Praverbz 27:1-27
27 Noh boas bowt weh yu wahn du tumaaro,Bikaaz nobadi noh noa weh wahn hapm tumaaro.
2 Mek sombadi els* prayz yu, ahn noh seh tingz fi prayz yuself.Yu noh fi du dat, bot yu fi mek adaz* du dat.
3 Wahn stoan hevi ahn san hevi tu,Bot di prablemz weh wahn foolish persn kaaz heviya dan dehndeh too tingz.
4 Wahn bad tempa kruwil an anga da laik wahn flod,Bot jelosi wers dan dehndeh tingz.
5 Ih beta fi mek sohnbadi karek yu dan fi mek sohnbadi lov yu ahn noh shoa it.
6 Ih beta fi geh kongsl fahn wahn gud fren, eevn doa ih mait hert yu,Dan fi geh wahn lata kis fahn yu enimi.*
7 Wen sohnbadi* ful, dehn noh waahn eet honi.Bot if wahn persn hongri bad ahn dehn giv ahn sohnting bita fi eet, ih wahn stil tays sweet tu ahn.
8 Wahn man weh stay weh fahn di plays wehpaat ih livDa laik wahn berd weh stay weh fahn ih nes.
9 Jos laik how ail an insens mek yu haat hapi,Da rait soh kongsl fahn wahn kloas fren mek yu haat hapi tu.
10 Noh abandan yu fren ner yu pa fren, ahn noh goh da yu faamli hows wen yu di goh chroo haad taimz.Ih beta fi goh da yu nayba hows dan fi goh da yu faamli weh liv faar fahn yu.
11 Mi son, bee waiz ahn mek mi haat hapi,Soh dat Ah ku ansa bak di wan weh seh bad tingz bowt mee.*
12 Wen wahn waiz persn si sohnting weh daynjaros, ih stay weh fan it.Bot di persn weh noh ga ekspeeryens put ihself eena daynja, an ih sofa sayka dat.
13 If wahn man pramis fi pay aaf wahn loan fi wahn schraynja, den yu fi tek weh da man kloaz.An if ih mi pramis fi pay aaf wahn loan fi wahn farin wuman,* yu mos tek sohnting fan ahn az wahn garantee.
14 Wen sombadi hayl* dehn nayba erli da maanin wid wahn lowd vais,Dehn nayba wahn see’t az sohnting bad.*
15 Wahn waif weh laik kwaaril* da laik wahn roof weh noh stap leek pahn wahn rayni day.
16 Enibadi weh ku kanchroal shee ku kanchroal di breez,Ahn dehn ku hoal ail eena dehn rait han.
17 Jos laik how aiyan shaapm aiyan,Da rait soh wahn persn help ih fren fi du beta.*
18 Wahn persn weh tek kayr a ih fig chree wahn eet di froot weh ih bayr.Ahn wahn persn weh tek kayr a ih maasta wahn geh aana.
19 Jos laik how yu ku si yu fays wen yu luk pahn waata,Da rait soh yu ku si yuself wen yu luk pahn ada peepl.
20 Jos laik how di plays wehpaat ded peepl badi ratn weh ahn di Grayv* neva geh satisfai,Da rait soh wahn persn wahn neva satisfai wid weh ih gat .
21 Jos laik how dehn melt silva ahn goal eena faiya soh dat dehn ku bee pyoar,Da rait soh wahn persn geh tes wen peepl prayz ahn.*
22 Eevn if yu beet wahn foolish persnLaik if yu di beet grayn eena wahn maata,Ih stil noh wahn chaynj.
23 Yu fi tek kayr a* yu sheep dehn,
Ahn yu fi aalwayz noa how dehn di du,
24 Bikaaz richiz noh wahn laas fareva,Ahn yu disendant dehn noh wahn rool az king fareva needa.
25 Di green graas disapyaa, ahn nyoo graas groa,Ahn peepl gyada evriting weh groa pahn di mongtin dehn fi feed dehn animalz.
26 Yu ku yooz di wul fahn di yong mayl sheep dehn fi mek kloaz,Ahn yu ku sel yu mayl goat dehn fi bai wahn feel.
27 An inof goat milk wahn deh fi yoo, yu famili,Ahn fi yu yong feemayl servant dehn.
Futnoat
^ Lit., “wahn schraynja.”
^ Lit., “wahn farina.”
^ Dis ku aalso bee “Dan fi geh wahn lata kis weh yu enimi neva reeli waahn gi yu.”
^ Er “Wen wahn soal.” Si di Glasari, “Soal.”
^ Er “weh taak gens mi.”
^ Er “wahn farina.”
^ Lit., “bles.”
^ Lit., “wahn kers.”
^ Er “weh laik komplayn.”
^ Lit., “shaapm di fays a ih fren.”
^ Er “Sheeyol,” weh da di Grayv. Si di Glasari, “Grayv.”
^ Er “Da rait soh di prayz weh wahn persn get shoa weh kaina persn hihn.”
^ Er “Yu fi pay atenshan tu.”
