Praverbz 9:1-18
9 Chroo wizdom da laik wahn persn weh bil ih howsAhn weh set op* sevn poas far it.
2 Ih don kil wahn animal fi geh meet.Ih don miks ih wain an ih don set ih taybl.
3 Ih sen ih feemayl servant dehnDa sohn hai plays eena di siti fi hala owt ahn seh:
4 “Mek enibadi weh noh ga no ekspeeryens kohn ya.”
Dis da weh shee tel di persn weh noh ga no sens:
5 “Kom an eet di bred weh Ah mek,Ahn jrink som a di wain weh Ah miks.
6 Stap bee foolish* soh dat yu ku liv,Ahn waak pahn di road weh shoa dat yu ga andastandin.”
7 Wahn persn weh karek sohnbadi weh mek fon a adaz wahn geh shaym.An enibadi weh karek wahn wikid persn wahn geh hert.
8 Noh karek wahn persn weh laik mek fon a ada peepl, er els ih wahn hayt yu.
Karek wahn persn weh waiz, an ih wahn lov yu.
9 Teech wahn persn weh waiz, an ih wahn geh waiza.
Teech sohnbadi weh raichos, ahn dehn wahn laan moa tingz.
10 Yu wahn staat fi bee waiz wen yu ga lata rispek fi Jehoava.An if yu geh fi noa Gaad, hoo da di Hoali Wan, yu wahn geh nalij.
11 Sayka mee, yu wahn liv wahn lang laif,Ahn yu wahn ga moa yaaz fi liv.
12 If yu waiz, ih wahn bee fi yu oan gud.Bot if yu mek fon a ada peepl, onli yoo wahn sofa.
13 Wahn schupid laydi ga wahn big mowt.
Shee simpl an ih noh noa notn.
14 Shee sidong pahn wahn chyaa weh deh fronta ih howsDa wahn ayrya weh deh hai eena di siti.
15 Dis da weh shee di hala owt tu peepl weh di paas,Tu dehn wan weh di main dehn oan bizniz:
16 “Mek enibadi weh noh ga no ekspeeryens kohn ya.”
Dis da weh shee tel di persn weh noh ga no sens:
17 “Waata weh yu teef tays sweet,Ahn food weh yu eet eena seekrit tays nais.”
18 Bot dehn noh noa dat da laydi hows ful op a ded peepl,Dat di peepl weh shee invait da fi shee hows deh eena di Grayv.*
Futnoat
^ Er “An ih kaav owt.”
^ Er “Stap fala dehn wan weh noh ga ekspeeryens.”
^ Er “Sheeyol,” weh da di Grayv. Si di Glasari, “Grayv.”
