Revilayshan 13:1-18
13 Ahn di jragan di stan op pahn di seeshoar.
Den Ah si wahn wail bees di kom owta di see, an ih mi ga ten haan ahn sevn hed. An eech wan a ih haan dehn mi ga wahn krong, ahn sohn naym weh insolt Gaad mi deh pahn eech wan a ih hed.
2 Now di wail bees weh Ah si mi luk laik wahn lepad, bot ih fut dehn mi luk laik di fut a wahn byaa, an ih mowt da-mi laik wahn laiyan mowt. Ahn di jragan gi di bees powa ahn wahn chroan ahn di rait fi rool.
3 Den Ah si dat wan a ih hed mi luk laik ih mi geh wahn bad chap fahn wahn soad weh mi nayli kil ahn. Bot di chap heel op, an aala di peepl pahn di ert mi sopraiz, soh dehn staat tu fala ahn.
4 Di peepl mi wership di jragan bikaaz ih gi di wail bees atariti. Ahn dehn mi aalso wership di wail bees wid dehnya werdz: “Hoo ku bee laik di wail bees, ahn hoo ku waar gens ahn?”
5 Ahn di jragan gi di wail bees wahn mowt fi taak eena wahn prowd way ahn fi seh insoltin tingz gens Gaad, ahn di wail bees get atariti fi rool fi 42 monts.
6 Den di wail bees oapm ih mowt fi insolt Gaad. Ih insolt Gaad naym, ahn di plays weh Gaad liv, ahn di wan dehn weh liv deh tu.
7 Di wail bees mi geh permishan fi fait gens di hoali wan dehn ahn fi kanka dehn. An ih get atariti oava peepl fahn evri chraib, ahn rays, ahn langwij, ahn nayshan.
8 An aal di peepl pahn di ert weh noh ga dehn naym rait dong eena di buk a laif wahn wership di wail bees. Fahn di biginin a di hyooman famili,* dis buk, weh da fi di Lam weh mi geh slaata, gat een di naym a di peepl dehn weh wahn liv.
9 If enibadi ga ayz fi lisn, den mek ih lisn.
10 If enibadi haftu goh da prizn, den ih haftu goh da prizn, an if enibadi kil wid di soad,* den dehn wahn kil ahn wid di soad tu. Dis da wai di hoali wan dehn need fi bayr op ahn ga fayt.
11 Den Ah si wahn nada wail bees di kom owta di ert. Ih mi ga too haan jos laik wahn lam, bot ih staat tu taak jos laik wahn jragan.
12 An ih gaahn fronta di fers wail bees ahn shoa ahn dat ih ga di saym atariti laik hihn. An ih foas di ert ahn hyoomanz fi wership di fers wail bees weh mi servaiv di bad chap.
13 An ih du aal kaina grayt miraklz; ih eevn mek faiya kohn dong fahn hevn tu di ert fi mek peepl si.
14 Ih fool op di peepl dehn weh liv pahn di ert wid di mirakl dehn weh ih geh permishan fi du fronta di fers wail bees. Ih aada di peepl weh liv pahn di ert fi mek wahn imij a di fers wail bees* weh mi servaiv di bad chap.
15 Ahn di sekant wail bees mi geh permishan fi bloa di bret a laif intu di imij* a di fers wail bees, soh dat di imij a di wail bees kuda mi taak ahn giv aadaz fi kil enibadi weh noh wership ahn.
16 Ahn di fers bees foas aala di peepl dehn—big ahn smaal, rich ahn poa, di wan dehn weh free ahn di wan dehn weh da slayv—fi geh wahn maak pahn eeda dehn rait han er dehn farid.
17 Ahn nobadi kuda mi bai er sel eniting anles ih mi ga di maak pan ahn, weh da di naym a di wail bees er di nomba weh stan fi ih naym.
18 Soh mek di wan weh ga andastandin figa owt weh di nomba a di wail bees meen, kaaz da wahn hyooman nomba, ahn di nomba da 666. Wahn persn need fi ga wizdom fi andastan weh dis meen.
Futnoat
^ Dis di rifaa tu Adam ahn Eev chiljren.
^ Dis ku aalso bee “an if enibadi sopoas tu geh kil wid di soad.”
^ Er “mek wahn imij fi giv tu di wail bees.”
^ Er “permishan fi gi spirit tu di imij.”
