Praverbz 16:1-33
16 Wahn persn ku tink bowt weh ih shuda seh,*Bot eena di en, da Jehoava help ahn fi gi di karek ansa.*
2 Wahn persn tink dat weh ih di du da di rait* ting fi du,Bot Jehoava noa wai ih du it.
3 Pen pahn Jehoava eena evriting weh yu du,An evriting weh yu waahn du gwehn gud.
4 Jehoava yooz evriting soh dat ih perpos ku kohn chroo,An ih wahn mek shoar dat wikid peepl geh dischrai.
5 Jehoava hayt wahn prowd persn.
Fi shoar da persn wahn geh ponish.
6 Peepl weh ga lata lov* ahn weh stay faytful wahn fergiv ada peepl mistayk.Ahn wahn persn weh ga lata rispek fi Jehoava wahn ton weh fahn eniting weh bad.
7 Wen Jehoava hapi wid how wahn persn liv ih laif,Hihn mek da persn enimiz ga pees wid ahn.
8 Ih beta fi ga wahn lee bit ahn du weh raitDan fi ga wahn lat ahn du weh rang.
9 Wahn persn mait plan owt how ih waahn liv,Bot Jehoava da di wan weh dairek ih step dehn.
10 Wahn king fi seh wat da Gaad disizhan;Ih noh fi du notn weh noh fyaa.
11 Wahn skayl weh gi di karek wayt kohn fahn Jehoava;Di stoan wayt dehn* eena di bag kohn fahn hihn.
12 Wahn gud king hayt tingz weh bad.Wahn king weh rool eena wahn fyaa way wahn rool fi wahn lang taim.
13 Wahn king feel hapi wen peepl seh tingz weh raichos.
Ih lov peepl weh taak eena wahn aanis way.
14 Wen wahn king beks, peepl ku en op di ded,Bot wahn waiz persn ku kaam ahn dong.
15 If wahn king hapi wid wahn persn,Den da persn wahn ga wahn gud laif.
16 Geh wizdom bikaaz ih beta dan goal.
Werk haad fi geh andastandin bikaaz ih wert moa dan silva.
17 Di road weh raichos peepl waak pan noh leed tu eniting bad.
Wahn persn weh kyaaful bowt weh ih du wahn kantinyu fi liv.
18 Wahn prowd persn wahn geh dischrai,Ahn wahn persn weh tink ih hai ahn maiti wahn faal dong.
19 Ih beta fi bee hombl lang wid ada hombl peeplDan fi shayr richiz wid prowd peepl.*
20 Tingz gwehn gud fi wahn persn weh ga andastandin,An enibadi weh chros eena Jehoava wahn bee hapi.
21 Peepl wahn seh dat wahn persn weh waiz ga andastandin tu.An ih eezi fi mek adaz lisn tu sombadi weh seh kain tingz.
22 Andastandin help wahn persn fi geh laif,Bot di foolishnis weh wahn persn du wahn bee ih ponishment.
23 Wahn waiz persn seh waiz tingz,An ih ku kanvins adaz wid weh ih seh.
24 Di kain tingz weh peepl seh sweet laik honi,Ahn dehn schrentn di badi.
25 Wahn persn mait tink dat ih di du di rait ting,Bot eena di en, ih wahn en op di ded.
26 Wahn man* werk haad soh dat ih ku ga sohnting fi eet,Ahn bikaaz ih need food,* ih kantinyu fi werk.
27 Wahn persn weh noh gud fi notn plan fi du bad tingz,Ahn di tingz weh ih seh da laik faiya weh bon op evriting.
28 Wahn persn weh laik mek chrobl* mek peepl goh gens wan anada,Ahn wahn persn weh laik slanda adaz mek peepl stap bee frenz wid wan anada.
29 Wahn vailent man temp ih nayba fi du bad tingz,An ih leed ahn eena di rang way.
30 Hihn wink ih aiy wen ih di plan fi hert adaz,
An ih grin wen ih di plan fi du sohnting bad.
31 Gray hyaa da laik wahn byootiful krong pahn sombadi hedWen dehn di waak pahn di rait road.
32 Wahn payshent man beta dan wahn powaful soalja,Ahn di man weh kanchroal ih tempa* beta dan wahn man weh kanka wahn siti.
33 Peepl chroa lats,* bot Jehoava da di wan weh mek di disizhan.
Futnoat
^ Er “Wahn persn pripyaa di tingz weh ih tink eena ih haat.”
^ Lit., “Bot di ansa fahn ih tong da fahn Jehoava.”
^ Lit., “pyoar.”
^ Er “ga laayal lov.” Si di Glasari, “Laayal lov.”
^ Dis di rifaa tu sohn stoan weh peepl wuda yooz fi mezha humoch sohnting way.
^ Er “Dan fi shayr richiz weh prowd peepl tek weh fahn adaz.”
^ Er “soal.” Si di Glasari, “Soal.”
^ Er “Ahn bikaaz a ih mowt.”
^ Er “Wahn persn weh plan bad tingz.”
^ Lit., “rool oava ih spirit.”
^ Lit., “chroa lats eena dehn lap.” Si di Glasari, “Lats.”
