Machyu 7:1-29
7 “Stap joj adaz, ahn Gaad noh wahn joj unu;
2 kaaz di saym way unu joj adaz, Gaad wahn joj unu, ahn di saym way unu deel wid adaz, da di saym way dehn wahn deel wid unu.
3 Soh den, wai yu wahn luk pahn di splinta weh deh eena yu brada aiy bot noh noatis di big pees a stik weh deh eena fi yoo oan aiy?
4 Er how yu ku seh tu yu brada, ‘Mek Ah tek owt di splinta weh deh eena yu aiy,’ wen wahn big pees a stik deh eena fi yoo oan aiy?
5 Hipokrit! Tek owt di big pees a stik weh deh eena fi yoo oan aiy fers, den yu wahn ku si gud how fi tek owt di splinta weh deh eena yu brada aiy.
6 “Noh gi hoali tingz tu di daag dehn ner chroa unu perlz tu di pig dehn, adawaiz dehn onli wahn waak op pan it ahn ton rong an atak unu.
7 “Kip aan di aks, an unu wahn geh weh unu di aks fa; kip aan di saach, an unu wahn fain weh unu di saach fa; kip aan di nak, ahn di doa wahn oapm fi unu;
8 bikaaz evribadi weh aks wahn get, an evribadi weh saach wahn fain, an evribadi weh nak pahn di doa, ih wahn oapm fi dehn.
9 Non a unu wahn giv unu son wahn rak fi eet if ih aks fi bred,
10 ner giv ahn wahn snayk if ih aks fi wahn fish, noh chroo?
11 Soh den, if unu weh wikid noa how fi gi gud gif tu unu chiljren, den fi shoar unu Faada da hevn wahn gi gud tingz tu dehn wan weh di aks ahn!
12 “Soh den, eena evriting, unu fi chreet adaz di saym way unu waahn dehn chreet unu. Reeli, dis da weh di Laa a Moaziz ahn di buk a di Prafit Dehn teech.
13 “Goh chroo di gayt weh naro, bikaaz di gayt ahn di road weh waid an eezi fi goh chroo wahn leed unu tu dischrokshan, ahn wahn lata peepl di goh chroo it;
14 bot di gayt ahn di road weh naro wahn leed unu tu evalastin laif, ahn lee bit a peepl di fain it.
15 “Unu wach owt fi di faals prafit dehn weh luk laik inosent sheep, kaaz dehn da laik wulf weh wuda waahn tayr unu tu peesiz.
16 Bai dehn akshanz* yu wahn noa hoo dehn. Kaaz peepl noh pik grayps ahn fig fahn prikl bush, noh chroo?
17 Jos laik dat, wahn helti chree bayr gud froot, bot wahn chree weh noh helti wahn bayr bad froot.
18 Wahn helti chree kyaahn bayr bad froot, ahn wahn chree weh noh helti kyaahn bayr gud froot.
19 Wahn chree weh noh di bayr gud froot wahn geh chap dong ahn chroa eena di faiya.
20 Soh den, bai dehn akshanz* unu wahn noa dehndeh faals prafit.
21 “Da noh evribadi weh tel mi, ‘Laad, Laad,’ wahn geh fi bee paat a di Kingdom a hevn, bot da onli di wan dehn weh du di wil a mai Faada weh deh da hevn.
22 Di day wahn kohn wen wahn lata peepl wahn seh: ‘Laad, Laad, wee mi prafesai eena yu naym, ahn jraiv owt deemonz eena yu naym, ahn du wahn lata miraklz eena yu naym.’
23 Bot Ai wahn tel dehn: ‘Ai noh noa unu! Get fahn fronta mi; unu da sohn wikid peepl!’
24 “Soh den, evribadi hoo hyaa weh Ah seh ahn du it wahn bee laik wahn waiz man weh bil ih hows pahn di rak.
25 Ahn di rayn kohn dong ahn di flod waata rayz ahn di breez staat tu bloa an lash gens di hows, bot ih neva jrap dong, kaaz ih mi bil pahn di rak.
26 Pahn di ada han, evribadi weh hyaa weh Ah seh ahn noh du notn bowt it wahn bee laik wahn foolish man weh mi bil ih hows pahn di san.
27 Ahn di rayn kohn dong ahn di flod waata rayz ahn di breez bloa an lash gens di hows, an ih jrap dong, ahn notn mi lef fahn da hows.”
28 Wen Jeezas mi finish seh aala dehndeh tingz, di krowd kudn bileev weh dehn mi hyaa bikaaz a di way how ih mi-di teech dehn,
29 kaaz ih mi-di teech dehn laik wahn persn weh ga atariti fahn Gaad, ahn noh laik di skraib dehn.
