Machyu 9:1-38
-
Jeezas heel wahn paralaiz man (1-8)
-
Jeezas kaal Machyu fi bee ih disaipl (9-13)
-
Di kweschan bowt wai Jeezas disaiplz noh faas (14-17)
-
Jairos daata; wahn uman toch di ej a Jeezas kloaz (18-26)
-
Jeezas heel too blain man ahn wahn man weh kudn taak (27-34)
-
Wahn big haavis, bot onli wahn lee bit a werkaz (35-38)
9 Den Jeezas an ih disaipl dehn get eena wahn boat ahn gaahn kraas di see tu di siti weh ih mi liv.
2 Ahn sohn peepl bring wahn paralaiz man pahn wahn schrecha. Wen Jeezas mi si di amonk a fayt dehn mi gat, ih tel di paralaiz man: “Noh frayd, mi son! Ah fergiv yu sin dehn.”
3 Now, som a di skraib dehn tel dehnself: “Dis man di taak gens Gaad.”
4 Jeezas mi noa weh dehn mi-di tink, soh ih aks dehn: “Wai unu di tink wikid tingz eena unu haat?
5 Weh eeziya fi mek Ah seh, ‘Ah fergiv yu sin dehn,’ er fi mek Ah seh, ‘Get op ahn waak’?
6 Bot fi mek unu noa dat di Son a man ga atariti rait ya pahn ert fi fergiv peepl sinz . . .” den ih ton tu di paralaiz man ahn tel ahn: “Get op, pik op yu schrecha, ahn goh hoam.”
7 An ih get op ahn gaahn hoam.
8 Wen di krowd si dat, dehn geh frayd, ahn dehn staat prayz Gaad, bikaaz hihn gi dis kaina atariti tu wahn man.
9 Afta Jeezas lef fahn deh, ih si wahn man weh naym Machyu di sidong da di taks aafis, an ih tel ahn: “Kohn bee mi disaipl.” Rait away, ih get op ahn fala ahn.
10 Laytaraan wen Jeezas an ih disaipl dehn mi-di sidong rong di taybl da Machyu hows, wahn lata di taks kalekta ahn sina dehn kom ahn sidong lang wid dehn.
11 Bot wen di Farisee dehn si dat, dehn tel ih disaipl dehn: “Wai fi unu teecha eet lang wid di taks kalekta ahn sina dehn?”
12 Wen Jeezas hyaa weh dehn mi-di seh, ih tel dehn: “Peepl weh helti noh goh si wahn dakta, da onli peepl weh sik goh.
13 Soh den, unu goh ahn laan weh di skripcha meen weh seh: ‘Ah waahn peepl shoa mersi, insteda aafa op sakrifais.’ Kaaz Ai kohn fi sayv sinaz, noh raichos peepl.”
14 Den Jan disaipl dehn kom op tu ahn an aks: “Wai wee ahn di Farisee dehn faas bot fi yoo disaipl dehn noh faas?”
15 Jeezas tel dehn: “Da wahn wedn, di frenz a di braidgroom noh ga no reezn fi bee sad, kaaz di braidgroom deh wid dehn. Bot di taim wahn kohn wen sombadi wahn tek weh di braidgroom fahn dehn, ahn den dehn wahn faas.
16 Nobadi pach op oal kloaz wid wahn nyoo pees a klaat, bikaaz di nyoo klaat schranga ahn wahn pul weh fahn di oal kloaz ahn mek di tayr eevn biga.
17 Ahn peepl noh put nyoo wain eena oal leda bag,* kaaz if dehn du dat, di leda bag wahn bos ahn di wain wahn chroa weh ahn di leda bag noh wahn gud agen. Bot peepl put nyoo wain eena nyoo leda bag. Da way deh di too a dehn wahn stay gud.”
18 Wail ih mi-di tel dehn dehnya tingz, wan a di leeda a di sinagag kom op tu ahn an neel dong fronta ahn an seh: “Bai now mi daata mosi ded, bot lesgoh wid mi da mi hows ahn lay yu han pan ahn, an shee wahn kohn tu laif.”
19 Den Jeezas an ih disaipl dehn get op ahn fala ahn.
20 Saym taim, wahn uman weh mi-di sofa fahn hemrij fi 12 yaaz kom op fahn bihain an toch di ej a Jeezas kloaz,
21 kaaz shee stay mi-di tel ihself: “If Ah kuda onli toch ih kloaz, Ah wuda geh beta.”
22 Jeezas ton rong, ahn wen ih si ahn, ih tel ahn: “Noh frayd, daata! Bikaaz a yu fayt, yu geh heel.” Ahn fahn da owa di uman mi geh heel.
23 Now wen ih reech di hows a di saym leeda fahn di sinagag, ih si sohn peepl di play di floot ahn wahn krowd a peepl di moan ahn baal lowd-wan.
24 Den Jeezas seh: “Unu goh owtsaid, kaaz di lee gyal noh ded, shee di sleep.” Wel, dehn staat tu laaf aata ahn.
25 Az soon az di krowd gaan owtsaid, Jeezas gaahn wehpaat di lee gyal mi deh, an ih hoal di lee gyal han ahn shee get op.
26 Af koars, peepl eena aala di tong ahn vilij dehn eena da ayrya mi geh fi hyaa bowt weh Jeezas du.
27 Wen Jeezas lef fahn deh, too man weh mi blain staat tu fala ahn; dehn mi-di hala owt: “Son a Dayvid, ga mersi pahn wi noh!”
28 Afta ih gaan eena di hows, di blain man dehn kom op tu ahn, an Jeezas aks dehn: “Unu ga fayt dat Ai ku heel unu?” Dehn ansa ahn seh: “Yes Laad, wi ga fayt.”
29 Den ih toch dehn aiy, ahn tel dehn: “Bikaaz a unu fayt, unu wahn ku si.”
30 Da saym taim, dehn aiy oapm. Bot Jeezas waan dehn; ih seh: “Mek shoar dat unu noh tel nobadi bowt dis.”
31 Bot afta dehn lef di hows, dehn tel evribadi eena aala di vilij ahn tong dehn bowt ahn.
32 Wen di man dehn weh mi blain mi-di lef, sohn peepl bring wahn man tu Jeezas weh kudn taak. Dis man mi aalso ga wahn deemon eena ahn.
33 Afta Jeezas jraiv owt di deemon, di man get bak ih speech. Wel, di krowd kudn bileev weh dehn mi-di si. Dehn seh: “Wi neva yet si soch a ting bifoa eena Izrel.”
34 Bot di Farisee dehn staat tu seh: “Da di roola a di deemonz di help hihn fi jraiv owt di deemon dehn.”
35 Jeezas gaan da aala di siti ahn vilij dehn, di teech eena fi dehn sinagag ahn preech di gud nyooz a di Kingdom. Ih mi kyoar aala dehn dizeez ahn siknis.
36 Wen ih si di krowd a peepl, ih haat gaan owt tu dehn, kaaz dehn da-mi laik sheep weh dehn oana chreet bad ahn dash wan said. Dehn da-mi laik sheep widowt wahn shepad.
37 Den ih tel ih disaipl dehn: “Lata werk deh fi du eena di haavis, bot wi onli ga lee bit a werkaz.
38 Soh den, unu haftu bayg di Maasta a di haavis fi sen owt moa werkaz intu fi hihn haavis.”
Futnoat
^ Er “oal wain bag.” Si di Glasari, “Wain bag.”
