Praverbz 7:1-27
7 Mi son, du di tingz weh Ah tel yu,Ahn cherish mi komanment dehn.
2 Obay mi komanment dehn, ahn yu wahn kantinyu liv.Protek di tingz* weh Ah teech yu laik yu di protek yu aiy.
3 Tai dehn rong yu finga, ahn rait dehn pahn yu haat.
4 Tel wizdom, “Yoo da mi sista,”
Ahn tel andastandin, “Yoo da mi famili.”
5 Wizdom an andastandin wahn protek yuFahn di imoaral* laydi weh laik sweet taak peepl.
6 Ah mi luk chroo di windo, an Ah mi luk dong.
7 An az Ah mi-di luk pahn sohn yong peepl weh neva ga no ekspeeryens,Ah noatis wahn yong man weh neva ga no sens.
8 Hihn mi paas kloas tu di kaana a wahn schreet wehpaat wahn imoaral laydi mi liv,An ih mi staat waak tuwaadz ih hows.
9 Dat da-mi joorin di eevnin, rait afta di son gaahn dong,Wen nait mi-di set een, an ih mi-di geh daak.
10 Ah mi si wahn laydi weh mi jres laik wahn prastichoot* gaahn meet ahn.Shee mi luk laik wahn veri chriki laydi.
11 Shee lowd an ih taak wahn lat an ih noh lisn tu nobadi.
Shee neva deh hoam.*
12 Wan minit shee deh owtsaid, di neks minit shee deh wehpaat lata peepl deh.Ahn shee wayt da evri schreet kaana.
13 Shee mi grab di yong man ahn kis ahn.Shee mi taak eena wahn kanfident way, an ih neva shaym wen ih tel ahn:
14 “Ah mi haftu aafa op sohn pees sakrifais.*
Tudeh Ah mi pay mi vow dehn.
15 Dat da wai Ah kom owt ya fi meet yu,Fi luk fi yu, an Ah fain yu!
16 Ah kova mi bed wid kalaful linen fahn Eejip.
17 Ah sprinkl mi bed wid sohn mer,* aloaz,* ahn sinamon.
18 Mek wi jrink fahn di kop a lov til maanin.Mek wi injai di plezha weh kohn fahn lov,
19 Bikaaz mi hozban noh deh hoam.Hihn gaahn pahn wahn chrip faar fahn ya.
20 Hihn kehr wahn bag a moni wid ahn,Ahn hihn noh wahn kohn bak til layta eena di mont.”
21 Shee tel di yong man lata lai, an ih kanvins ahn.
Shee temp ahn wid sweet werdz.
22 Den rait away hihn staat tu fala ahn, laik how wahn bul fala di persn weh wahn kil ahn,Laik wahn fool weh goh fi mek peepl chayn ahn op az ih ponishment,
23 Til wahn aro goh rait eena ih liva.Hihn da laik wahn berd weh flai eena wahn chrap, an ih noh noa dat ih wahn kaas ahn ih laif.*
24 Ahn now, mi son dehn, lisn tu mi.Pay atenshan tu di tingz weh Ah di tel unu.
25 Noh mek dis laydi temp unu haat.
Noh schray weh ahn staat waak pahn fi shee road.
26 Shee don mek wahn lata peepl ded,Ahn di amonk a peepl weh shee kil da wahn lat.
27 Fi shee hows goh dong tu di Grayv.*Ih goh dong tu di plays wehpaat ded peepl deh.
Futnoat
^ Er “laa.”
^ Si di futnoat da Praverbz 2:16.
^ Er “weh mi-di wayr kloaz weh wahn prastichoot wayr.”
^ Lit., “Fi shee fut dehn neva stay da ih hows.”
^ Lit., “sohn kamyoonyan sakrifais.” Si di Glasari, “Pees sakrifais.”
^ Si di Glasari, “Mer.”
^ Dis da di naym a wahn chree. Peepl yoostu yooz da chree fi mek perfyoom bak eena Baibl taimz.
^ Er “soal.” Si di Glasari, “Soal.”
^ Er “Sheeyol,” weh da di Grayv. Si di Glasari, “Grayv.”
