Machyu 5:1-48
5 Wen Jeezas mi si di krowd a peepl, ih gaan op pahn di said a wahn mongtin an ih sidong. Afta dat, ih disaipl dehn gyada rong ahn.
2 Den ih staat tu teech dehn seh:
3 “Di wan dehn hoo noa seh dehn need Gaad* wahn bee hapi, bikaaz di Kingdom a hevn da fi dehn.
4 “Di wan dehn weh di moan ahn baal wahn bee hapi, bikaaz adaz* wahn komfert dehn.
5 “Di wan dehn weh hombl wahn bee hapi, bikaaz Gaad wahn gi dehn di ert.
6 “Di wan dehn weh hongri fi raichosnis wahn bee hapi, bikaaz Gaad wahn satisfai dehn.
7 “Di wan dehn weh shoa mersi wahn bee hapi, bikaaz adaz* wahn shoa dehn mersi.
8 “Di wan dehn weh ga wahn kleen haat wahn bee hapi, bikaaz dehn wahn si Gaad.
9 “Di wan dehn weh peesabl wahn bee hapi, bikaaz adaz wahn kaal dehn chiljren a Gaad.
10 “Di wan dehn weh fays persikyooshan fi di sayk a raichosnis wahn bee hapi, bikaaz di Kingdom a hevn da fi dehn.
11 “Di wan dehn weh fays persikyooshan, ahn weh geh insolt op, ahn weh peepl tel aal kaina wikid lai pan sayka mee wahn bee hapi.
12 Unu rijais ahn bee hapi, bikaaz unu wahn geh wahn big riwaad da hevn, bikaaz jos laik dat dehn yoostu persikyoot di prafit dehn eena di paas.
13 “Unu da laik di saalt a dis werl, bot if di saalt looz ih saaltinis, yu tink enibadi ku mek ih tays laik saalt agen? Ih noh gud fi notn, yu wuda haftu chroa it weh, ahn den peepl wahn en op di waak op pan it.
14 “Unu da laik di lait a di werl. Yu kyaahn haid wahn siti weh deh pahn di tap a wahn mongtin.
15 Wen peepl lait wahn lamp, dehn put it pahn wahn lampstan, noh anda wahn baaskit, kaaz dehn waahn ih shain pahn evribadi eena di hows.
16 Jos laik dat, unu fi shain unu lait fronta evribadi, soh dat dehn ku si di gud tingz weh unu di du ahn gi gloari tu unu Faada hoo deh da hevn.
17 “Noh tink dat Ah mi kohn fi dischrai di teechinz a di Laa er di prafit dehn, bot Ah kohn fi mek fi dehn teechinz kohn chroo.
18 Ah di tel unu di chroot, ih wuda bee eeziya fi hevn an ert geh dischrai dan fi mek wan lee leta a di Laa noh kohn chroo.
19 Soh den, if enibadi brok wan a di komanment dehn kaaz dehn tink ih noh impoatant ahn teech adaz fi du di saym ting, dehn noh fit fi bee paat a di Kingdom a hevn. Bot hooeva kip di komanment dehn ahn teech adaz fi du di saym ting wahn bee grayt eena di Kingdom a hevn.
20 Soh Ah di tel unu, if di skraib ahn Farisee dehn moa raichos dan unu, fi shoar unu noh wahn bee paat a di Kingdom a hevn.
21 “Fahn way bak unu mi hyaa: ‘Yu noh fi merda, bot hooeva komit merda wahn haftu ansa tu di koat a jostis.’
22 Bot now Ah di tel unu, enibadi weh kantinyu fi stay beks wid ih brada wahn haftu ansa tu di koat a jostis; ahn hooeva yooz kruwil an insoltin werdz tu ih brada wahn haftu ansa tu di Sopreem Koat; ahn hooeva seh, ‘Yu wotlis fool!’ wahn en op eena di faiya a Gehena.*
23 “Soh den, if yu di kehr yu gif tu di alta ahn yu memba dat yu brada ga sohnting gens yu,
24 lef yu gif fronta di alta ahn goh. Fers mek pees wid yu brada, ahn den kohn bak an aafa op yu gif.
25 “If sombadi di kehr yu da koat bikaaz ih ga wahn komplaynt gens yu, hori setl mataz bifoa unu get deh, soh dat da persn noh han yu oava tu di joj, ahn da joj noh han yu oava tu di koat ofishal, ahn den yu en op da jayl.
26 Ah di tel unu di chroot, yu noh wahn kom owt fahn deh til yu pay aaf evri laas sent weh yu oa.
27 “Fahn way bak unu mi hyaa: ‘Yu noh fi komit adolchri.’
28 Bot now Ah di tel unu, enibadi hoo kantinyu fi luk pahn wahn uman hoo da noh ih waif til ih los afta ahn don ga sekshwal rilayshanz wid ahn eena ih haat.
29 Soh den, if yu rait aiy di kaaz yu fi stombl, dig it owt ahn chroa it weh. Bikaaz ih beta fi mek yu looz wan paat a yu badi dan fi mek yu hoal badi en op eena Gehena.*
30 Aalso, if yu rait han di mek yu stombl, kot it aaf ahn chroa it weh. Bikaaz ih beta fi mek yu looz wan a yu han dan fi mek yu hoal badi en op eena Gehena.*
31 “Moroava, unu mi hyaa: ‘Hooeva divoas ih waif, mek hihn giv ahn ih divoas paypa.’
32 Bot now Ah di tel unu, wahn man ku divoas ih waif onli if shee komit sekshwal imoraliti.* If ih stil divoas ih waif, hihn di put shee eena daynja fi komit adolchri, ahn hooeva marid di uman weh geh da kaina divoas komit adolchri tu.
33 “Agen, unu yoostu hyaa: ‘Yu noh fi swayr fi du sohnting ahn den noh du it, bot yu mos kip yu vow dehn weh yu mek tu Jehoava.’
34 Bot now Ah di tel unu: Noh swayr non ataal, noh eevn bai hevn, bikaaz dat da Gaad chroan;
35 needa bai ert, bikaaz dat da Gaad futstool; ner bai Jeroosalem, bikaaz dat da di siti a di grayt King.
36 Noh swayr bai yu hed, kaaz yu kyaahn mek yu hyaa blak ner wait.
37 Bot wen yu seh ‘Yes,’ mek ih meen yes, ahn wen yu seh ‘No,’ mek ih meen no, kaaz eniting els bisaidz dat da fahn di wikid wan.
38 “Unu yoostu hyaa: ‘If sombadi bos yu aiy, yoo bos fi dehn aiy. An if sombadi brok yu teet, yoo brok fi dehn wan tu.’
39 Bot now Ah di tel unu, noh fait bak gens wahn wikid persn, bot hooeva slap yu pahn yu rait cheek, ton yu fays mek ih slap yu pahn di ada wan.
40 An if wahn persn waahn kehr yu da koat kaaz ih waahn yu shert, giv ahn yu jakit tu;
41 an if sombadi eena atariti foas yu fi goh wid ahn fi wan mail, goh wid ahn too mailz.
42 If sombadi di aks yu fi help, help dehn, an if sombadi waahn baro moni,* len dehn.
43 “Unu yoostu hyaa: ‘Yu fi lov yu nayba ahn hayt yu enimi.’
44 Bot now Ah di tel unu: ‘Kantinyu fi lov unu enimi dehn ahn pray fi dehn wan weh di persikyoot unu,
45 soh dat unu ku proov dat unu da chiljren a wi hevnli Faada, sins hihn mek di son shain pahn di wikid ahn di gud peepl, an ih mek ih rayn pahn di raichos wan dehn ahn di peepl weh noh raichos.
46 An if unu lov peepl weh lov unu, weh kaina riwaad unu wahn get? Yu noh tink di taks kalekta dehn di du di saym ting?
47 An if unu onli greet unu bradaz, unu tink unu di du eniting speshal? Peepl weh noh noa Gaad di du di saym ting.
48 Unu fi bee perfek,* jos laik how unu hevnli Faada perfek.
Futnoat
^ Er “Di wan dehn weh kanshos a dehn spirichwal need.”
^ Er “ada peepl ahn Gaad.”
^ Er “ada peepl ahn Gaad.”
^ Di plays wehpaat dehn yoostu bon gyaabij owtsaida Jeroosalem. Si di Glasari, “Gehena.”
^ Si di Glasari, “Gehena.”
^ Si di Glasari, “Gehena.”
^ Di Greek werd da por·neiʹa. Si di Glasari, “Sekshwal imoraliti.”
^ Dis meen fi baro widowt inchres.
^ Er “fi bee kompleet.”
