Praverbz 10:1-32
10 Sohn waiz werdz fahn Salaman.
Wahn waiz son mek ih pa hapi,Bot wahn foolish son mek ih ma feel sad.
2 If wahn persn du wikid tingz fi geh chrezhaz, dehndeh tingz noh wahn wert notn.Bot if wahn persn du gud tingz, den dat wahn sayv ahn fahn det.
3 Jehoava noh wahn mek raichos peepl staav,An ih noh wahn mek wikid peepl geh weh dehn waahnt.
4 Wahn layzi persn wahn geh poa,Bot wahn persn weh werk haad wahn geh rich.
5 Di son weh waiz wahn gyada op food weh groa joorin soma taim,Bot di son weh sleep joorin haavis taim wahn shaym ihself.
6 Wahn raichos persn geh blesinz,Bot di tingz weh kom owta wahn wikid persn mowt haid dat ih waahn du vailent tingz.
7 Gaad wahn memba wahn raichos persn, ahn hihn wahn bles ahn,*Bot wahn wikid persn repyutayshan wahn ratn weh.
8 Wahn waiz persn wahn aksep advais,*Bot wahn persn weh seh foolish tingz wahn sofa.
9 Wahn persn weh aanis wahn liv eena pees,Bot wahn persn weh noh aanis wahn geh kech.
10 Wahn persn weh chrik* adaz kaaz dehn payn,Ahn di persn weh seh foolish tingz wahn sofa.
11 Di tingz weh wahn raichos persn seh gi laif,Bot di tingz weh kom owta wahn wikid persn mowt haid dat ih waahn du vailent tingz.
12 Wahn persn weh hayt adaz laik staat kwaaril,Bot wahn persn weh lov adaz fergiv dehn mistayk.
13 Wahn persn weh ga andastandin wahn seh waiz tingz,Bot wahn persn weh noh ga no sens wahn geh wap pan ih bak wid wahn stik.
14 Waiz peepl cherish nalij,Bot wahn foolish persn seh tingz weh kaaz dischrokshan.
15 Di tingz* weh wahn rich persn oan da laik wahn siti weh ga lata protekshan.
Ahn poa peepl sofa bikaaz dehn noh ga notn.
16 Di tingz weh wahn raichos persn du mek ih geh laif,Bot wahn wikid persn yooz di tingz weh ih geh fi sin.
17 Di persn weh aksep karekshan help adaz get aan pahn di road tu laif,*Bot di persn weh rijek karekshan mek adaz schray weh.
18 Sombadi weh haid dat dehn hayt adaz tel loan lai,Ahn wahn schupid persn goh bowt di tel lai bowt adaz.*
19 Sombadi weh taak tu moch wahn mek wahn mistayk,Bot wahn waiz persn kanchroal ih mowt.
20 Di tingz weh wahn raichos persn seh da laik di bes silva,Bot di tingz weh wahn wikid persn tink bayli wert eniting.
21 Di tingz weh wahn raichos persn seh help* lata peepl,Bot wahn foolish persn ded bikaaz ih noh ga no sens.
22 Di blesinz fahn Jehoava da weh mek wahn persn ga wahn gud laif,Ahn hihn noh bring no payn wid it.
23 Wen wahn schupid persn du bad tingz,* dat da laik wahn gaym tu ahn,Bot wahn persn weh ga andastandin ga wizdom tu.
24 Evriting weh wikid peepl frayd fa wahn hapm tu dehn.Bot raichos peepl wahn geh weh dehn waahn.
25 Jos laik how wahn staam dischrai tingz, da rait soh wikid peepl wahn geh dischrai,Bot raichos peepl wahn bee laik wahn fongdayshan weh laas fareva.
26 Jos laik how vineega nej yu teet ahn smoak bon yu aiy,Da rait soh wahn layzi werka mek ih baas* sofa.
27 Sombadi weh ga lata rispek fi Jehoava wahn liv langa,Bot wahn wikid persn wahn ded bifoa ih taim.
28 Di tingz weh wahn raichos persn hoap fa mek ih feel hapi,Bot di tingz weh wahn wikid persn hoap fa wahn neva kohn chroo.
29 Di tingz weh Jehoava du wahn protek wahn inosent persn,Bot dehndeh tingz wahn dischrai wikid peepl.
30 Notn noh wahn mek raichos peepl staga,Ahn wikid peepl noh wahn liv pahn di ert nohmoh.
31 Waiz tingz kom owta wahn raichos persn mowt,Bot wahn persn weh seh wikid tingz wahn geh dischrai.
32 Wahn raichos persn noa wat da di rait ting fi seh,Bot loan lai kom owta wahn wikid persn mowt.
Futnoat
^ Er “Peepl wahn memba wahn raichos persn, ahn dehn wahn bles ahn.”
^ Lit., “di komanment dehn.”
^ Er “weh wink ih aiy aata.”
^ Er “Di preshos tingz.”
^ Dis ku aalso bee “Di persn weh aksep karekshan deh pahn di road tu laif.”
^ Er “wahn schupid persn spred roomaz.”
^ Er “gaid.”
^ Er “du shaymful tingz.”
^ Er “di persn weh sen ahn.”
