Praverbz 20:1-30
20 Wahn persn weh jrink tu moch wain mak ada peepl, ahn wahn persn weh jrink tu moch alkohol staat goh aan wail.Wahn persn weh du sohnting rang sayka weh ih jrink tu moch da wahn fool.
2 Peepl frayd fi wahn king di saym way dehn frayd fi wahn laiyan* weh di growl;Enibadi weh mek ih geh beks put ih oan laif eena daynja.
3 Peepl rispek wahn persn weh noh aagyu wid adaz,Bot wahn foolish persn wahn aalwayz en op eena wahn aagyument.
4 Wahn layzi persn noh wahn plow ih feel eena koal weda.Wen haavis taim kom, ih noh wahn ga notn an ih wahn haftu beg ada peepl.*
5 Di tingz weh wahn man tink eena ih haat da laik deep waata,Bot wahn waiz man noa how fi bring dehn owt.
6 Wahn lata peepl seh dat dehn ga lata lov,Bot hoo ku fain sombadi weh faytful?
7 Wahn raichos persn stay faytful tu Gaad,
An ih pikni dehn* wahn bee hapi.
8 Wen wahn king sidong pan ih chroan fi joj peepl,Ih tek ih taim fi egzamin evriting soh dat ih ku geh rid a eni kaina badnis.
9 Hoo ku seh: “Ah don kleen mi haat,An Ai noh ga nohmoh sin”?
10 Jehoava hayt wahn stoan wayt weh noh ga di karek wayt,An ih hayt wahn mezharin kantayna weh noh gi di karek amonk.
11 Peepl wahn noa weda wahn pikni* du tingz weh kleen ahn rait bai di way how ih bihayv.
12 Jehoava mek wi ayz dehn weh ku hyaa ahn wi aiy dehn weh ku si.
13 Yu noh fi lov sleep, bikaaz yu wahn en op poa.
Oapm yu aiy soh dat yu ku ga lata food fi eet.
14 Wen sombadi di bai sohnting, dehn seh, “Dis noh gud, dis noh gud!”Den dehn waak weh fahn deh, ahn dehn boas bowt how cheep dehn get it fa.
15 Di waiz tingz weh wahn persn sehWert moa dan di lata goal ahn koaral* weh wahn persn gat.
16 If wahn man pramis fi pay aaf wahn loan fi wahn schraynja, den yu fi tek weh da man kloaz.An if ih mi pramis fi pay aaf wahn loan fi wahn farin wuman,* yu mos tek sohnting fan ahn az wahn garantee.
17 Food weh wahn man teef tays gud tu ahn,Bot aftawodz ih mowt wahn ful op a san.
18 Peepl planz gwehn gud wen dehn taak tu wan anada bowt it.Wen yu goh da waar, yu need fi fala waiz dairekshan.
19 Wahn persn weh laik slanda goh bowt di taak bowt ada peepl bizniz;Noh kip kompni wid peepl weh laik gasip.
20 If sombadi wish bad fi ih ma an ih pa,Den dehn lamp wahn owt aaf wen daaknis kom.
21 Eevn wen greedi peepl geh richiz,Dehn noh wahn geh wahn blesin eena di en.
22 Yu noh fi seh: “Ai wahn tek rivenj!”
Wayt pahn Jehoava, ahn hihn wahn sayv yu.
23 Jehoava hayt wahn stoan wayt weh noh ga di karek wayt,An ih noh gud fi yooz wahn skayl weh noh gi di karek wayt.
24 Wahn persn noh noa wich way fi goh,Soh Jehoava shoa ahn di rait way fi goh.
25 If sombadi hori mek wahn pramis tu Gaad bifoa dehn tink bowt weda er nat dehn ku kip da pramis,
Den dehn laif wahn deh eena daynja.
26 Jos laik how peepl separayt di chrash fahn di grayn,Da rait soh wahn waiz king wahn pik owt bad peepl ahn geh rid a dehn.
27 Di tingz weh wahn persn seh da laik wahn lamp tu Jehoava,Dehndeh tingz shoa wat deh deep dong eensaida da persn.
28 Wen wahn king faytful ahn ga lata lov, dat wahn bee wahn protekshan far ahn;Bikaaz ih ga lata lov, ih wahn kip aan di rool.
29 Wahn yong persn schrent wahn bring ahn aana,Ahn di byooti a wahn oal persn da ih gray hyaa.
30 Ponishment help wi fi stap du bad tingz,*Ahn karekshan kleen di badnis fahn owta wi haat.
Futnoat
^ Er “wahn yong mayl laiyan.”
^ Dis ku aalso bee “Hihn wahn luk joorin di haavis, bot ih noh wahn fain notn.”
^ Lit., “son dehn.”
^ Er “bwai.”
^ Si di Glasari, “Koaral.”
^ Er “wahn farina.”
^ Er “Wen sombadi geh hert an ih geh wahn brooz, dat help ahn fi stap du bad tingz.”
