Revilayshan 20:1-15
20 Den Ah si wahn aynjel di kohn dong fahn hevn. Ih mi ga di kee fi di abis wid ahn, an eena ih han ih mi ga wahn big chayn.
2 Di aynjel kyapcha di jragan, weh da di oal snayk hoo da di Devl ahn Saytan. An ih chayn ahn op fi 1,000 yaaz.
3 An ih pich ahn dong eena di abis. Den ih shet it gud ahn seel it op, soh dat di Devl kudn kom owt ahn fool op di nayshan dehn nohmoh til afta di 1,000 yaaz en. Afta dat, di aynjel wahn loos ahn fi wahn lee wail.
4 Den Ah si sohn chroan ahn di wan dehn weh mi-di sidong pahn dehn. Gaad gi dehn atariti fi joj. An Ah si di blod* a di wan dehn weh mi geh kil* sayka weh dehn mi seh di chroot bowt Krais ahn sayka weh dehn mi preech bowt Gaad. Dehn da di saym wan weh neva wership di wail bees ner ih imij, ahn dehn neva geh di maak a di wail bees pahn dehn farid er dehn han. Dehn kohn bak tu laif ahn rool wid Krais az kingz fi 1,000 yaaz.
5 Dis da di fers rezorekshan. (Di res a ded peepl neva kohn bak tu laif til afta di 1,000 yaaz mi en.)
6 Enibadi weh kohn bak tu laif eena di fers rezorekshan wahn bee hapi ahn hoali, ahn di sekant det noh wahn ga no powa oava dehn. Dehn wahn bee prees fi Gaad ahn fi di Krais, ahn dehn wahn rool az kingz wid hihn fi 1,000 yaaz.
7 Now az soon az di 1,000 yaaz finish, di aynjel wahn loos Saytan fahn prizn.
8 An ih gwehn goh fool op di nayshan dehn da di foa kaana a di ert. Dehnya nayshan da Gag ahn Maygag, ahn Saytan wahn gyada dehn tugeda fi goh da waar. Ahn da soh moch a dehn dat dehn wahn bee laik di san pahn di seeshoar.
9 Ahn dehn wahn spred aal oava di ert ahn dehn wahn deh aal rong di hoali wan dehn ahn rong di siti weh Gaad lov. Bot faiya wahn kohn dong fahn hevn ahn bon dehn op.
10 Ahn di aynjel wahn chroa di Devl weh mi-di fool dehn op intu di layk a faiya weh di bon wid solfa. Dis da di saym plays weh dehn mi chroa di wail bees ahn di faals prafit. Ahn day ahn nait, fareva an eva, dehn wahn geh taacha een deh.*
11 Den Ah si wahn grayt wait chroan ahn di Wan weh mi-di sidong pan it. Hevn an ert disapyaa fahn fronta ahn, an nobadi kuda mi fain dehn agen.
12 Den Ah si di peepl weh mi ded, di grayt wan dehn ahn di kaman peepl, di stan op fronta di chroan. Ahn Gaad oapm op sohn skroal. Den ih oapm wahn nada skroal, weh da-mi di buk a laif. Di ded mi geh joj bai di ting dehn weh mi rait dong eena di skroal dehn akaadn tu weh dehn mi du.
13 Ahn di see giv op di ded peepl fahn owta it, ahn det ahn di Grayv* giv op di ded peepl fahn owta dehn, ahn di Wan pahn di chroan joj eech wan a dehn akaadn tu weh dehn mi du.
14 Ahn hihn chroa det ahn di Grayv* intu di layk a faiya. Di layk a faiya stan fi di sekant det.
15 Ahn hooeva naym neva deh rait dong eena di buk a laif, hihn chroa dehn intu di layk a faiya.
Futnoat
^ Er “soal.” Si di Glasari, “Soal.”
^ Er “kil wid di aks.”
^ Er “dehn wahn deh eena prizn.”
^ Er “ahn Haydeez,” weh da di grayv. Si di Glasari, “Grayv.”
^ Er “ahn Haydeez,” weh da di grayv. Si di Glasari, “Grayv.”
