Revilayshan 15:1-8
15 Den Ah si wahn nada sain eena hevn wid simbolik meenin, ih mi grayt ahn wandaful; da mi sevn aynjelz weh mi-di bring sevn playg. Ahn dehnya da di laas playg weh fi kom, kaaz wen dehn finish, Gaad anga wahn finish tu.
2 Den Ah si sohnting weh mi luk laik wahn see weh mek owta glaas an ih mi ga faiya an ada tingz eensaida it. Ahn di wan dehn weh mi kanka di wail bees an ih imij ahn di nomba a di naym a di wail bees mi-di stan op bai di see weh mek owta glaas. An aala dehn mi-di hoal sohn haap fahn Gaad.
3 Ahn dehn mi-di sing di sang weh Moaziz, di slayv a Gaad, mi sing ahn di sang weh di Lam sing; dehn mi-di seh:
“Jehoava, di Almaiti Gaad, evriting weh yu du grayt ahn wandaful. Yoo da di King weh rool fareva an eva, an evriting weh yu du raichos ahn chroo.
4 Jehoava, evribadi wahn fyaa yoo an aana yu naym, kaaz yoo da di onli laayal Gaad weh deh. An aala di nayshan dehn wahn wership yu, bikaaz dehn ku si dat yu joj wid raichosnis.”
5 Afta dat, Ah si di hoali plays a di tent a Gaad da hevn. Ahn di tent mi oapm, ahn Gaad rimainda dehn* mi deh een deh.
6 Den di sevn aynjel dehn wid di sevn playg kom owt fahn deh, ahn dehn mi-di wayr kleen linen kloaz weh mi brait. Ahn dehn mi gat aan sohn goal sash rong dehn ches.
7 Den wan a di foa cherob dehn* gi di sevn aynjel dehn sevn goal bowl weh mi ful op a Gaad anga; hihn da di Gaad weh liv fareva an eva.
8 Ahn di templ geh ful op a smoak bikaaz a Gaad powa ahn gloari, ahn nobadi kudn goh eena di templ til di playg dehn a di sevn aynjel dehn mi finish.
