Machyu 26:1-75
-
Di prees dehn kom op wid wahn eevl plan fi kil Jeezas (1-5)
-
Wahn uman poar ekspensiv perfyoom pahn Jeezas hed (6-13)
-
Di laas Paasoava; Joodas bichray Jeezas (14-25)
-
Wen Jeezas staat op di selibrayshan a Krais Eevnin Meel (26-30)
-
Jeezas seh dat Peeta wahn disoan ahn (31-35)
-
Jeezas pray eena Getsemani (36-46)
-
Dehn ares Jeezas (47-56)
-
Di Jooish Sopreem Koat joj Jeezas (57-68)
-
Peeta disoan Jeezas (69-75)
26 Wen Jeezas finish seh aala dehnya tingz, ih tel ih disaipl dehn:
2 “Unu noa dat di Paasoava* wahn tek plays too dayz fahn now, ahn dehn wahn han oava di Son a man fi mek dehn heng ahn pahn di stayk.”
3 Den di cheef prees dehn ahn di Jooish leedaz a di peepl gyada tugeda eena di koatyaad a di hai prees weh mi naym Kaiyafas,
4 ahn dehn chrai kom op wid wahn eevl plan fi ares Jeezas ahn kil ahn.
5 Bot dehn seh: “Wi kyaahn ares ahn da di festival, kaaz di peepl mait staat wahn raiyat.”
6 Jeezas mi deh da Betani da di hows a wahn man weh mi naym Saiman. Now Saiman yoostu bee wahn lepa. Wail Jeezas mi deh da ih hows,
7 wahn uman weh mi ga wahn ekspensiv perfyoom eena wahn alabasta jaar gaahn tu Jeezas, an ih staat tu poar it pahn Jeezas hed wail hihn mi-di eet.
8 Wen ih disaipl dehn si dat, dehn neva hapi ataal, ahn dehn seh: “Da wai shee di ways di perfyoom laik dat?
9 Wi kuda mi sel dis perfyoom fi wahn lata moni ahn den gi di moni tu poa peepl.”
10 Jeezas mi noa weh dehn mi-di seh, soh ih tel dehn: “Da wai unu di taak laik dat bowt dis uman? Shee du wahn gud ting fi mi.
11 Unu wahn aalwayz ga poa peepl wid unu, bot Ai noh wahn aalwayz deh wid unu.
12 Wen shee poar di perfyoom ail pahn mi, shee mi-di pripyaa mi fi wen dehn wahn beri mi.
13 Bileev mi, eniway eena di werl wehpaat dehn preech dis gud nyooz, peepl wahn memba weh dis uman du fi mi.”
14 Den Joodas Iskariyat, wan a di 12 apasl dehn, gaahn tu di cheef prees dehn
15 ahn seh: “Wat unu wahn gi mi if Ai bichray Jeezas tu unu soh dat unu ku ares ahn?” Dehn pramis ahn 30 pees a silva.*
16 Soh fahn da taim deh, ih staat tu luk fi wahn gud apachooniti fi bichray ahn.
17 Pahn di fers day a di Festival a di Bred Widowt Ees, di disaipl dehn kohn tu Jeezas ahn seh: “Wehpaat yu waahn wi pripyaa di meel fi di Paasoava?”
18 Hihn tel dehn: “Unu goh da Jeroosalem tu wahn man weh Ai noa ahn tel ahn, ‘Di Teecha seh: “Di taim fi mek Ah ded deh kloas; Ah wahn selibrayt di Paasoava wid mi disaipl dehn da yu hows.”’”
19 Soh di disaipl dehn mi du weh Jeezas tel dehn fi du ahn dehn pripyaa evriting fi di Paasoava.
20 Wen eevnin kom, hihn sidong rong di taybl lang wid di 12 disaipl dehn.
21 Wail dehn mi-di eet, hihn tel dehn: “Bileev mi, wan a unu wahn bichray mi.”
22 Wen dehn hyaa dat, dehn geh sad, an eech wan a dehn aks ahn: “Laad, da noh mee, noh chroo?”
23 Hihn tel dehn: “Di wan weh wahn bichray mi da di saym wan weh di dip ih bred eena di bowl wid mi.
24 Da chroo dat di Son a man wahn soon lef unu, jos laik weh di Skripchaz seh, bot ih wahn bee wahn terabl ting fi di man weh bichray di Son a man! Ih wuda mi bee beta if da man neva baan.”
25 Den Joodas, hoo mi wahn bichray ahn, seh: “Rabai, da noh mee, noh chroo?” Jeezas tel ahn: “Yoo don noa di ansa.”
26 Wail dehn mi-di eet, Jeezas tek wahn bred, an afta ih gi Gaad tanks, ih brok it, den ih giv ih disaipl dehn, ahn seh: “Unu tek it an eet it. Dis stan fi mai badi.”
27 Den ih tek wahn kop, an ih gi Gaad tanks ahn den ih gi dehn, ahn seh: “Aala unu jrink fahn di kop.
28 Dis stan fi mai blod weh da di ‘blod weh wahn leegalaiz di kovenant a Gaad,’ weh wahn geh poar owt soh dat lata peepl geh fergivnis fi dehn sin.
29 Ah di tel unu: Ah noh wahn jrink fahn dis wain agen til di day wen Ah jrink nyoo wain wid unu eena di Kingdom a mai Faada.”
30 Den, afta dehn sing prayz* tu Gaad, dehn gaan da di Mongt a Alivz.
31 Den Jeezas tel dehn: “Aala unu wahn ron lef mi* bikaaz a weh wahn hapm tu mee tunait, kaaz di Skripchaz seh: ‘Ah wahn atak di shepad, ahn di sheep dehn wahn skyata.’
32 Bot afta Ah rayz op bak fahn di ded, Ah gwehn heda unu da Gyalilee.”
33 Bot Peeta tel ahn: “Eevn doa aala dehn wahn ron lef yu bikaaz a weh wahn hapm tu yu, Ai wahn neva disoan yu!”
34 Jeezas tel ahn: “Bileev mi, bifoa wahn roosta kroa tunait, yu wahn disoan mi chree taimz.”
35 Peeta tel ahn: “Eevn if Ah haftu ded wid yu, Ah wahn neva disoan yu.” Aala di ada disaipl dehn mi seh di saym ting.
36 Den Jeezas an ih disaipl dehn gaan da di gyaadn a Getsemani, ahn rait deh ih tel dehn: “Unu sidong ya wail Ah goh oava deh goh pray.”
37 An ih kehr Peeta ahn Zebidee too son lang wid ahn, an ih staat tu feel sad an ih haat geh hevi.
38 Den ih tel dehn: “Mi haat soh hevi* dat Ah feel laik Ah wahn ded. Unu stay ya ahn kip wach wid mi.”
39 Den ih gaahn wahn lee wayz heda dehn, an ih neel dong wid ih fays tu di grong, an ih pray: “Faada, if ih pasabl, pleez noh mek Ah jrink owta dis kop. Bot, noh mek weh Ai waahn tek plays, bot weh yoo waahn.”
40 Den Jeezas gaahn bak tu ih disaipl dehn ahn fain dehn di sleep, an ih tel Peeta: “Unu kudn stay op wid mi fi jos wan owa?
41 Unu kip pahn di lukowt an aalwayz pray, soh dat unu noh giv een tu temtayshan. Bot Ai noa dat eevn doa wahn persn eega* fi du sohnting, ih badi* mait noh ga di schrent fi du it.”
42 Den, ih gaan agen ahn pray wahn sekant taim; ih seh: “Faada, if no ada way deh bot fi jrink fahn dis kop, den mek yu wil tek plays.”
43 Ahn wen ih kohn bak, ih fain dehn di sleep agen, kaaz dehn jos kudn kip dehn aiy oapm.
44 Soh ih lef dehn, ahn fi wahn terd taim ih gaahn pray agen, an ih mi-di bayg fi di saym ting.
45 Den ih gaahn bak tu ih disaipl dehn, ahn tel dehn: “Dis da noh di taim fi mek unu sleep ahn res! Si, di taim deh kloas fi mek dehn bichray di Son a man tu peepl weh wikid.
46 Unu get op, mek wi goh fahn ya. Kaaz di wan weh wahn bichray mi di kom.”
47 Wail Jeezas mi stil di taak, Joodas, hoo da-mi wan a di 12 apasl, kohn tuwaadz ahn. Wahn krowd a peepl mi deh lang wid ahn, an dehn mi ga soad ahn klob. Di cheef prees ahn di Jooish rilijos leedaz mi sen dehn.
48 Now di wan weh mi wahn bichray ahn, mi gi dehn wahn sain; ih tel dehn: “Di wan weh Ah kis, hihn da di wan unu fi ares.”
49 An ih gaahn schrayt op tu Jeezas, ahn tel ahn: “Gud nait, Teecha!” ahn den ih giv ahn wahn tenda kis.
50 Bot Jeezas tel ahn: “Weh yu kohn ya fi du?” Den di wan dehn weh mi kohn wid Joodas grab Jeezas an ares ahn.
51 Saym taim, wan a dehn wan weh mi deh wid Jeezas pul owt ih soad ahn chap aaf di ayz a di slayv a di hai prees.
52 Den Jeezas tel ahn: “Put bak yu soad, kaaz enibadi weh yooz wahn soad, wahn ded bai wahn soad.
53 Unu noh tink dat Ai kuda bayg mai Faada rait now fi sen towznz* a aynjelz fi help mi?
54 Bot if Ai wuda du dat, da how di Skripchaz weh seh dat aala dehnya tingz fi hapm wahn kohn chroo?”
55 Den Jeezas aks di krowd a peepl: “Ai luk laik wahn teef fi mek unu kohn ares mi wid soad ahn klob? Evri day Ai yoostu sidong ahn teech da di templ, wai unu neva ares mi den?
56 Bot aala dis di hapm soh dat weh di prafit dehn mi rait eena di Skripchaz wahn kohn chroo.” Den aala ih disaipl dehn ron lef ahn.
57 Den di wan dehn weh mi ares Jeezas kehr ahn da di hows a Kaiyafas di hai prees, wehpaat di skraibz ahn di Jooish rilijos leedaz mi gyada tugeda wid Kaiyafas.
58 Bot Peeta mi-di fala Jeezas fahn wahn gud distans, ih fala ahn way op tu di koatyaad a di hai prees. Afta ih gaan eensaid, ih sidong wid di servant dehn fi si weh mi wahn hapm.
59 Now di cheef prees ahn di hoal Jooish Sopreem Koat* mi-di luk fi faals evidens gens Jeezas, soh dat dehn kuda mi put ahn tu det.
60 Bot dehn kudn fain non, eevn doa lata peepl mi gaahn tel lai pan ahn. Eena di en, too peepl
61 seh: “Dis man mi seh, ‘Ai ku brok dong di templ a Gaad ahn bil it op bak eena chree dayz.’”
62 Di hai prees stan op an aks ahn: “Yoo noh ga notn fi seh fi yuself? Yoo noh hyaa weh dehnya man di seh bowt yu?”
63 Bot Jeezas neva seh notn. Soh di hai prees tel ahn: “Tel wi di chroot er els di livin Gaad wahn ponish yu; yoo da di Krais, di Son a Gaad?”
64 Jeezas tel ahn: “Yoo jos gi di ansa. Bot Ah di tel unu: Eena di fyoocha unu wahn si di Son a man di sidong pahn di rait han said a di Powaful Wan, an ih wahn kohn pahn di klowd dehn a hevn.”
65 Wen di hai prees hyaa dat, ih tayr ih kloaz ahn seh: “Dis man di taak gens Gaad! Wi noh need fi fain nohmoh witnis. Aala unu don hyaa how ih di taak gens Gaad.
66 Soh weh unu tink?” Dehn hala: “Ih dizerv fi ded!”
67 Den dehn spit eena ih fays ahn ponch ahn. Ahn sohn ada wan slap ahn,
68 an dehn seh: “Okay den Krais, prafesai tu wi ahn tel wi hoo nak yu?”
69 Now Peeta mi-di sidong owtsaid eena di koatyaad, ahn wahn servant gyal kom op tu ahn, an seh: “Yoo mi deh wid Jeezas di Gyalileeyan tu!”
70 Bot hihn dinai it fronta aala dehn ahn seh: “Ai noh noa weh yoo di taak bowt.”
71 Wen ih mi-di waak eena di haalway tuwaadz di gayt, wahn nada gyal noatis ahn, an shee tel di peepl weh mi dehdeh: “Dis man da wahn fren a Jeezas di Nazareen.”
72 Bot agen hihn dinai it; ih swayr anaal: “Ai noh noa da man!”
73 Afta wahn lee wail, di peepl weh mi-di stan op rong deh kohn tu Peeta ahn tel ahn: “Fi shoar yoo da wan a dehn, kaaz jos di way yu taak sel yu owt.”
74 Den ih staat tu kaal dong eevl pan ihself ahn swayr: “Ai noh noa da man!” Ahn saym taim wahn roosta kroa.
75 Rait away, Peeta rimemba weh Jeezas mi tel ahn: “Bifoa wahn roosta kroa, yu wahn disoan mi chree taimz.” An ih gaan owtsaid ahn baal ahn baal bikaaz ih mi feel veri sad.
Futnoat
^ Si di Glasari, “Paasoava.”
^ Er “silva moni.”
^ Er “sohn him; saamz.”
^ Er “wahn geh stombl.”
^ Er “Mi soal feel soh sad.”
^ Er “wilin.”
^ Dis di rifaa tu di sinful kandishan a wahn persn.
^ Lit., “12 leejan.”
^ Lit., “Sanhejrin.” Si di Glasari, “Sanhejrin.”
