Revilayshan 1:1-20
1 Dis da wahn revilayshan weh Gaad mi giv Jeezas Krais fi giv tu Jan. Jeezas mi geh dis revilayshan fi mek ih ku shoa ih slayv dehn di tingz weh wahn soon hapm. Soh Jeezas sen fi hihn aynjel fi shoa ih slayv Jan sohn vizhan a di tingz weh wahn hapm eena di fyoocha.
2 Ahn Jan ku seh egzakli weh Gaad mi tel ahn, an weh Jeezas Krais mi tel ahn. Hihn gi wahn witnis bowt aala di tingz weh ih mi si.
3 Di persn weh reed dis prafesi owt lowd ahn di wan dehn weh lisn an obay dehnya tingz wahn bee hapi, kaaz di set taim fi mek dehnya tingz hapm deh kloas.
4 Dis da Jan, ahn dis da weh Ah di rait tu di sevn kangrigayshan eena di dischrik a Aysha:
Ah pray dat di “Gaad weh egzis now ahn weh mi egzis bifoa ahn weh di kohn,” ahn di sevn spirit weh deh fronta fi hihn chroan, giv unu fi dehn grayt kainis* ahn pees.
5 An Ah pray dat Jeezas Krais, “di Faytful Witnis,” “di fersbaan fahn di ded,” ahn “di Roola a di king dehn a di ert,” giv unu fi hihn grayt kainis ahn pees tu.
Hihn lov wi ahn da hihn free wi fahn wi sin dehn wid ih oan blod.
6 Ih mek wi bee king ahn prees fi serv fi hihn Gaad ahn Faada, ahn fi hihn gloari ahn powa wahn laas fareva. Aymen.
7 Hihn wahn kohn wid di klowd dehn, an evribadi wahn si ahn, eevn di wan dehn weh mi boar ahn wid wahn spyaa. Ahn sayka hihn, peepl fahn evri chraib wahn beet dehn ches fi shoa dat dehn di moan. Yes, dis wahn definaytli hapm. Aymen.
8 Dis da weh Jehoava Gaad seh: “Ai da di Alfa ahn di Omayga.* Ai egzis now an Ah mi egzis bifoa an Ah wahn kohn. Ai da di Almaiti Gaad.”
9 Ai da Jan, fi unu brada, ahn jos laik unu, Ah di fays persikyooshan.* Ahn jos laik unu, Ah wahn geh fi bee paat a di Kingdom, an Ah di bayr op lata difrent tingz fi weh Ai di fala Jeezas. Ah deh pahn di ailan weh naym Patmos bikaaz Ah mi-di taak bowt Gaad ahn di chroot bowt Jeezas.
10 Ahn chroo di hoali spirit, Ah fain miself eena di Laad day. Ah hyaa sombadi baka mi di taak wid wahn lowd vais, an ih mi song laik wahn chrompit;
11 ih tel mi: “Weh yu si, rait it dong eena wahn skroal ahn sen it tu di sevn kangrigayshan dehn: da Efisos, da Smerna, da Pergamom, da Taiyataira, da Sardis, da Filadelfya, ahn da Layodiseeya.”
12 Soh Ah ton rong fi si da hoo di taak tu mi, ahn wen Ah ton rong, Ah mi si sevn lampstan weh mek owta goal.
13 An Ah si sombadi laik wahn son a man di stan op monks aala di lampstan dehn, an ih mi gat aan wahn lang roab weh mi reech aal di way dong tu ih fut dehn, an ih mi-di wayr wahn sash weh mek owta goal rong ih ches.
14 Moroava, di hyaa pan ih hed mi wait wait laik snoa, an ih aiy dehn mi luk laik dehn mi deh pahn faiya.
15 Ih fut dehn mi-di shain laik pyoar kapa weh melt eena di faiya, an ih vais mi lowd, laik di song a wahn big waatafaal.
16 An ih mi ga sevn staar eena ih rait han, ahn wahn lang soad weh mi shaapm pahn di too said mi-di stik owta ih mowt, an ih fays mi az brait az di son rong mid-day.
17 Wel, wen Ah si ahn, Ah jrap pahn di grong bai ih fut laik if Ah mi ded.
An ih put ih rait han pahn mi ahn tel mi: “Noh bee frayd. Ai da di Fers ahn di Laas,
18 ahn di livin wan, an Ah mi ded, bot now Ai alaiv an Ah wahn liv fareva an eva, an Ai ga di kee dehn weh ku oapm di doa fi det ahn di Grayv.*
19 Soh rait dong di tingz weh yu mi si, ahn di tingz weh di hapm now, ahn di tingz weh wahn hapm layta.
20 Now, di sevn staar weh yu mi si eena mi rait han, ahn di sevn lampstan weh mek owta goal, da wahn hoali seekrit, ahn dis da weh dehn meen: Di sevn staar dehn stan fi di aynjel dehn weh deh eena di sevn kangrigayshan, ahn di sevn lampstan stan fi di sevn kangrigayshan.
Futnoat
^ Si di Glasari, “Grayt kainis.”
^ Er “di A ahn di Z.” Alfa da di fers leta eena di Greek alfabet, an Omayga da di laas leta.
^ Er “fays chribyulayshan.”
^ Er “ahn Haydeez,” weh da di grayv. Si di Glasari, “Grayv.”
