Machyu 24:1-51
24 Wen Jeezas mi-di lef fahn di templ, ih disaipl dehn kom op tu ahn an tel ahn bowt di saiz a di bildin dehn da di templ.
2 Jeezas aks dehn: “Dehnya saiz a bildin ya impres unu? Ah di tel unu di chroot, di dayz wahn kohn wen dehnya stoan wahn geh nak dong, ahn nat wan a dehn wahn lef eena ih plays.”
3 Wen ih mi-di sidong pahn di Mongt a Alivz, ih disaipl dehn kom aks ahn praivit-wan; dehn seh: “Tel wi, da wen dehnya tingz wahn hapm, ahn wat wahn bee di sain dat yu kohn bak fi deh wid wi?* Ahn wat wahn bee di sain a di en a di sistem a tingz?”*
4 Jeezas ansa dehn seh: “Unu wach owt ahn noh mek nobadi fool unu,
5 kaaz lata peepl wahn kohn di yooz mai naym ahn seh, ‘Ai da di Krais,’ ahn dehn wahn fool op lata peepl.
6 Unu wahn hyaa bowt waar aal oava di plays. Si dat unu noh geh fraitn, kaaz dehnya tingz haftu hapm, bot di en noh wahn kom az yet.
7 “Di nayshan dehn wahn fait gens wan anada ahn di kingdom dehn wahn fait gens wan anada, ahn dehn wahn ga famin an ertkwayk eena wahn lata plays.
8 Aala dehnya tingz da di biginin a plenti sofarin.*
9 “Den peepl wahn persikyoot unu ahn kil unu. Dehn wahn hayt unu bikaaz unu da mai falowaz.
10 Wahn lata peepl wahn looz dehn fayt eena Gaad ahn wahn bichray wan anada ahn wahn hayt wan anada.
11 Lata faals prafit wahn deh ahn dehn wahn fool op lata peepl.
12 Ahn bikaaz lata wikidnis wahn deh, peepl lov wahn kool aaf.
13 Bot di wan weh stay faytful tu di en a dis sistem a tingz wahn geh sayv.
14 Mai disaipl dehn wahn preech di gud nyooz bowt di Kingdom aal oava di ert soh dat aala di nayshan dehn ku noa bowt it, ahn den di en wahn kom.
15 “Soh, akaadn tu weh Gaad mi seh chroo ih prafit Danyel, unu wahn si di disgostin ting weh kaaz dischrokshan di stan op eena wahn hoali plays (hooeva reed da prafesi* need fi andastan it gud).
16 Wen unu si dehnya tingz, di peepl fahn Judeeya haftu ron tu di mongtin dehn.
17 An if wahn man deh pan ih howstap, ih noh fi kohn dong ahn goh eena ih hows fi tek owt tingz.
18 Ahn di man weh di werk eena ih feel noh fi goh hoam ahn pik op ih koat.
19 Joorin da taim deh, di pregnant uman dehn ahn di wan dehn weh di ners dehn baybi wahn ga wahn harabl taim!
20 Unu kip aan di pray dat unu noh wahn haftu ron tu di mongtin dehn joorin di winta taim ner pahn di Sabat day;
21 bikaaz da taim deh wahn grayt chribyulayshan wahn hapm, wan laik weh nobadi eva si sins di werl bigin dong tu tudeh, ahn wan laik weh nobadi wahn eva si agen.
22 Bot if Gaad noh kot dehndeh dayz shaat, nobadi wuda geh sayv; bot fi di sayk a di wan dehn weh hihn pik, hihn wahn kot di dayz dehn shaat.
23 “If enibadi tel unu, ‘Si di Krais ya!’ er ‘Si ahn deh!’ noh bileev dehn.
24 Bikaaz lata faals Krais ahn lata faals prafit wahn kom ahn du aal kaina grayt mirakl ahn wandaz fi fool op peepl; dehn wahn eevn chrai fi fool di wan dehn weh Gaad pik.
25 Bot memba, Ah don waan unu bowt dehnya tingz.
26 Soh, if peepl tel unu, ‘Krais deh eena di wildanes,’ noh goh deh, er if dehn seh, ‘Ih deh eena wahn seekrit plays,’ noh bileev dehn needa.
27 Bikaaz di taim wen di Son a man kohn bak fi deh wid ih peepl* wahn bee jos laik laitnin weh shain kraas di hoal skai fahn di ees tu di wes.
28 Eniway wehpaat ded badi deh, da rait deh di eegl dehn wahn gyada tugeda.
29 “Rait afta di chribyulayshan joorin dehndeh dayz, di son eena di skai wahn geh daak, ahn di moon noh wahn shain ih lait, ahn di staar dehn wahn jrap owta di skai, ahn di powa dehn op da hevn wahn geh shayk op.
30 Den di sain a di Son a man wahn apyaa eena di skai, ahn peepl pahn di ert wahn di moan ahn baal wid nobadi fi komfert dehn, ahn dehn wahn si di Son a man di kom eena di klowd dehn a hevn wid powa ahn lata gloari.
31 Ahn hihn wahn sen owt ih aynjel dehn wid di song a wahn lowd chrompit fahn naat tu sowt ahn fahn ees tu wes fi gyada di wan dehn weh hihn pik, fahn wan en a hevn tu di ada en.
32 “Now Ah waahn unu laan sohnting fahn dis iloschrayshan bowt di fig chree: Wen unu si di branch dehn a di fig chree staat groa ahn ga leef, unu noa dat soma deh kloas, noh chroo?
33 Jos laik dat, wen unu si aala dehnya tingz, unu wahn noa dat di Son a man deh kloas; ih deh rait da unu doa.
34 Ah di tel unu di chroot, di peepl a dis jenarayshan noh wahn ded til dehn geh fi si aala dehnya tingz hapm.
35 Hevn an ert wahn geh dischrai, bot weh Ai seh wahn laas fareva.
36 “Nobadi noh noa di day ner di owa wen dehnya tingz wahn hapm. Di aynjel dehn da hevn noh noa, noh eevn di Son, onli di Faada noa wen.
37 Jos laik how tingz mi stan eena Noawa dayz, jos laik dat ih wahn bee wen di Son a man kohn bak ahn deh ya wid ih peepl.*
38 Kaaz eena di dayz bifoa di Flod, peepl mi-di eet ahn jrink, ahn di man ahn uman dehn mi-di geh marid rait op tu di day wen Noawa gaan eena di aak.
39 Dehn neva pay atenshan tu notn til wen di Flod kom ahn waip weh aala dehn, jos laik dat ih wahn bee wen di Son a man kohn bak ahn deh ya wid ih peepl.
40 Den too man wahn di werk eena di feel; Gaad wahn kehr wan a dehn an ih wahn lef di neks wan.
41 Too uman wahn di grain flowa da di mil; Gaad wahn kehr wan a dehn an ih wahn lef di neks wan.
42 Soh den, kip pahn di lukowt, bikaaz unu noh noa pahn wich day di Laad wahn kom.
43 “Bot andastan dis, if di oana a wahn hows wuda noa weh taim di teef wahn kom, ih wuda kip pahn di lukowt ahn noh alow di teef fi brok eena ih hows.
44 Bikaaz a dis, unu need fi bee redi, kaaz unu noh noa weh taim* di Son a man wahn kom; ih wahn kohn wen unu noh di ekspek it.
45 “Hoo reeli da di faytful ahn waiz* slayv weh ih maasta chooz fi gi di rispansabiliti fi tek kayr a di servants a fi hihn hows, ahn fi gi dehn dehn food da di rait taim?
46 Da slayv wahn bee hapi if ih maasta kohn bak ahn fain ahn di du ih werk!
47 Bileev mi, ih maasta wahn put ahn in chaaj a evriting els weh hihn oan.
48 “Bot if da slayv du weh wikid ahn seh eena ih haat, ‘Mi maasta di tek tu lang,’
49 an ih staat tu beet op ih felo slayv dehn ahn staat tu eet ahn jrink wid peepl weh evribadi noa fi bee jronkadz,
50 di maasta a datdeh slayv wahn kohn pahn wahn day wen hihn noh di ekspek ahn, an wahn owa weh hihn noh noa needa.
51 Den di maasta wahn ponish ahn wid di wers ponishment an ih wahn put ahn monks di hipokrit dehn. Rait dehsoh da weh hihn wahn di moan ahn baal ahn grain op ih teet.
Futnoat
^ Er “sain a yu prezens.” Si di Glasari, “Prezens.”
^ Si di Glasari, “Sistem a tingz.”
^ Dis sofarin wahn bee jos laik wen wahn pregnant uman deh eena layba.
^ Di prafesi weh Danyel mi rait bowt.
^ Er “Bikaaz di prezens a di Son a man.” Si di Glasari, “Prezens.”
^ Er “jos laik dat di prezens a di Son a man wahn bee.” Si di Glasari, “Prezens.”
^ Er “unu noh noa di owa.”
^ Lit., “diskreet.”
