Praverbz 23:1-35
23 Wen yu sidong fi eet fronta wahn king,Wach how yu bihayv.
2 Put wahn naif da yu chroat* if yu greedi fi food.
3 Yu noh fi krayv ih nais food,Soh dat ih noh en op fi bee wahn chrap fi yu.
4 Noh taiyad owt yuself di chrai geh richiz.
Stap du dat, bot insted shoa dat yu ga andastandin.*
5 Wen yu luk pahn dehndeh richiz, dehn noh wahn dehdeh,Bikaaz dehn wahn groa wingz laik wahn eegl ahn flai weh eena di skai.
6 Noh eet food fahn wahn stinji persn,Ahn yu noh fi krayv ih nais food,
7 Bikaaz ih wahn kip chrak a humoch yu eet.
Ih tel yu, “Eet ahn jrink,” bot ih noh meen weh ih seh.*
8 Yu wahn vamit op evriting weh yu mi eet,An aala di nais tingz weh yu mi tel ahn wahn bee fi notn.
9 Noh chrai teech wahn schupid persn,Bikaaz hihn wahn hayt di waiz tingz weh yu tel ahn.
10 Yu noh fi moov sohnting weh yu ansesta dehn mi yooz fi maak aaf wahn lan.Ahn yu noh fi tek weh wahn lan weh bilangz tu wahn pikni weh noh ga no pa,
11 Bikaaz Gaad, di wan weh di protek dehn,* schrang.Hihn wahn tek fi dehn said ahn goh gens yu.
12 Oapm op yu haat fi aksep karekshan,An oapm op yu ayz fi lisn tu waiz werdz.
13 Noh hoal bak fahn disiplin wahn pikni.
If yu lash ahn,* ih noh wahn ded.
14 Yu fi beet ahn wid wahn stik,*Soh dat yu ku sayv ahn* fahn di Grayv.*
15 Mi son, if yu haat geh waiz,Den mai haat wahn bee hapi.
16 Ah wahn feel jai deep eensaida mi* wen yu seh tingz weh rait.
17 Noh mek yu haat waahn du di tingz weh wahn sina du,Bot yu fi ga lata rispek fi Jehoava aal di taim.
18 If yu du dehndeh tingz, yu wahn ga wahn gud fyoochaAhn yu wahn aalwayz ga hoap.
19 Mi son, lisn ahn yu wahn bee waiz.Gaid yu haat eena di rait way.
20 Noh kip kompni wid peepl weh jrink tu moch wainAhn wid peepl weh greedi fi meet,
21 Bikaaz wahn greedi persn ahn wahn persn weh aalwayz geh jronk wahn en op poa,Ahn sayka weh dehn lov sleep, dehn wahn haftu wayr sohn rag laik kloaz.
22 Lisn tu yu pa bikaaz ih gi yu laif,Ahn noh hayt yu ma jos bikaaz ih geh oal.
23 Yu fi bai* chroot, wizdom, karekshan, an andastandin,Ahn yu mos neva sel dehndeh tingz.
24 Wahn pa weh ga wahn raichos son wahn ga lata jai,Ahn wahn pa weh ga wahn waiz son wahn hapi wid ahn.
25 Yu ma ahn yu pa wahn ga lata jai, ahn yu ma wahn bee hapi.
26 Mi son, pleez lisn tu mi wid yu hoal haat,Ahn bee hapi wen yu fala di tingz weh Ah du.
27 Wahn prastichoot da laik wahn deep hoal,Ahn wahn imoaral* wuman da laik wahn naro wel.
28 Shee haid ahn wayt laik wahn teef,Ahn shee mek wahn lata man stap bee faytful.
29 Hoo ga prablemz? Hoo di wori?
Hoo di kwaaril? Hoo di komplayn?
Hoo geh hert fi no reezn? Ahn fi hoo aiy luk glaasi?*
30 Dehn wan weh aalwayz di luk fi wain,Ahn dehn wan weh aalwayz di luk fi schrang wain.*
31 Noh luk pahn how red di wain luk ahn how ih shain eena di kopAhn how ih goh dong smood wen yu jrink it,
32 Bikaaz eena di en, da wain wahn bait yu laik wahn snayk.An ih wahn let goh ih paizn jos laik wahn paiznos snayk.
33 Yu aiy dehn wahn si tingz weh noh mek no sens,Ahn yu haat wahn lai tu yu.
34 Ahn yu wahn bee laik sombadi weh di lidong eena di midl a di see,Laik sombadi weh di lidong pahn di haiyis paat a di ship.
35 Yu wahn seh: “Dehn mi nak mi, bot Ah neva feel it.*
Dehn mi beet mi, bot Ah neva eevn noa.
Wen Ah wahn wayk op soh Ah ku tek wahn nada jrink?”*
Futnoat
^ Er “Kanchroal yuself.”
^ Dis ku aalso bee “Stap pen pahn yu oan andastandin.”
^ Lit., “ih haat noh deh wid yu.”
^ Er “di wan weh bai dehn bak.”
^ Lit., “beet ahn wid wahn stik.”
^ Er “rad.” Dis werd di rifaa tu wen yu di karek sombadi er wen yu ga atariti oava dehn.
^ Er “ih soal.” Si di Glasari, “Soal.”
^ Er “Sheeyol,” weh da di Grayv. Si di Glasari, “Grayv.”
^ Er “deep eensaida mi kidni dehn.”
^ Er “geh.”
^ Si di futnoat da Praverbz 2:16.
^ Er “dol.”
^ Er “weh get tugeda fi tays schrang wain.”
^ Er “Ah neva feel no payn.”
^ Er “soh Ah ku luk far it agen.”
