Praverbz 17:1-28
17 Ih beta fi mek sombadi eet wahn jrai pees a bred eena wahn hows wehpaat dehn ga pees*Dan fi mek dehn eet eena wahn hows weh ga lata food bot weh peepl di kwaaril.
2 If wahn son ak eena wahn way weh shaymful, wahn waiz slayv wahn rool oava ahn,An ih wahn geh wahn inheritans jos laik di maasta son dehn.
3 Dehn melt silva ahn goal eena faiya soh dat dehn ku bee pyoar,Bot Jehoava ku si weh reeli deh eena peepl haat.
4 Wahn wikid man laik lisn tu di tingz weh peepl seh fi hert adaz,Ahn wahn laiyad persn laik lisn tu lai weh ada peepl seh.
5 Enibadi weh mek fon a wahn poa persn di disrispek Gaad, di wan weh mek ahn,Ahn wahn persn weh injai wach adaz di sofa wahn geh ponish.
6 Granpikni da laik wahn krong tu dehn wan weh oal,Ahn wahn pa* bring aana tu ih pikni dehn.
7 If peepl noh ekspek wahn foolish persn fi seh gud tingz,
Den dehn wers noh wahn ekspek wahn roola fi seh lai.
8 Wahn gif da laik wahn preshos stoan tu di persn weh giv it,An ih ku yooz da gif fi mek evriting weh ih du ton owt gud.
9 Wahn persn shoa lov wen ih fergiv sombadi weh sin,Bot wahn persn ku looz ih fren if ih kip di bring op di mistayk weh ih fren mek.
10 Wahn persn weh ga andastandin wahn laan if yu skoal ahn jos wan taim.Bot eevn if yu beet wahn schupid persn wahn honjrid taimz, ih stil noh wahn laan.
11 Di onli ting weh wahn bad persn waahn du da ribel,Bot wahn kruwil mesinja wahn kohn ponish ahn.
12 Ih beta fi bok op tu wahn byaa weh laas ih baybi dehnDan fi bok op tu wahn schupid persn weh di du foolishnis.
13 If sombadi du sohnting bad tu wahn persn weh mi du sohnting gud fi dehn,Den bad tingz wahn aalwayz hapm tu dehn famili.
14 Wen sombadi staat wahn fait da laik wen waata di rosh owt* fahn sohnweh;Yu fi lef fahn deh bifoa wahn kwaaril staat.
15 Jehoava hayt enibadi weh seh dat wahn wikid persn inosent,An ih hayt enibadi weh seh dat wahn raichos persn gilti.
16 Ih noh mek no sens dat wahn schupid persn ku geh wizdomWen ih noh waahn bee waiz.*
17 Wahn chroo fren shoa lov aal di taim,Ahn hihn da laik wahn breda weh dehdeh fi yu wen yu goh chroo haad taimz.
18 Sombadi weh noh waiz shayk han ahn mek wahn agreementFi pay sombadi els loan rait fronta ih nayba.
19 Wahn persn weh laik kwaaril wahn komit wahn sin,
An enibadi weh laik boas di luk fi chrobl.
20 Wahn persn weh ga wahn wikid haat noh wahn ga sokses,*Ahn wahn persn weh tel lai wahn bring dizaasta pahn ihself.
21 Wahn schupid pikni wahn mek ih pa feel sad,Ahn wahn pikni weh noh ga no sens noh mek ih pa ga jai.
22 Wahn haat weh ful a jai da laik medisn weh heel yu,Bot sadnis mek peepl looz dehn schrent.*
23 Wahn wikid persn aksep wahn braib eena seekrit,Ahn dat da wai peepl noh geh jostis.
24 Wahn persn weh ga andastandin foakos pahn geh wizdom,Bot wahn schupid persn main aalwayz di wanda bowt.
25 Wahn schupid son mek ih pa feel sad, an ih hert ih ma haat.
26 Ih noh gud fi ponish wahn raichos persn,An ih rang fi beet wahn gud persn.
27 Wahn persn weh ga nalij wahn tink gud bifoa ih taak,Ahn wahn man weh ga andastandin wahn kip kaam.
28 Peepl wahn tink dat wahn foolish persn waiz if ih kip kwaiyet,An if ih kip ih mowt shet, dehn wahn tink dat ih ga andastandin.
Futnoat
^ Er “wehpaat ih kwaiyet.”
^ Er “Ahn payrents.”
^ Er “laik wen sombadi let owt waata.”
^ Er “Wen ih noh ga gud sens.”
^ Er “ga notn gud.”
^ Er “sadnis jrai op peepl boan dehn.”
