Nehimaiya 6:1-19
6 Now Sanbalat, Tobaiya, Geeshem di Arab, ahn di res a wi enimi dehn mi hyaa dat Ah mi bil bak di waal ahn dat nohmoh gyap neva lef eena it, eevn doa Ah neva set op non a di doa eena di gayt dehn yet.
2 Soh rait away Sanbalat ahn Geeshem sen mi dis mesij: “Kohn ya mek wi set wahn taim fi meet op da di vilij dehn eena di Oano Vali.” Bot dehn mi-di plan fi hert mi.
3 Soh Ah sen sohn mesinja fi tel dehn: “Ai kyaahn goh no way, bikaaz Ah di du wahn impoatant werk. An if Ah wuda lef weh Ah di du fi goh meet op wid unu, di werk wahn stap.”
4 Dehn sen mi dis mesij foa taimz, an evri taim Ah tel dehn di saym ting.
5 Den Sanbalat sen ih servant wid di mesij fi di fif taim, an ih mi ga wahn leta weh mi oapm eena ih han.
6 Di leta mi seh: “Wahn rooma di goh rong monks di nayshan dehn dat yoo ahn di Jooz di plan fi ribel, ahn Geeshem seh da chroo. Dat da wai unu di bil di waal. An akaadn tu di rooma yoo wahn bee fi dehn king.
7 Ahn yu pik sohn prafit fi goh anonks aal chroo Jeroosalem dat dehn ga wahn king eena Jooda. Ahn now di king wahn hyaa bowt aala dehnya ting. Soh kom ahn mek wi taak bowt dis tugeda.”
8 Bot Ah sen tel ahn seh: “Non a dehnya ting weh yu di seh da chroo. Da yoo di mek op aala dehnya ting.”
9 Aala dehn mi-di chrai fraitn wi. Dehn mi-di seh: “Dehn han wahn geh taiyad ahn dehn wahn kyaahn finish di werk.” Bot Ah pray tu Gaad ahn seh: “Pleez, gi mi schrent.”
10 Den Ah gaahn luk fi Shimaiya, hoo da-mi Delaya son ahn Mehetibel granson. Ah gaahn si ahn, kaaz ih neva mi-di lef ih hows rong dehn taim. An ih tel mi: “Mek wi set wahn taim fi meet op eena di chroo Gaad templ* ahn mek wi kloaz di doa, bikaaz dehn di chrai kohn kil yu. Dehn di kohn fi kil yu joorin di nait.”
11 Bot Ah seh: “Da how wahn man eena mai pozishan ku jos ron weh? If Ah goh eena di templ, Ai dizerv fi ded. No, Ai noh gwehn!”
12 Den Ah kanshos dat da neva Gaad sen ahn, da Tobaiya ahn Sanbalat pay ahn fi chrik mi.
13 Dehn mi pay ahn fi fraitn mi ahn fi mek Ah sin, soh dat dehn kuda shaym mi ahn damij mi repyutayshan.
14 Mi Gaad, pleez memba Tobaiya ahn Sanbalat ahn di tingz weh dehn du. Ahn pleez memba di prafit Nowadaiya; shee ahn di res a di prafit dehn aalwayz mi-di chrai fraitn mi.
15 Soh wi finish bil di waal eena 52 dayz, pahn di 25th day a Eelol.*
16 Az soon az aala wi enimi dehn hyaa bowt it an aala di nayshan dehn rong wi see’t, dehn geh shaym shaym, ahn dehn riyalaiz dat da wi Gaad mi help wi fi du di werk.
17 Rong da taim di leeda dehn da Jooda mi-di sen lata letaz tu Tobaiya, ahn hihn wuda rait dehn bak.
18 Wahn lata peepl fahn Jooda mi pramis fi sopoat Tobaiya, bikaaz fi hihn faada-in-laa da-mi Ayraa son Shekanaiya, ahn Tobaiya son Jehohaynan mi marid Mesholam daata. Mesholam da-mi Berekaiya son.
19 Ahn dehn wuda aalwayz tel mi gud tingz bowt Tobaiya ahn den goh bak ahn ripoat tu hihn weh Ah seh. Den hihn wuda sen letaz fi chrai fraitn mi.
