Praverbz 30:1-33
30 Dis da di seeryos mesij weh Ayger, hoo da-mi Jaykeh son, mi tel Itiyel ahn Yookal:
2 Peepl noa moa tingz dan mee,An Ai noh ga andastandin laik weh ada peepl gat.
3 Ah noh laan how fi bee waiz,An Ah noh ga di nalij weh Gaad, di Hoali Wan, gat.
4 Hoo gaahn da hevn ahn kohn bak?
Hoo hoal di breez eena ih too han?
Hoo rap op waata eena ih kloaz?
Ahn hoo set op* eech kaana a di ert?
If yu noa da hoo, den wat da ih naym an ih son naym?
5 Aala Gaad werdz pyoar.
Ahn hihn da wahn sheel tu dehn wan weh ron tu ahn fi protekshan.
6 Noh ad notn tu weh hihn seh,Adawaiz ih wahn karek yuAhn proov dat yu laiyad.
7 Oa Gaad, Ah di aks yu fi too tingz.
Pleez du weh Ah aks yu fi du bifoa Ah ded.
8 Help mi fi bee aanis ahn fi noh tel lai.
Noh mek Ah bee poa ahn noh mek Ah bee rich needa.
Jos mek Ah ga inof food fi eet,
9 Bikaaz if Ah geh evriting weh Ah waahn, Ah mait stap bee faytful tu yu an aks, “Hoo da Jehoava?”
Ahn noh mek Ah geh soh poa dat Ah staat teef ahn bring shaym pahn* yu naym, Oa Gaad.
10 Noh slanda wahn servant fronta ih maasta,Adawaiz ih mait insolt* yu ahn peepl wahn seh dat yu gilti.
11 Dehn ga wahn jenarayshan weh insolt* dehn paAhn weh noh bles dehn ma.
12 Dehn ga wahn jenarayshan weh tink dat dehn pyoar,Bot dehn doti ahn dehn noh mek dehnself kleen.
13 Dehn ga wahn jenarayshan weh prowd ahn weh luk dong pahn adaz.
14 Dehn ga wahn jenarayshan weh ga teet laik soad ahn jaa laik naif;Dehn kruwil ahn dehn chaans op poa peepl ahn peepl weh noh impoatant.
15 Di leech dehn ga too daata weh baal owt ahn seh,
“Ah waahn moa! Ah waahn moa!”Dehn ga chree tingz weh neva geh satisfai ahn foa tingz weh neva seh, “Inof!”
16 Dehndeh tingz da di Grayv,* wahn laydi weh kyaahn ga baybi,Wahn lan weh noh ga waata, ahn faiya weh neva seh, “Inof!”
17 Dis da weh wahn hapm tu wahn persn weh mek fon a ih pa ahn weh noh obay ih ma:Di rayven dehn fahn di vali* wahn dig owt ih aiy dehn,Ahn di yong eegl dehn wahn eet dehn op.
18 Dehnya da chree tingz weh soh wandaful;Foa tingz weh Ah noh andastan:
19 How wahn eegl flai eena di skai,How wahn snayk klaim pahn wahn rak,How wahn ship sayl pahn di see,Ahn how wahn man ak wen ih deh wid wahn yong laydi.
20 Dis da how wahn waif weh noh faytful ak:
Shee eet, ahn shee waip ih mowt;Den ih seh, “Ah noh du notn rang.”
21 Dehnya da chree tingz weh mek di ert chrimblAhn foa tingz weh peepl kyaahn bayr:
22 Wen wahn slayv rool az king,Wen wahn foolish persn greedi op ih food,
23 Wen wahn man marid wahn laydi weh nobadi laik,*Ahn wen wahn feemayl servant tek di plays a di laydi weh ih werk fa.
24 Dehnya da foa tingz pahn di ert weh veri smaal,Bot dehn waiz bai naycha:*
25 Di aants dehn noh schrang,Bot dehn stil put op dehn food joorin soma taim.
26 Di rak baja* dehn noh veri schrang,Bot dehn stil mek dehn hows eena di rak dehn.
27 Di loakos dehn noh ga no king,Bot dehn stil moov tugeda laik sohn soalja eena wahn aami.*
28 Di geko grab aan tu tingz wid ih fut dehn,An ih goh eena di king palis.
29 Dehnya da chree tingz weh moov eena wahn amayzin wayAhn foa tingz weh amayzin fi wach.
30 Di laiyan weh schranga dan di ada animal dehnAhn weh noh ron weh fahn notn;
31 Wahn hontin daag,* wahn mayl goat,Ahn wahn king weh ga ih aami.
32 If yu prayz yuself laik wahn foolish persnEr if yu di plan fi du dat,Den kloaz yu mowt ahn kip kwaiyet.
33 Bikaaz jos laik wen yu ster milk, yu geh bota,Ahn wen yu skweez sombadi noaz, ih bleed,Da rait soh peepl weh geh beks staat kwaaril.
Futnoat
^ Lit., “rayz.”
^ Er “An atak.”
^ Er “kers.” Si di Glasari, “Kers.”
^ Er “kers.”
^ Er “Sheeyol,” weh da di Grayv. Si di Glasari, “Grayv.”
^ Er “wadi.” Si di Glasari, “Wadi.”
^ Er “lov.”
^ Er “dehn veri waiz.”
^ Dis da wahn animal weh luk laik wahn big rat, bot ih noh ga wahn tayl. An ih liv eena wahn plays weh ga lata rak.
^ Er “stil moov tugeda eena groops.”
^ Er “ wahn grayhong.”
