Praverbz 18:1-24
18 Wahn persn weh stay weh fahn adaz onli di foakos pahn du weh ih waahnt,An ih noh wilin fi aksep* gud advais.
2 Wahn schupid persn noh waahn laan notn fahn ada peepl.Hihn onli waahn taak bowt weh hihn noa.
3 Peepl wahn hayt wahn persn weh ak eena wahn wikid way,Ahn dehn wahn shaym wahn persn weh ak eena wahn shaymful way.
4 Di werdz weh kom owta wahn man mowt da laik deep waata,
Ahn fi hihn wizdom da laik wahn riva weh di floa.
5 Ih noh gud fi chreet wahn wikid persn beta dan adaz,An ih noh gud fi chreet wahn raichos persn eena wahn way weh noh fyaa.
6 Di tingz weh schupid peepl seh staat op wahn kwaaril,Ahn dehn mowt mek ada peepl waahn beet dehn.
7 Di tingz weh wahn schupid persn seh wahn leed ahn tu dizaasta,Ahn di tingz weh ih seh put ih laif* eena daynja.
8 Wahn persn weh laik slanda seh tingz weh da laik nais food.*Peepl swala dehn ahn dehn goh dong eena dehn beli.
9 Enibadi weh layzi ahn noh waahn werk da fren wid sombadi weh laik teef.
10 Jehoava naym da laik wahn schrang towa.
Raichos peepl ron deh ahn dehn geh protekshan.
11 Wahn rich persn tink ih richiz da laik wahn siti weh ga sohn hai waal,An eena ih main dehndeh waal protek ahn.
12 Tingz noh gwehn gud fi wahn prowd persn,Bot wahn hombl persn wahn get aana.
13 Wahn foolish persn ansa widowt lisn,An ih bring shaym pahn ihself.
14 Sombadi weh schrang ku bayr op wen ih sik.Bot yu tink wahn persn ku bayr op wen ih di sofa?
15 Wahn persn weh ga andastandin wahn geh nalij,Ahn wahn waiz persn wahn lisn soh dat ih ku geh nalij.
16 Wen wahn persn gi wahn gif, dat mek ih geh lata apachooniti;Ih geh fi meet impoatant peepl.
17 Di persn weh prizent ih kays fers luk laik ih deh eena di rait,Til di ada persn weh akyooz ahn aks ahn kweschanz fi bring owt di chroot.
18 Peepl chroa lats* fi put wahn en tu wahn aagyumentAhn fi disaid hoo karek wen too impoatant peepl ga wahn prablem.
19 Ih haada fi mek wahn fren weh ofendid bee hapi dan fi kyapcha wahn schrang siti.Ahn wahn kwaaril da laik wahn schrang gayt fi wahn siti.
20 Di tingz weh wahn man seh* da laik food weh ful op ih beli;Weda ih seh gud tingz er bad tingz, ih wahn haftu deel wid di rizolts.
21 Di tingz weh peepl seh ga di powa fi kaaz det ahn fi sayv laif.Peepl weh laik taak haftu aksep wateva hapm sayka di tingz weh dehn seh.
22 Di man weh fain wahn gud waif fain sohnting gud,Ahn Jehoava hapi wid ahn.
23 Di poa man beg di rich man fi help ahn,Bot di rich man ansa ahn eena wahn rof way.
24 Dehn ga frenz weh redi fi hert wan anada,Bot dehn ga wahn fren weh stay kloasa tu yu dan wahn breda.
Futnoat
^ Er “Ahn hihn hayt.”
^ Er “soal.” Si di Glasari, “Soal.”
^ Er “seh tingz weh peepl swala eena wahn greedi way.”
^ Si di Glasari, “Lats.”
^ Er “Di tingz weh kom owta wahn man mowt.”
