Praverbz 26:1-28
26 Jos laik how ih noh fi snoa joorin soma taim, an ih noh fi rayn joorin haavis taim,Da rait soh wahn schupid persn noh fi geh aana.
2 Jos laik how wahn berd ahn wahn swalo noh flai weh fi noa reezn,Da rait soh wahn persn noh kers* adaz fi no reezn.*
3 Wahn wip da fi wahn haas, wahn braidl da fi wahn dongki,Ahn wahn stik da fi wahn schupid persn bak.
4 Noh ansa wahn schupid persn wen ih seh foolish tingz,Soh dat yu noh put yuself pan ih levl.*
5 If yu ansa wahn schupid persn, shoa ahn dat weh ih seh noh mek no sens,Soh dat ih noh tink dat ih waiz.
6 Wahn persn weh chros sombadi weh schupid fi du sohnting far ahnDa laik wahn persn weh hert ih oanself ahn kripl ih fut dehn.
7 Jos laik how wahn kripl persn kyaahn yooz ih fut dehn,Da rait soh wahn schupid persn kyaahn yooz di gud advais weh ih geh fahn ada peepl.
8 Jos laik how ih noh mek sens fi tai wahn stoan tu wahn sling shat,Da rait soh ih noh mek sens fi mek wahn schupid persn geh prayz.
9 Jos laik how ih daynjaros fi mek wahn jronkad hoal wahn prikl bush eena ih han,Da rait soh waiz werdz weh kom owta wahn schupid persn mowt ku hert adaz.
10 Sombadi weh haiya wahn schupid persn er jos enibadi weh di waak paasDa laik sombadi weh shoot op ih aro dehn aata eniting an evriting, an ih en op di hert sombadi.
11 Wahn schupid persn weh kantinyu du foolish tingzDa laik wahn daag weh goh bak goh eet ih oan vamit.
12 Sohn peepl tink dehn waiz,
Bot ih eeziya fi help sombadi weh schupid dan fi help peepl laik dat.
13 Di layzi persn seh: “Wahn yong laiyan deh pahn di road,Wahn laiyan deh midl a di schreet!”
14 Jos laik how wahn doa swing bak ahn foat wen yu oapm ahn kloaz it,Da rait soh wahn layzi persn stay di ton eena ih bed.
15 Wahn layzi persn put ih han eena ih bowl a food,Bot ih ak laik ih tu taiyad fi bring it op tu ih mowt.
16 Wahn layzi persn tink dat ih waizaDan sevn peepl weh gi wahn waiz ansa.
17 Wahn persn weh di paas bai ahn si ada peepl di kwaaril ahn geh beks, eevn doa da non a ih bizniz,Da laik sombadi weh grab wahn daag bai ih ayz.
18 Wahn krayzi persn wuda shoot op sohn aro weh ga faiya ahn sohn spyaa weh ku kil peepl.
19 Ahn wahn persn weh chrik ih nayba an tel ahn, “Ah onli mi-di joak!” jos az bad az da krayzi persn.
20 Wahn faiya owt aaf wen nohmoh wud deh fi bon.Ahn peepl noh wahn kwaaril wen nobadi dehdeh fi slanda adaz.
21 Jos laik how chaakoal ahn wud staat op wahn faiya,Da rait soh wahn persn weh laik aagyu laik staat kwaaril wid adaz.
22 Wahn persn weh laik slanda seh tingz weh da laik nais food.*Peepl swala dehn ahn dehn goh dong eena dehn beli.
23 Kain werdz fahn sombadi weh du wikid tingzDa jos laik wahn pees a klay pat weh kova wid silva.
24 Wahn persn weh hayt adaz seh tingz fi haid dat ih hayt dehn,Bot eena ih haat, ih noa dat ih di chrik dehn.
25 Eevn doa ih seh kain werdz, noh chros ahn,Bikaaz sevn wikid tingz deh eena ih haat.*
26 Eevn doa ih chrik adaz fi haid ih haychrid,Evribadi wahn stil geh fi noa bowt di wikid tingz weh ih du.
27 Enibadi weh dig wahn hoal wahn jrap eena da saym hoal,An enibadi weh roal weh wahn stoan wahn geh mash bai da saym stoan.
28 Wahn persn weh laik lai hayt di saym wan weh ih hert,Ahn wahn persn weh yooz sweet werdz bring dizaasta pahn adaz.
Futnoat
^ Si di Glasari, “Kers.”
^ Dis ku aalso bee “wahn persn noh kers adaz if dehn noh dizerv it.”
^ Er “Soh dat yu noh goh aan laik ahn.”
^ Er “seh tingz weh peepl swala eena wahn greedi way.”
^ Er “Bikaaz ih ga wahn wikid haat.”
