Revilayshan 11:1-19
11 Den dehn gi mi wahn stik weh dehn yooz fi mezha, ahn wahn vais tel mi: “Get op ahn goh mezha Gaad templ ahn di alta ahn konk aala di peepl weh di wership eena di templ.
2 Bot noh mezha di koatyaad a di templ, kaaz Gaad don giv it tu di peepl a di nayshan dehn. Ahn dehn wahn stamp dong di hoali siti wid dehn fut fi 42 monts.
3 Ah wahn sen mi too witnis jres eena sak klaat* fi prafesai fi 1,260 dayz.”
4 Ahn di too aliv chree ahn di too lampstan stan fi di too witnis weh di stan op fronta di Laad a di ert.
5 If enibadi waahn hert di too witnis dehn, faiya wahn kom owta dehn mowt ahn bon op da persn. If enibadi waahn hert dehn, den dat da how ih wahn geh kil.
6 Dehn ga di powa fi stap di rayn eena di skai* soh dat ih noh rayn joorin di dayz wen dehn prafesai. Ahn dehn ga di powa fi ton waata intu blod ahn fi mek aal kaina bad tingz hapm pahn di ert weneva dehn waahn.
7 Ahn wen dehn finish di werk fi prafesai, di wail bees weh kom owta di abis wahn waar gens dehn ahn win, an ih wahn kil dehn.
8 Ahn dehn ded badi wahn lef pahn di mayn schreet a di grayt siti wehpaat di peepl mi kil dehn Laad pahn di stayk. Sadam an Eejip reprizent dis siti.
9 Ahn wahn lata peepl fahn difrent rays, ahn chraib, ahn langwij, ahn nayshanz wahn stay di luk pahn di ded badi dehn fi chree an a haaf dayz. Bot joorin da taim deh, dehn noh wahn alow nobadi fi beri dehn.
10 Ahn di peepl pahn di ert wahn rijais ahn selibrayt op, ahn dehn wahn gi wan anada gifs bikaaz di too prafit ded. Dehn du dis bikaaz di too prafit yoostu taament dehn.
11 Bot afta di chree an a haaf dayz, Gaad bloa di bret a laif intu dehn ahn dehn kohn bak tu laif. Evribadi weh si dehn geh fraitn bad.
12 Den di too prafit hyaa wahn lowd vais fahn hevn weh tel dehn: “Unu kom op ya.” Ahn dehn gaan op da hevn eena wahn klowd, ahn dehn enimiz mi-di luk aan.
13 Ahn saym taim, wahn big ertkwayk hapm. Wan-tent a di siti geh dischrai, ahn 7,000 peepl ded. Ahn di peepl weh servaiv geh frayd bad ahn dehn staat tu giv prayz tu di Gaad a hevn.
14 Di sekant big chrobl don paas, bot di terd big chrobl wahn soon kom.
15 Den di sevent aynjel bloa ih chrompit. An Ah hyaa sohn lowd vais eena hevn di seh: “Di Kingdom a Gaad ahn di wan weh hihn chooz fi bee di Krais di rool oava hyoomanz, ahn Gaad wahn rool az king fareva an eva.”
16 Ahn di 24 eldaz weh mi-di sidong pahn dehn chroan fronta Gaad bow dong ahn wership Gaad.
17 Dehn seh: “Jehoava Gaad, di Almaiti, di wan hoo di liv ahn di wan hoo mi aalwayz liv, wi tank yu, bikaaz yu yooz yu grayt powa ahn now yu di rool az king.
18 Bot di peepl a di nayshanz geh beks, ahn yoo shoa dehn dat yu anga deh gens dehn tu. Di taim kohn fi joj di ded ahn fi riwaad yu servants di prafit dehn ahn di hoali wan dehn ahn di wan dehn weh fyaa yu naym ahn di wan dehn weh smaal ahn di wan dehn weh grayt. Ahn di taim kohn fi dischrai di wan dehn weh di rooin* di ert.”
19 Ahn di templ a Gaad eena hevn oapm, an Ah si di aak a fi hihn kovenant eena di templ. Den Ah hyaa sohn vais, an ih staat tu laitnin ahn tonda eena di skai, ahn den wahn ertkwayk ahn wahn big haylstaam hapm pahn ert.
