Praverbz 31:1-31
31 Dis da sohn gud advais weh King Lemyuwel ma mi giv ahn, an hihn mi ripeet dehn wen ih mi seh:
2 Oa mi son, weh Ai ku teech yu?Oa mi son weh baan fahn mi woom, weh Ah ku tel yu?An Oa mi son weh Ah mi get sayka di vow dehn weh Ah mi mek, weh Ah ku seh tu yu?
3 Noh ways yu schrent pahn laydi,Ahn noh liv eena wahn way weh ku bring dizaasta tu wahn king.
4 Oa Lemyuwel, wahn king noh fi liv laik dis,Wahn king noh fi jrink wain.Wahn roola noh fi seh, “Wehpaat mai kop a wain deh?”
5 Bikaaz wen ih jrink ih ferget weh di laa sehAn ih noh rispek di raits a di poa peepl.
6 Giv alkohol tu dehn wan weh wahn soon dedAhn wain tu dehn wan weh sad ahn weh di sofa.
7 Mek dehn jrink ahn ferget dat dehn poa,Mek dehn ferget bowt aala dehn prablemz.
8 Taak op fi dehn wan weh kyaahn taak;Fait fi di raits a evribadi weh wahn soon ded.
9 Taak op ahn joj eena wahn raichos way;Fait fi di raits a poa peepl ahn fi peepl weh adaz noh si az impoatant.
א [Aleph]*
10 Ih haad fi fain wahn gud waif.
Shee wert wahn lat moa dan koaral.*
ב [Beth]
11 Fi shee hozban reeli chros ahn,Ahn hihn gat evriting weh ih need.
12 Shee chreet ahn gud evri day a fi shee laif;Ih noh chreet ahn bad.
ד [Daleth]
13 Shee bai wul ahn linen,Ahn fi shee han dehn wilin fi werk.
ה [He]
14 Shee da laik di ship weh wahn bizniz man oan,Shee goh faar fi bring food.
ו [Waw]
15 Shee get op erli da maanin wail ih stil daakFi mek food fi ih famili,An ih giv ih feemayl servants fi dehn shayr.
ז [Zayin]
16 Shee si wahn pees a lan an ih disaid fi bai it.Ahn shee pay sombadi wid di moni weh shee werk haad fa soh dat dehn ku plaant wahn grayp aachad far ahn.
ח [Heth]
17 Shee redi fi werk haad,An ih mek shoar dat ih han dehn schrang.
ט [Teth]
18 Shee si dat ih mek moni wen ih du bizniz wid peepl,Ahn shee kantinyu werk til layt da nait.*
י [Yod]
19 Shee tek owt ih toolzAn ih mek di chred weh ih wahn yooz.*
כ [Kaph]
20 Shee help owt di peepl weh noh ga di tingz weh dehn need,Ahn shee aalwayz wilin fi gi tingz tu poa peepl.
ל [Lamed]
21 Shee noh wori bowt ih famili wen ih snoa,Bikaaz fi shee hoal famili ga waam kloaz fi wayr.
מ [Mem]
22 Shee mek ih oan sheet fi ih bed,
Ahn fi shee kloaz mek owta linen ahn perpl wul.
נ [Nun]
23 Evribadi noa fi shee hozbanWen hihn goh sidong monks di eldaz* da di siti gayt.
ס [Samekh]
24 Shee mek kloaz* owta linen an ih sel dehn,Ahn da shee mek di belt dehn fi gi di bizniz man dehn.
ע [Ayin]
25 Shee brayv ahn lata peepl rispek ahn,Ahn shee noh frayd fi weh wahn hapm eena di fyoocha.
פ [Pe]
26 Wen shee oapm ih mowt, shee seh waiz tingz;Shee taak eena wahn kain way wen ih teech adaz.*
צ [Tsade]
27 Shee pay atenshan tu weh di hapm eena ih hows,Ahn shee noh layzi non ataal.
ק [Qoph]
28 Fi shee pikni dehn stan op ahn komen ahn,Ahn fi shee hozban stan op ahn prayz ahn.
ר [Resh]
29 Hihn tel ahn: “Dehn ga lata laydi weh gud,Bot yoo beta dan aala dehn.”
ש [Shin]
30 Sombadi ku luk laik dehn da wahn nais persn, bot dat mait noh bee chroo, ahn sombadi ku bee byootiful, bot dat wahn fayd weh.Bot if wahn wuman ga lata rispek fi Jehoava, shee wahn geh prayz.
ת [Taw]
31 Giv ahn wahn riwaad fi evriting weh ih du,Ahn shee dizerv fi mek dehn prayz ahn da di siti gayt, bikaaz a aala di haad werk weh ih du.
Futnoat
^ Dis da di fers leta a di Heebroo alfabet. Si di Glasari, “Akrostik stail.”
^ Si di Glasari, “Koaral.”
^ Lit., “fi shee lamp noh owt aaf da nait.”
^ Wahn distaff ahn wahn spindle da too stik weh peepl mi spin fi mek tingz laik chred ahn schring.
^ Si di Glasari, “Elda.”
^ Er “mek sohn anda kloaz.”
^ Lit., “Di laa a laayal lov deh pan ih tong.”
