Machyu 3:1-17
3 Yaaz layta, Jan di Baptis mi-di preech eena di wildanes a Judeeya,
2 di seh: “Ripent, kaaz di Kingdom a hevn deh ya.”
3 In fak, di prafit Aizaiya mi rait bowt Jan wen ih mi seh: “Sombadi di kaal owt eena di wildanes di seh: ‘Pripyaa di way a Jehoava! Schraytn owt di road weh deh fronta ahn.’”
4 Jan kloaz da-mi owta kyamil hyaa ahn di belt rong ih ways mi mek owta leda. Ih food da-mi loakos ahn wail honi.
5 Den di peepl fahn Jeroosalem an aala Judeeya an aala di vilij rong di Jaadn Riva mi kohn fi mek Jan baptaiz dehn.
6 Hihn baptaiz* aala dehn eena di Jaadn Riva, ahn fronta evribadi dehn kanfes dat dehn da-mi sinaz.
7 Wen ih mi si wahn lata di Farisee ahn Sadyusee dehn di kohn tu wehpaat ih mi-di baptaiz peepl, ih tel dehn: “Unu da laik paiznos snayk, da hoo mi waan unu fi ron weh fahn di day a Gaad anga?”
8 Soh den, du tingz weh shoa dat unu ripent.
9 Noh fool unuself ahn seh, ‘Aybraham da fi wee faada.’ Bikaaz Ah di tel unu, Gaad ku yooz dehnya saym stoan fi mek chiljren fi Aybraham.
10 Di aks don deh da di root a di chree dehn. Soh den, evri chree weh noh di bayr gud froot wahn geh chap dong ahn chroa eena di faiya.
11 Ai baptaiz unu wid waata bikaaz unu ripent, bot sombadi els wahn soon kohn weh way moa powaful dan mee weh wahn baptaiz unu wid hoali spirit ahn wid faiya. In fak, Ai noh eevn fit fi tek aaf fi hihn sandalz.
12 Hihn ga wahn shovl eena ih han fi kleen op di floa wehpaat dehn chrash owt di weet. Hihn wahn gyada op di weet eena ih stoarhows, bot ih wahn bon op di chrash wid faiya weh kyaahn owt.”
13 Den Jeezas lef Gyalilee fi goh da di Jaadn Riva fi mek Jan baptaiz ahn.
14 Bot Jan mi chrai fi stap ahn; ih tel Jeezas: “Yoo di kohn tu mee fi baptaiz yu? Da yoo shuda di baptaiz mee!”
15 Jeezas tel ahn: “Mek ih hapm laik dis fi now, kaaz eena dis way wi di du weh Gaad waahnt.” Den Jan giv een ahn baptaiz ahn.
16 Afta Jeezas geh baptaiz, ih kom op owta di waata rait away. Den di hevn oapm op, ahn Jan si Gaad spirit di kohn dong laik wahn dov pahn Jeezas.
17 Aalso, wahn vais fahn hevn mi seh: “Dis da mai Son, di wan weh Ah onli lov, ahn di wan weh Ah pleez wid.”
Futnoat
^ Si di Glasari, “Baptaiz.”
