Machyu 6:1-34
6 “Bee kyaaful noh fi du raichos tingz fronta peepl jos fi mek dehn noatis unu; adawaiz unu Faada da hevn noh wahn riwaad unu.
2 Soh wen yu gi gifs tu poa peepl,* noh bloa wahn chrompit heda yu laik weh di hipokrit dehn du eena di sinagag ahn pahn di schreet dehn jos fi mek peepl prayz dehn op. Ah di tel unu, dat da aal di riwaad dehn wahn get.
3 Bot wen yu di giv gifs tu poa peepl noh mek yu lef han noa weh yu rait han di du,
4 da way deh, wen yu giv gifs tu di poa nobadi wahn noa bowt it. Den onli yu Faada weh yu kyaahn si wahn pay yu bak.
5 “Ahn wen unu pray, noh ak laik di hipokrit dehn, kaaz dehn laik stan op ahn pray eena di sinagag dehn ahn pahn di kaana a di mayn schreet dehn jos fi mek peepl si dehn. Ah di tel unu, dat da aal di riwaad dehn wahn get.
6 Bot wen yu pray, goh eena yu room ahn shet di doa, den afta dat, pray tu yu Faada weh yu kyaahn si. Den yu Faada wahn pay yu bak.
7 Wen yu di pray, noh seh di saym tingz oava ahn oava agen laik how peepl weh noh noa Gaad pray. Dehn tink dat Gaad wahn hyaa dehn bikaaz dehn di seh lang pryaaz.
8 Soh noh bee laik dehn, kaaz unu Faada noa weh unu need eevn bifoa unu aks ahn.
9 “Soh den, dis da how unu mos pray:
“‘Hevnli Faada, wi waahn yu naym bee hoali.*
10 Wi waahn yu Kingdom kom. Wi waahn yu wil tek plays pahn di ert, di saym way ih di tek plays da hevn.
11 Pleez gi wi di food* weh wi need fi dis day;
12 ahn pleez fergiv wi sin dehn,* jos laik how wi fergiv adaz weh sin gens wi.*
13 Ahn pleez help wi soh dat wi noh giv een tu temtayshan, bot reskyu wi fahn di wikid wan.’
14 “If unu fergiv peepl wen dehn sin gens unu, unu hevnli Faada wahn fergiv unu tu;
15 bot if unu noh fergiv peepl wen dehn sin gens unu, den unu Faada noh wahn fergiv unu needa.
16 “Wen unu faas ahn noh eet, stap bee laik di hipokrit dehn. Dehn put aan wahn sad fays ahn noh wori bowt how dehn luk jos fi mek peepl si dat dehn di faas. Ah di tel unu, dat da aal di riwaad dehn wahn get.
17 Bot wen yu di faas, wash yu fays ahn put perfyoom ail pahn yu hed,
18 soh dat peepl noh wahn noatis dat yu di faas, onli yu Faada weh yu kyaahn si wahn noatis yu. Den yu Faada da hevn wahn pay yu bak.
19 “Stap put op chrezhaz pahn di ert, wehpaat insek ahn ros ku rooin dehn ahn wehpaat teef ku brok een ahn teef dehn.
20 Insted, put op yu chrezhaz da hevn, wehpaat insek ner ros kyaahn rooin dehn, ahn wehpaat teef kyaahn brok een ahn teef dehn.
21 Kaaz wehpaat yu chrezha deh, da rait deh yu haat wahn deh tu.
22 “Di lamp a di badi da di aiy. Soh den, if yu aiy foakos pahn wan ting, den yu hoal badi wahn bee brait.*
23 Bot if yu aiy wikid, den yu hoal badi wahn bee daak. If di lait weh deh eena yoo ton tu daaknis, den ih wahn daak daak fi chroo!
24 “Nobadi ku slayv fi too maasta; kaaz ih wahn hayt wan ahn lov di ada wan, er ih wahn stik tu wan ahn kyaahn stan di ada wan. Unu kyaahn slayv fi Gaad ahn fi Richiz saym taim.
25 “Bikaaz a dat, Ah di tel unu: Stap wori bowt unu laif,* laik weh unu wahn eet er weh unu wahn jrink, ahn stap wori bowt unu badi, laik weh unu wahn wayr. Unu noh tink laif* moa impoatant dan food, ahn di badi moa impoatant dan kloaz?
26 Unu stap ahn noatis di berd dehn weh flai eena di skai; dehn noh plaant no seed ner reep ner stoar op no food, yet unu hevnli Faada feed aala dehn. Unu noh tink dat unu wert moa dan dehndeh berd?
27 Wich wan a unu tink dat if unu wori unu wahn ku ad aan wan moa minit tu unu laif?
28 Aalso, wai unu di wori bowt kloaz? Laan fahn di lili dehn weh di groa eena di feel; dehn noh werk, ner mek kloaz fi dehnself;
29 bot Ah di tel unu dat noh eevn King Salaman wid aala fi hihn fansi kloaz mi luk az byootiful az dehnya lili.
30 Now if Gaad put aan byootiful kloaz pahn di plaants weh groa eena di feel, weh deh ya tudeh ahn bai tumaaro geh bon op eena faiya, unu noh tink dat ih wahn giv unu kloaz fi wayr tu? Unu ga lee bit a fayt!
31 Soh noh wori an aks unuself, ‘Da weh wi wahn eet?’ er, ‘Da weh wi wahn jrink?’ er, ‘Da weh wi wahn wayr?’
32 Kaaz dehnya tingz da weh peepl weh noh noa Gaad di goh afta. Unu hevnli Faada noa dat unu need aala dehnya tingz.
33 “Soh den, aalwayz mek shoar dat di Kingdom ahn Gaad raichos standadz* kohn fers eena unu laif, ahn den Gaad wahn giv unu dehnya ada tingz tu.
34 Noh wori bowt di neks day, kaaz di neks day wahn gat ih oan woriz. Di chroblz weh yu gat fi tudeh, inof fi tudeh.
Futnoat
^ Si di Glasari, “Gifs tu di poa.”
^ Er “mek wi sangtifai yu naym; mek wi chreet yu naym wid rispek.”
^ Lit., “bred.”
^ Er “fergiv weh wi oa.”
^ Er “weh oa wi.”
^ Er “ful a lait.”
^ Er “soal.”
^ Er “di soal.”
^ Er “Gaad raichosnis.”
