Machyu 4:1-25
4 Den Gaad spirit gaid Jeezas fi goh eena di wildanes wehpaat di Devl mi temp ahn.
2 Jeezas neva eet fi 40 dayz ahn 40 naits, soh ih mi hongri bad.
3 Di Devl chrai fi temp ahn; ih tel ahn seh: “If yoo da Gaad son, tel dehnya stoan fi ton intu bred.”
4 Bot ih ansa: “Di Skripchaz seh: ‘Wahn man noh fi liv pahn jos food, bot ih fi liv pahn evri werd weh kom owta Jehoava mowt.’”
5 Den di Devl kehr ahn tu di hoali siti, ahn put ahn pahn di haiyis paat a di templ
6 ahn tel ahn: “If yoo da wahn son a Gaad fi chroo, chroa yuself dong fahn ya, kaaz di Skripchaz seh: ‘Hihn wahn gi fi hihn aynjel dehn wahn koman fi protek yu,’ ahn, ‘Dehn wahn kech yu soh dat yu noh eevn wahn nak yu fut gens wahn stoan.’”
7 Jeezas ansa ahn seh: “Agen di Skripchaz seh: ‘Yu noh fi tes Jehoava yu Gaad.’”
8 Afta dat di Devl kehr ahn tu wahn hai hai mongtin an ih shoa ahn aala di kingdom a di werl ahn dehn richiz.
9 Den ih tel ahn: “Aala dehnya tingz Ah wahn gi yu if yu neel dong ahn wership mi jos dis wan taim.”
10 Den Jeezas tel ahn: “Goh fahn ya, Saytan! Kaaz di Skripchaz seh: ‘Da Jehoava yu Gaad yu fi wership, ahn da onli hihn wan yu fi serv.’”*
11 Den di Devl lef ahn loan ahn sohn aynjel kohn ten tu ahn.
12 Wen Jeezas mi hyaa dat dehn ares Jan, ih lef fahn deh ahn gaan da Gyalilee.
13 Afta ih lef Nazaret, ih gaahn liv da Kapernyam weh mi deh bai di see eena di dischrik a Zebyulon ahn Naftalai.
14 Dis mi hapm soh dat weh Aizaiya di prafit mi seh kohn chroo; ih mi seh:
15 “Oa peepl fahn Zebyulon ahn Naftalai—peepl fahn di ada nayshanz weh liv da Gyalilee—weh deh lang di road tuwaadz di see, pahn di ada said a di Jaadn!
16 Wahn brait lait wahn shain pahn di peepl weh di sidong eena daaknis, weh di sidong eena wahn lan wehpaat det kyaas wahn shado.”
17 Fahn den aan, Jeezas staat tu preech ahn seh: “Ripent, bikaaz di Kingdom a di hevn deh kloas.”
18 Wail ih mi-di waak langsaid di See a Gyalilee, ih mi si too breda, Saiman, hoo dehn mi kaal Peeta, an Anjru ih breda. Dehn mi-di chroa dehn net eena di see, kaaz dehn da-mi fishaman.
19 An ih tel dehn: “Fala mi, an Ai wahn shoa unu how fi saach fi peepl jos laik how unu goh kech fish.
20 Rait away dehn lef dehn net ahn fala hihn.
21 Wen ih lef fahn deh, ih mi si too moa breda; ih si Zebidee too son dehn, Jaymz ahn Jan. Dehn mi deh eena di boat wid dehn pa, hoo mi naym Zebidee, di fiks dehn net, ahn hihn kaal dehn.
22 Rait away, dehn lef di boat ahn dehn pa ahn fala hihn.
23 Den ih gaahn chroo di hoal a Gyalilee, di teech eena aala di sinagag dehn ahn preech di gud nyooz a di Kingdom. Ih mi-di kyoar peepl weh mi-di sofa fahn aal kaina siknis ahn dizeez.
24 Ahn di ripoat bowt hihn spred aal oava Siriya. Dehn bring peepl weh mi-di sofa fahn difrent dizeez ahn bad payn, peepl weh mi ga deemon di liv eena dehn, peepl weh mi-di sofa fahn fits, ahn peepl weh mi paralaiz, ahn hihn kyoar aala dehn.
25 Afta dat, lata peepl fahn Gyalilee, Dekapolis,* Jeroosalem, Judeeya, ahn fahn di ada said a di Jaadn staat tu fala hihn.
