Praverbz 19:1-29
19 Ih beta fi bee poa ahn faytful dan fi bee schupid ahn tel laiz.
2 Ih noh gud wen wahn persn* noh ga nalij,Ahn sombadi weh du tingz widowt tink di sin.
3 Wahn man oan foolishnis leed ahn di rang way,Bot eena ih haat, ih geh beks wid Jehoava.
4 Rich peepl ga lata frenz,Bot wen ih kohn tu wahn poa man, eevn ih fren dehn wahn lef ahn.
5 Wahn faals witnis wahn geh ponish,Ahn di persn weh lai evritaim ih oapm ih mowt noh wahn get weh.
6 Lata peepl waahn mek wahn impoatant persn* laik dehn,Ahn wahn persn weh gi lata gif ga lata frenz.
7 If aala wahn poa man breda dehn hayt ahn,Den aala ih fren dehn wahn hayt ahn eevn moa.
Ih kip di aks dehn fi help, bot nobadi noh pay ahn main.
8 Wahn persn weh werk haad fi ga gud sens shoa dat ih lov ih laif.*
Tingz gwehn gud fi sombadi weh cherish andastandin.
9 Wahn faals witnis wahn geh ponish,Ahn di persn weh lai evritaim ih oapm ih mowt wahn ded.
10 Wahn schupid persn noh fi ga richiz;Wers yet, wahn servant noh fi rool oava wahn prins!
11 Wahn man weh ga andastandin noh eezi fi geh beks,Ahn da wahn byootiful ting wen ih fergiv sombadi weh mek wahn mistayk.
12 Wahn king weh beks da laik wahn laiyan* weh di growl,Bot wahn king weh shoa kainis da laik joo pahn di plaants.
13 Wahn schupid son kaaz lata chrobl fi ih pa,Ahn wahn waif weh laik kwaaril* da laik wahn roof weh neva stap leek.
14 Sombadi ku geh wahn hows ahn richiz fahn dehn pa,Bot wahn waiz waif kohn fahn Jehoava.
15 Wahn layzi persn sleep wahn lat,Ahn sombadi* weh layzi op ihself wahn staav.
16 Wahn persn weh fala Gaad komanment wahn kantinyu liv,Ahn wahn persn weh noh kay bowt pleez Gaad wahn ded.
17 Sombadi weh kain tu wahn poa persn di len sohnting tu Jehoava,Ahn hihn wahn pay* dehn bak fi weh dehn du.
18 Karek yu pikni bifoa ih tu layt,Ahn noh mek yoo bee di reezn wai ih ded.
19 Wahn man wid wahn bad tempa wahn geh ponish.If yu noh ponish ahn, ih wahn kantinyu fi du bad tingz.
20 Lisn tu kongsl an aksep karekshan,Soh dat yu ku bee waiz eena di fyoocha.
21 Wahn man ku plan lata tingz eena ih haat,Bot Jehoava perpos wahn aalwayz hapm.
22 Da wahn byootiful ting wen wahn persn shoa lata lov* tu adaz;An ih beta fi bee poa dan fi bee wahn laiyad persn.
23 Wahn persn weh ga lata rispek fi Jehoava wahn liv lang,Ih wahn sleep gud ahn notn bad wahn hapm tu ahn.
24 Wahn layzi persn put ih han eena ih bowl a food,Bot ih noh eevn bada fi bring it op tu ih mowt.
25 Yu fi ponish sombadi weh laik mek fon a adaz, soh dat wahn persn weh noh ga ekspeeryens ku laan fi bee waiz.Ahn yu fi karek wahn persn weh ga andastandin, soh dat ih ku geh moa nalij.
26 Wahn son weh chreet ih pa bad ahn weh chays weh ih maDa wahn son weh bring lata shaym.
27 Mi son, if yu stap aksep karekshan,Yu wahn di ton yu bak pahn wizdom.
28 Wahn wertles witnis hayt eniting weh raichos,Ahn wahn wikid persn injai du eevl tingz di saym way ih injai food.
29 Peepl weh mak adaz wahn geh ponish,Ahn schupid peepl wahn geh wahn gud beetin pahn dehn bak.
Futnoat
^ Er “soal.” Si di Glasari, “Soal.”
^ Er “wahn man weh laik giv.”
^ Er “soal.”
^ Er “wahn yong mayl laiyan.”
^ Er “haras.”
^ Er “wahn soal.”
^ Er “riwaad.”
^ Er “shoa laayal lov.” Si di Glasari, “Laayal lov.”
