahn blain. Ahn peepl weh kudn taak, ahn weh mi-di sofa fahn ada siknis. Dehn bring dehn fronta Jeezas, ahn hihn kyoar aala dehn.
31 Soh di krowd a peepl mi sopraiz wen dehn si di wan dehn weh kudn taak, di taak, di wan dehn weh mi kripl ga gud helt, ahn di wan dehn weh kudn waak, di waak, ahn di wan dehn weh mi blain kuda mi si; an aala dehn staat tu prayz di Gaad a Izrel.
32 Bot Jeezas kaal ih disaipl dehn ahn tel dehn: “Ah feel sari fi dehnya peepl, kaaz da don chree dayz dat dehn deh wid mi ahn dehn noh ga nohmoh food fi eet. Ah noh waahn mek dehn goh hoam hongri, kaaz dehn mait faynt weh pahn di road.”
33 Bot di disaipl dehn tel ahn: “Da wehpaat wee wahn geh inof bred fi feed ahn satisfai wahn krowd dis saiz eena disya plays weh deh soh faar fahn eniting?”
34 Den Jeezas tel dehn: “Humoch bred unu gat?” Dehn seh: “Sevn, ahn wahn fyoo smaal fish.”
35 Soh afta Jeezas tel di krowd fi sidong pahn di graas,
36 ih tek di sevn bred ahn di fish, ahn seh wahn pryaa fi gi Gaad tanks. Den ih brok dehn ahn giv ih disaipl dehn, ahn di disaipl dehn shayr it monks di krowd.
37 An aala dehn eet ahn geh satisfai, ahn wen dehn gyada op di lefoavaz, da mi sevn big baaskit* ful.
38 Aal in aal, da mi 4,000 man, bisaidz uman ahn chiljren weh mi geh fi eet.
39 Den fainali, afta ih sen di krowd hoam, ih get eena di boat ahn gaan da di ayrya weh naym Magadan.
Futnoat
^ Di Farisee dehn an ada Jooz yoostu wash dehn han akaadn tu Jooish chradishan.
^ Er “weh yooz insoltin speech tuwaadz.”
^ Si di Glasari, “Sekshwal imoraliti.”
^ Dehn neva wash dehn han akaadn tu Jooish chradishan.
^ Er “provizhan baaskit.”
