Revilayshan 12:1-17
12 Den Ah si wahn grayt sain da hevn; Ah si wahn uman, ahn di son mi rap rong ahn laik wahn jres, ahn di moon mi deh anda ih fut, ahn shee mi gat aan wahn krong weh mi mek owta 12 staarz pan ih hed,
2 ahn shee mi pregnant. Ahn shee mi-di baal bikaaz a ih layba payn.
3 Ah mi si wahn nada sain da hevn. Ah si wahn big red jragan; ih mi ga sevn hed ahn ten haan, an ih mi ga wahn krong pahn eech hed.
4 Ih jreg wan-terd a di staar dehn fahn hevn wid ih tayl, an ih chroa dehn dong tu di ert. Ahn sins da mi soon taim fi mek di uman ga di baybi, di jragan neva moov fahn fronta ahn, kaaz hihn mi waahn swala di baybi.
5 Ahn shee gi bert tu wahn son weh wahn leed aala di nayshan dehn laik wahn shepad wid wahn aiyan rad. An az soon az ih mi baan, dehn kehr ahn tu Gaad, hoo mi deh pan ih chroan.
6 Ahn di uman ron tu di wildanes, wehpaat Gaad mi don pripyaa wahn plays far ahn, an wehpaat dehn mi wahn feed ahn fi 1,260 dayz.
7 Ahn waar brok owt da hevn. Maikl* ahn fi hihn aynjelz fait wid di jragan, ahn di jragan ahn fi hihn aynjelz fait bak gens dehn,
8 bot dehn neva win,* an afta dat dehn neva ga wahn plays da hevn fi dehn nohmoh.
9 Soh Maikl chroa di grayt jragan an ih aynjel dehn dong tu di ert; hihn da di oal snayk, di wan weh dehn kaal Devl ahn Saytan; da hihn di fool op di hoal ert.
10 Den Ah hyaa wahn lowd vais eena hevn seh:
“Wi Gaad bring salvayshan tu ih peepl an ih di shoa ih powa. Ih Kingdom staat tu rool an ih Krais staat tu yooz ih atariti, bikaaz dehn chroa dong di wan weh goh fronta Gaad day ahn nait fi akyooz wi bradaz!
11 Ahn wi bradaz win di vikchri oava hihn bikaaz a di blod a di Lam ahn bikaaz a di mesij weh dehn preech; dehn mi wilin fi giv op dehn laif* ahn fays det.
12 Bikaaz a dis, evribadi weh liv da hevn wahn rijais! Bot chrobl fi di ert ahn fi di see, bikaaz di Devl kohn dong tu unu, an ih beks bad, kaaz ih noa dat ih onli ga lee bit a taim lef.”
13 Now wen di jragan si dat Maikl chroa ahn dong tu di ert, ih staat tu persikyoot di uman weh mi gi bert tu di lee baybi bwai.
14 Bot Gaad gi di uman di wing dehn a wahn grayt eegl, ahn shee flai tu di wildanes wehpaat Gaad mi don pripyaa wahn plays far ahn, an wehpaat dehn mi wahn feed ahn fi wahn taim ahn too taimz ahn haaf a taim,* faar fahn di snayk.
15 Ahn waata gosh owta di snayk mowt laik wahn riva, kaaz ih mi waahn jrongdid di uman eena di riva.
16 Bot di ert kohn help di uman, ahn di ert oapm ih mowt ahn swala op di riva weh mi-di gosh owta di jragan mowt.
17 Soh di jragan geh beks bad wid di uman ahn gaahn fait gens fi shee ada chiljren dehn weh mi-di obay weh Gaad seh ahn weh mi-di taak di chroot bowt Jeezas.
Futnoat
^ Di naym Maikl meen “Hoo Da Laik Gaad?”
^ Dis ku aalso bee “bot ih [di jragan] looz.”
^ Er “dehn soal.” Si di Glasari, “Soal.”
^ Dis ku aalso bee “chree an a haaf taimz.”
