Machyu 28:1-20
28 Afta di Sabat, wen maanin mi jos kom een di neks day, weh da-mi di fers day a di week, Mayri Magdaleen ahn di ada Mayri kohn fi si di grayv.
2 Ahn sodn-wan, wahn powaful ertkwayk hapm, kaaz Jehoava aynjel mi kohn dong fahn hevn an ih roal weh di stoan, an ih mi-di sidong pahn di stoan.
3 Ih mi-di shain laik laitnin, an ih kloaz mi wait laik snoa.
4 Di man dehn weh mi-di gyaad di toom mi frayd bad fi di aynjel. Dehn staat tu chrimbl ahn stay wan spat laik if dehn mi ded.
5 Bot di aynjel tel di uman dehn: “Noh frayd, kaaz Ah noa unu di luk fi Jeezas hoo dehn mi heng pahn di stayk.
6 Ih noh deh ya, kaaz Gaad don rayz ahn op bak fahn di ded, jos laik weh hihn mi seh. Unu kom ahn si weh ih badi mi deh.
7 Hori goh ahn tel ih disaipl dehn dat Gaad don rayz ahn op bak fahn di ded. Hihn di goh heda unu da Gyalilee. Unu wahn si ahn deh. Da dis Ah mi kohn fi tel unu.”
8 Soh di uman dehn hori lef fahn di toom; dehn mi fraitn bot glad saym taim; dehn ron gaan ahn tel ih disaipl dehn.
9 Sodn-wan, Jeezas meet dehn ahn seh: “Gud day, unu aarait?” Dehn kom op tu ahn an hoal aan tu ih fut ahn bow dong tu ahn.
10 Den Jeezas tel dehn: “Noh frayd. Goh ahn ripoat tu mi breda dehn soh dat dehn ku goh da Gyalilee ahn meet mi deh.”
11 Wail di uman dehn mi deh pahn dehn way, som a di gyaad dehn gaan intu di siti ahn ripoat tu di cheef prees dehn aal di tingz weh mi hapm.
12 Afta di cheef prees ahn di Jooish leeda dehn meet tugeda, dehn gi di gyaad dehn wahn gud amonk a moni.
13 Dehn tel di gyaad dehn: “Unu mos seh, ‘Ih disaipl dehn mi kom eena di nait ahn teef ih badi wail wi mi-di sleep.’
14 An if Pailat geh fi hyaa bowt dis, unu noh wori, wee wahn eksplayn evriting tu ahn.”*
15 Soh dehn tek di moni ahn du weh dehn mi tel dehn fi du. Ahn dehn spred dis stoari monks di Jooz op tu dis veri day.
16 Meenwail, di 11 disaipl gaan da Gyalilee da di mongtin weh Jeezas mi tel dehn fi meet.
17 Wen dehn si ahn, dehn bow dong tu ahn, bot som a dehn mi dowt dat da reeli hihn.
18 Jeezas kohn tuwaadz dehn ahn tel dehn: “Gaad gi mi aal atariti da hevn ahn pahn di ert.
19 Soh den, goh ahn teech peepl fahn aala di nayshan dehn fi bee mai disaipl. Baptaiz dehn eena di naym a* di Faada, di Son, ahn di hoali spirit.
20 Unu mos teech dehn fi obay aal di tingz weh Ai mi koman unu. Ahn memba, Ah wahn deh wid unu evri day til di en a dis sistem a tingz.”*
Futnoat
^ Er “wahn kanvins ahn.”
^ “Eena di naym a,” meenz fi aksep di atariti er pozishan weh wahn persn gat.
^ Si di Glasari, “Sistem a tingz.”
