Praverbz 15:1-33
15 Wahn jentl ansa ku mek sohnbadi weh beks kaam dong,Bot wen wahn persn taak eena wahn rof way* ih ku mek sombadi geh beks.
2 Wen wahn waiz persn taak, ih yooz di tingz weh ih noa eena wahn gud way,Bot wahn schupid persn taak loan foolishnis.
3 Jehoava aiy dehn si evriting,An ih si di gud ahn di bad tingz weh peepl du.
4 Di kain tingz weh wahn persn seh da laik wahn chree weh gi laif,Bot wahn persn weh tel lai kaaz sofarin.*
5 Wahn foolish persn rijek di karekshan fahn ih pa,Bot wahn waiz persn aksep it.
6 Wahn raichos persn hows ga lata richiz,Bot di tingz weh wahn wikid persn haavis bring ahn loan chrobl.
7 Wahn waiz persn spred nalij wid di tingz weh ih seh,Bot schupid peepl noh du dat.
8 Jehoava hayt di sakrifais dehn fahn wikid peepl,Bot Gaad feel hapi wen raichos peepl pray tu ahn.
9 Jehoava hayt di tingz weh wikid peepl du,Bot hihn lov dehn wan weh du dehn bes fi du weh rait.
10 Wahn persn weh stap du weh rait hayt karekshan,An enibadi weh rijek karekshan wahn ded.
11 If Jehoava ku si di Grayv,* di plays wehpaat ded peepl badi ratn weh,
Den ih eezi fi mek hihn si weh deh eena wahn persn haat.
12 Wahn prowd persn* noh lov sombadi weh di karek ahn.
Ih noh gwehn da wahn waiz persn fi advais.
13 Wen wahn persn haat hapi, yu ku si di hapinis eena ih fays,Bot payn eena wahn persn haat ku bring ahn dong.
14 Wahn waiz persn chrai geh moa nalij,Bot wahn schupid persn taak* loan foolishnis.
15 Evri day da wahn bad day fi peepl weh di sofa,Bot wahn persn weh ga lata jai eena ih haat* wahn hapi aal di taim.
16 Ih beta fi bee wahn persn weh ga lee bit a moni ahn lata rispek fi JehoavaDan fi bee wahn persn weh ga lata moni lang wid lata woriz.
17 Ih beta fi eet wahn playt a vejitablz eena wahn hows wehpaat peepl lov yuDan fi eet di bes meet fahn wahn bul da wahn plays wehpaat peepl hayt yu.
18 Wahn persn wid wahn bad tempa kaaz prablemz,Bot wahn persn weh noh eezi fi geh beks ku mek wahn persn weh redi fi kwaaril kaam dong.
19 Di road weh di layzi persn waak pan ga prikl,Bot di raichos persn waak pahn wahn smood road.
20 Wahn waiz son mek ih pa feel hapi,Bot wahn schupid son noh shoa lov tu ih ma.
21 Wahn persn weh noh ga no sens laik du foolish tingz,Bot wahn persn weh ga andastandin kantinyu waak pahn di rait road.
22 Tingz noh gwehn gud fi sohnbadi weh noh taak tu adaz bowt ih planz,Bot tingz gwehn gud wen ih aks fi advais.
23 Wahn persn feel hapi wen ih gi di rait ansa,An ih soh gud wen sombadi seh di karek ting da di karek taim!
24 Wahn persn weh ga andastandin deh pahn di road weh leed tu wahn gud laif,Ahn hihn stay weh fahn di road weh goh dong tu di Grayv.*
25 Jehoava wahn dischrai wahn prowd persn hows,Bot ih wahn protek di bongjri lain a wahn wido lan.
26 Jehoava hayt di planz weh wikid peepl mek,Bot hihn laik it wen peepl seh kain tingz.
27 Wahn persn weh mek moni eena wahn way weh noh aanis wahn kaaz prablemz fi ih famili,*Bot wahn persn weh hayt wahn braib wahn kantinyu fi liv.
28 Wahn raichos persn tink gud bifoa ih ansa,Bot wahn schupid persn taak loan foolishnis.
29 Jehoava deh faar fahn wikid peepl,Bot hihn lisn wen raichos peepl pray tu ahn.
30 Wen sombadi hapi fi si yu,* dat mek yoo hapi tu,Ahn gud nyooz inkorij adaz.*
31 Karekshan ku sayv wahn persn laif.Enibadi weh lisn tu it wahn bee waiz.
32 Wahn persn weh rijek karekshan noh kay bowt ih laif,*Bot enibadi weh lisn tu karekshan wahn geh andastandin.
33 Wahn persn weh ga lata rispek fi Jehoava wahn bee waiz,Ahn Gaad wahn aana wahn hombl persn.
Futnoat
^ Er “eena wahn way fi kaaz payn.”
^ Lit., “krosh wahn persn spirit.”
^ Er “Sheeyol,” weh da di Grayv. Si di Glasari, “Grayv.”
^ Er “wahn persn weh laik mak adaz.”
^ Er “goh afta.”
^ Er “weh ga wahn gud haat.”
^ Er “Sheeyol,” weh da di Grayv. Si di Glasari, “Grayv.”
^ Er “wahn bring shaym pahn ih famili.”
^ Er “Wen sombadi ga brait aiyz.”
^ Lit., “mek di boan dehn fat.”
^ Er “soal.” Si di Glasari, “Soal.”
