Nehimaiya 5:1-19
5 Bot lata di man ahn dehn waif mi-di komplayn bowt som a di ada Jooz.
2 Som a dehn mi-di seh: “Wee ga lata pikni. Wi haftu geh grayn soh dat wi ku eet ahn servaiv.”
3 Ahn som mi-di seh: “Food skyaas ahn wi haftu giv op wi feel, wi grayp aachad, ahn wi hows jos fi geh grayn.”
4 Wail adaz mi-di seh: “Wi baro moni pahn wi feel ahn wi grayp aachad fi pay di king taks.
5 Dehn da Jooz jos laik wee, soh aala wi da faamli,* ahn fi dehn pikni noh beta dan fi wee wan, bot stilyet wee haftu giv op fi wee son ahn daata dehn az slayv, ahn som a wi daata dehn da don slayv aredi. Bot wee kyaahn du notn bowt it, bikaaz wi feel ahn wi grayp aachad bilangz tu ada peepl.”
6 Wen dehn tel mi aal weh mi-di goh aan, Ah geh beks bad.
7 Soh Ah sidong ahn tink bowt di mata eena mi haat, ahn den Ah skoal di leeda dehn ahn di ofishal dehn ahn tel dehn: “Unu di kalek inchres fahn unu oan breda.”
An den Ah set op wahn meetin wid aala dehn bikaaz a weh dehn du.
8 An Ah tel dehn: “Wi Jooish breda dehn mi geh sel owt tu di nayshan dehn, bot wi mi bai bak az moch a dehn az wi kud. Soh weh unu wahn du now? Unu wahn sel unu oan breda dehn? Ahn den wat, wi wahn haftu bai dehn bak agen?” Afta dat, dehn neva ga notn fi seh.
9 Den Ah tel dehn: “Dat noh rait. Unu noh tink unu shuda shoa rispek fi Gaad, soh dat di nayshan dehn weh da wi enimi kyaahn seh notn bad bowt wi?
10 Mee, mi breda dehn, ahn mi servant dehn di len dehn moni ahn grayn tu, ahn wee noh chaaj dehn inchres. Pleez, mek wi stap len wid inchres.
11 Ahn bifoa di day en, pleez gi dehn bak dehn feel, dehn grayp aachad, dehn aliv aachad, ahn dehn hows. An unu mos gi dehn bak di wan persent a di moni, di grayn, di nyoo wain, ahn di ail weh unu mi-di kalek fahn dehn eech mont az inchres.”
12 Den dehn ansa mi ahn seh: “Wi wahn gi dehn bak aala dehndeh tingz ahn wi noh wahn aks fi notn bak fahn dehn. Wi wahn du egzakli weh yu tel wi.” Soh Ah kaal di prees dehn ahn den Ah mek dehnya man swayr fronta di prees dehn fi kip dehn pramis.
13 Ahn den Ah shayk owt mi kloaz fronta dehn ahn tel dehn: “Dis da how di chroo Gaad wahn shayk owt evri wan a unu weh noh du weh unu pramis fi du. Gaad wahn shayk unu owta unu hows an owta eniting weh unu oan an ih wahn lef unu wid notn.” Ahn den di hoal kangrigayshan* seh: “Aymen!”* Ahn dehn prayz Jehoava, ahn di peepl du weh dehn pramis fi du.
14 King Artazerkseez mi mek mee bee di govna oava Jooda, an Ai da-mi wahn govna deh fi 12 yaaz, fahn di 20th yaa tu di 32nd yaa weh hihn mi-di rool. Ahn joorin da taim, needa mee ner mi breda dehn mi eet di food weh di king seh di govna fi tek fahn di peepl.
15 Bot di govna dehn bifoa mee mi mek tingz haad fi di peepl, kaaz evri day dehn mi-di tek 40 silva shekl* fahn di peepl soh dat dehn kuda bai bred ahn wain. An eevn di govna servant dehn mi-di mek tingz haad fi di peepl tu. Bot owta rispek fi Gaad, Ai neva du dat.
16 Pahn tap a dat, Ai mi help bil dis waal, an aala mi servant dehn mi help tu, ahn wi neva tek no lan fahn nobadi.
17 150 Jooz an ofishalz, lang wid di wan dehn weh kohn vizit wi fahn di ada nayshan dehn, mi-di eet da mai taybl.
18 Evri day dehn mi pripyaa wan bul, siks a di bes sheep, ahn sohn berd fi mi,* ahn wans evri ten dayz wi mi ga lata wain, an aal difrent kain tu. Stilyet Ah neva tek di food weh di king seh di govna fi tek fahn di peepl, bikaaz di peepl dehn mi don berdn dong wid evriting weh dehn haftu du fi di king.
19 Mi Gaad, pleez memba mi ahn bles mi fi evriting weh Ah du fi dehnya peepl.
Futnoat
^ Er “soh dehn da wi oan flesh ahn blod.”
^ Si di Glasari, “Kangrigayshan.”
^ Si di Glasari, “Aymen.”
^ Wahn shekl mi way 11.4 gramz. Si Apendiks B14.
^ Er “owta mi oan moni.”
