Machyu 19:1-30
19 Wen Jeezas finish seh aala dehnya ting, ih lef fahn Gyalilee ahn gaan da di boada a Judeeya weh mi deh kraas di Jaadn Riva.
2 Ahn wahn big krowd a peepl mi-di fala ahn tu, an ih kyoar evribadi weh mi dehdeh.
3 Ahn sohn Farisee kom op tu ahn fi chrai tes ahn, an dehn aks ahn: “Ih gens di Laa a Moaziz fi mek wahn man divoas ih waif fi jos eniting?”
4 Jeezas ansa dehn: “Unu neva reed dat Gaad mi kriyayt man an uman fahn di biginin?
5 Gaad mi aalso seh: ‘Bikaaz a dis, wahn man wahn lef ih ma an ih pa an ih wahn stik tu ih waif, ahn di too a dehn wahn bee wan persn.’*
6 Soh dehn noh wahn bee too nohmoh, bot wan persn. Soh den, noh mek nobadi separayt weh Gaad jain tugeda.”*
7 Dehn tel ahn: “Wel den, da wai Moaziz mi tel wahn man fi giv ih waif wahn divoas sertifikayt ahn mek shee goh?”
8 Hihn tel dehn: “Moaziz mi alow unu fi divoas unu waif bikaaz unu stobant. Bot wen Gaad mi mek di fers man an uman da neva laik dat.
9 Ah di tel unu dat if wahn man divoas ih waif, ahn shee neva komit sekshwal imoraliti,* ahn hihn marid wahn nada uman, hihn di komit adolchri.”
10 Di disaipl dehn tel Jeezas: “Wel, if da soh ih fi bee bitween wahn man an ih waif, den ih beta fi noh geh marid non ataal.”
11 Jeezas tel dehn: “Noh evribadi ku liv dis way, bot onli dehn wan weh ga di gif.*
12 Dehn ga som man weh kyaahn marid er ga chiljren kaaz dehn mi baan da way, ahn sohn ada man kyaahnt kaaz sombadi damij dehn,* bot dehn ga som man weh noh marid er ga chiljren kaaz dehn chooz da way a laif sayka di Kingdom a hevn. If enibadi ku liv da way, mek dehn du it.”
13 Den dehn bring sohn yong chiljren tu ahn fi mek ih bles dehn* ahn seh wahn pryaa, bot ih disaipl dehn skoal dehn.
14 Bot Jeezas tel dehn: “Noh chrai stap di yong chiljren, mek dehn kohn tu mi. Kaaz peepl weh da laik chiljren wahn geh fi bee paat a di Kingdom a hevn.”
15 Soh Jeezas bles dehn, den ih lef fahn deh.
16 Den wahn yong man kom op tu ahn, an seh: “Teecha, wat da sohn gud tingz weh Ah need fi du fi get evalastin laif?”
17 Jeezas tel ahn: “Wai yoo di aks mee bowt weh gud? Onli wan Persn deh weh gud. If yu waahn geh laif, kip aan di obay di komanment dehn.”
18 Di man aks ahn: “Wich wan a dehn?” Jeezas tel ahn: “Yu noh fi merda, yu noh fi komit adolchri, yu noh fi teef, yu noh fi tel lai,
19 yu fi aana yu ma ahn yu pa, ahn yu fi lov yu nayba jos laik how yu lov yuself.”
20 Di yong man tel ahn: “Ai di kip aala dehndeh komanment; da wat els Ah need fi du?”
21 Jeezas tel ahn: “If yu waahn bee perfek,* goh sel weh yu oan ahn gi di moni tu poa peepl; wen yu du dat, yu wahn ga chrezha da hevn; den kohn bee mi disaipl.”
22 Wen di yong man hyaa dat, ih waak weh sad, kaaz ih mi rich rich.
23 Den Jeezas tel ih disaipl dehn: “Ah di tel unu di chroot, ih wahn haad fi mek wahn rich persn get eena di Kingdom a hevn.
24 Agen Ah di tel unu, ih wuda bee eeziya fi mek wahn kyamil paas chroo di aiy a wahn needl dan fi mek wahn rich persn get eena di Kingdom a Gaad.”
25 Wen di disaipl dehn hyaa dat, dehn mi shak, ahn dehn seh: “Da hoo ku geh sayv den?”
26 Den Jeezas luk pahn dehn schrayt eena dehn fays ahn seh: “Di tingz weh pasabl fi Gaad, noh pasabl fi hyoomanz.”
27 Den Peeta seh: “Bot memba, wee mi lef evriting fi fala yoo; soh, da weh wee wahn get?”
28 Jeezas tel dehn: “Ah di tel unu di chroot, wen Gaad mek evriting nyoo ahn wen di Son a man sidong pan ih grayt chroan, unu wahn sidong pahn di 12 chroan ahn joj di 12 chraib a Izrel bikaaz unu fala mi.
29 An evribadi weh lef dehn hoam er breda er sista er ma er pa er chiljren er lan bikaaz dehn da mai disaipl wahn geh wahn honjrid taimz moa ahn dehn wahn get evalastin laif tu.
30 “Bot wahn lata peepl weh da fers wahn bee laas, ahn wahn lata peepl weh da laas wahn bee fers.
Futnoat
^ Er “wan flesh.”
^ Lit., “yoak tugeda.”
^ Di Greek werd da por·neiʹa. Si di Glasari, “Sekshwal imoraliti.”
^ Di gif fi stay singl.
^ Wahn paat a dehn badi mi geh kot aaf soh dat dehn kyaahn ga chiljren.
^ Er “ih lay ih han pahn dehn.”
^ Er “bee kompleet.”
