Revilayshan 2:1-29
2 “Rait dis mesij tu di aynjel a di kangrigayshan da Efisos: Dehnya da di tingz weh di wan weh hoal di sevn staar dehn eena ih rait han ahn weh waak monks di sevn goal lampstan seh:
2 ‘Ah noa weh aal unu du, an Ah noa how haad unu di werk ahn dat unu di bayr op. Ah noa dat unu noh talarayt bad peepl, an Ah noa dat unu tes owt di wan dehn weh seh dat dehn da apasl, an unu fain owt dat dehn di tel lai.
3 An eevn doa unu gaahn chroo wahn lata tingz fi di sayk a mai naym, unu stil di bayr op an unu noh geh diskorij.
4 Bot, Ah ga dis wan ting gens unu: unu noh di shoa di saym kaina lov laik weh unu mi ga fahn di biginin.
5 “‘Soh den, unu need fi memba wehpaat unu mi deh fers soh dat unu ku si how faar unu faal, ahn ripent ahn du di tingz weh unu yoostu du. If nat, Ah wahn kom an Ah wahn moov unu lampstan fahn weh ih deh.
6 Bot wan ting deh weh unu di du rait: unu hayt di tingz weh di rilijos groop weh naym di Nikolayshanz di du. An Ai hayt dehndeh tingz tu.
7 Mek di wan weh ga ayz lisn tu weh di hoali spirit seh tu di kangrigayshan dehn: Ah wahn gi permishan tu di wan weh win di vikchri fi eet fahn di chree a laif weh deh eena di paradais a Gaad.’
8 “Rait dis mesij tu di aynjel a di kangrigayshan da Smerna: Di wan weh da ‘di Fers ahn di Laas,’ weh mi ded bot kohn bak tu laif agen, seh tu unu:
9 ‘Ah noa bowt di chribyulayshan weh unu goh chroo ahn dat unu poa. Bot eevn soh, unu rich. Ah aalso noa bowt di peepl weh kaal dehnself Jooz weh di insolt unu. Bot dehn da noh Jooz fi chroo; dehn da wahn groop weh bilangz tu Saytan.
10 Noh bee frayd fi di tingz weh yu wahn haftu goh chroo. Di Devl wahn chroa som a unu eena prizn fi reeli tes unu, an unu wahn haftu fays persikyooshan* fi ten dayz. Bot unu mos proov dat unu faytful, eevn if unu haftu ded, an Ai wahn gi yu di krong a laif.
11 Mek di wan weh ga ayz lisn tu weh di hoali spirit ga fi seh tu di kangrigayshan dehn; ih seh: Di persn weh win di vikchri wahn neva fays di sekant det.’*
12 “Now rait dehnya tingz tu di aynjel a di kangrigayshan da Pergamom: Di wan weh ga di lang soad weh shaapm pahn di too said seh:
13 ‘Ah noa dat unu di liv wehpaat Saytan chroan deh, ahn yet unu di stay laayal tu mi.* Ah aalso noa dat unu di hoal aan tu unu fayt eena mi, eevn joorin di taim wen dehn mi kil Antipas, mi faytful witnis, rait eena fi unu siti, di plays wehpaat Saytan liv.
14 “‘Bot Ah ga wahn fyoo tingz gens unu; how unu ku alow sertn peepl weh di hoal aan tu di teechin a Baylam fi deh monks unu? Baylam mi teech Baylak fi temp di Izrelait dehn fi eet tingz weh mi sakrifais tu aidol ahn fi komit sekshwal imoraliti.*
15 Unu eevn di alow som weh di hoal aan tu di teechinz a di rilijos groop weh naym di Nikolayshanz fi deh monks unu.
16 Soh unu mos ripent. If unu noh ripent, Ah wahn kohn kwik-wan, an Ah wahn fait gens dehn wid di lang soad weh di stik owta mi mowt.
17 “‘Mek di wan weh ga ayz lisn tu weh di hoali spirit ga fi seh tu di kangrigayshan dehn; ih seh: Ah wahn gi di persn weh win di vikchri som a di mana weh deh haid weh, An Ah wahn giv ahn wahn lee wait stoan, ahn di naym weh kaav owt pahn da lee stoan da wahn nyoo naym weh nobadi noa; di onli persn weh noa da naym da di wan weh Ah giv it tu.’
18 “Now rait dis tu di aynjel a di kangrigayshan da Taiyataira: Di Son a Gaad, di wan weh ga aiy weh luk laik dehn deh pahn faiya ahn fut weh luk laik pyoar kapa, seh:
19 ‘Ah noa di tingz weh unu di du, ahn di lov ahn fayt weh unu gat. Ah si unu servis tu Gaad ahn how unu di bayr op chroo difrent prablemz, an Ah noa dat unu di du moa rait now dan weh unu yoostu du.
20 “‘Bot Ah ga sohnting gens unu; how unu ku talarayt dis uman weh naym Jezebel? Shee seh dat shee da wahn prafit; shee di chrai fi fool op mi slayv dehn ahn teech dehn fi komit sekshwal imoraliti* an eet tingz weh mi geh sakrifais tu aidol.
21 An Ah mi giv ahn taim fi ripent, bot shee mi waahn kantinyu fi komit sekshwal imoraliti;* ih neva waahn ripent.
22 Ah wahn mek shee geh sik tu di point dat ih kyaahn get op, an if di wan dehn weh di komit sekshwal imoraliti lang wid ahn noh ripent fahn di tingz weh shee mi chrik dehn fi du, Ah wahn mek dehn goh chroo terabl sofarin.
23 An Ah wahn kil fi shee chiljren wid wahn dedli dizeez, soh dat aala di kangrigayshan dehn ku noa dat Ai da di wan weh saach wahn persn haat an Ah noa weh da persn di tink eena di deepis paat a ih haat.* An Ah wahn riwaad eech wan a unu akaadn tu di tingz weh unu du.
24 “‘Bot now, Ah di seh dis tu di res a unu weh deh da Taiyataira, di wan dehn weh noh fala di teechin a Jezebel ahn weh neva geh fi noa di soa-kaal “deep tingz a Saytan”: Ah noh wahn put nohmoh berdn pahn unu.
25 Bot unu mos kantinyu fi hoal aan tu di gud tingz weh unu gat til Ah kohn bak.
26 An Ah wahn gi di persn weh win di vikchri ahn weh du weh Ah seh di atariti fi rool oava* di nayshan dehn.
27 Da persn wahn geh di saym atariti weh Ai geh fahn mai Faada. Ahn da persn wahn rool* oava di nayshan dehn wid wahn aiyan rad weh ih wahn yooz fi brok op di nayshanz laik klay pat.
28 An Ah wahn giv ahn di maanin staar.
29 Mek di wan weh ga ayz lisn tu weh di hoali spirit ga fi seh tu di kangrigayshan dehn.’
Futnoat
^ Er “unu wahn ga chribyulayshan.”
^ Dis di rifaa tu evalastin det.
^ Lit., “di hoal aan tait tu mi naym.”
^ Si di Glasari, “Sekshwal imoraliti.”
^ Si di Glasari, “Sekshwal imoraliti.”
^ Di Greek werd da por·neiʹa. Si di Glasari, “Sekshwal imoraliti.”
^ Er “ahn noa da persn deepis imoashan.” Lit., “saach di kidni dehn.”
^ Lit., “fi shepad.”
^ Er “wahn bee laik wahn shepad.”
