Revilayshan 4:1-11
4 Afta dis, Ah mi si wahn doa da hevn weh mi oapm, ahn di fers vais weh Ah mi hyaa mi song laik wahn chrompit; an ih mi-di tel mi: “Kom op ya, an Ah wahn shoa yu di tingz weh wahn haftu hapm.”
2 Rait afta dat, Ah feel Gaad spirit kohn pahn mi, an Ah si wahn chroan da hevn, ahn sombadi mi-di sidong pahn di chroan.
3 Ahn di Wan weh mi-di sidong pahn di chroan mi shain laik wahn jaspa stoan ahn wahn saardyos stoan,* ahn wahn raynboa mi deh aal rong di chroan an ih mi-di shain laik wahn emeral stoan.
4 Ah mi si 24 ada chroan rong di chroan, ahn 24 eldaz mi-di sidong pahn dehndeh chroan, ahn dehn mi gat aan wait kloaz, an eech a dehn mi gat aan wahn krong weh mi mek owta goal pahn dehn hed.
5 Ah mi si laitnin di kohn fahn di chroan, an Ah mi hyaa lata vais ahn tonda; Ah mi aalso si sevn lamp weh mi-di bon brait brait rong di chroan, ahn dehndeh lamp stan fi di sevn spirit a Gaad.
6 An Ah mi si sohnting weh mi luk laik wahn glaas see, an ih mi klayr laik kristal.
An eena di midl wehpaat di chroan deh ahn rong di chroan, Ah mi si foa cherob.* Ahn dehn mi ga lata aiy aal oava dehn badi.
7 Di fers cherob mi luk laik wahn laiyan, di sekant cherob mi luk laik wahn yong bul, di terd cherob mi ga di fays a wahn man, ahn di foat cherob mi luk laik wahn eegl.
8 Now, eech wan a di foa cherob mi ga siks wing ahn dehn mi ga aiy aal oava dehn badi an eevn anda dehn wing. An aal day an aal nait dehn seh: “Jehoava, di Almaiti Gaad, da wahn hoali, hoali, hoali Gaad. Hihn da di Wan hoo di liv, di Wan weh mi aalwayz liv, ahn di Wan weh di kohn.”
9 Ahn tu evri taim di cherob dehn gi gloari an aana ahn tanks tu di Wan weh di sidong pahn di chroan, di Wan weh liv fareva an eva,
10 di 24 eldaz bow dong ahn wership di Wan weh di sidong pahn di chroan, di Wan weh liv fareva an eva; ahn dehn chroa dehn krong fronta di chroan ahn seh:
11 “Jehoava, wi powaful Gaad, da yoo dizerv aala di gloari ahn di aana, bikaaz da yoo mek evriting, an evriting egzis bikaaz dat da weh yoo waahnt.”
