Revilayshan 5:1-14
5 Den Ah si di Wan weh di sidong pahn di chroan mi ga wahn skroal eena ih rait han. Di skroal mi ga werdz rait dong da bak ahn da front, an ih mi seel op gud wid sevn seel.
2 An Ah si wahn schrang aynjel di anonks wid wahn lowd vais: “Da hoo dizerv fi brok di seel dehn an oapm di skroal?”
3 Bot nobadi eena hevn er pahn di ert er andaneeta di ert kuda mi oapm di skroal ahn luk eensaid ahn reed it.
4 Soh Ah staat tu baal ahn baal bikaaz nobadi mi deh weh mi dizerv fi oapm di skroal ahn luk eensaid ahn reed it.
5 Bot wan a di eldaz tel mi: “Stap krai. Di Laiyan weh da fahn di chraib a Jooda, di wan weh kohn fahn Dayvid famili lain, don win di vikchri, soh da hihn dizerv fi brok di sevn seel dehn an oapm di skroal.”
6 An Ah si wahn lam di stan op kloas tu di chroan eena di midl a di eldaz ahn foa cherobz. Di Lam mi luk laik ih geh slaata an ih mi ga sevn haan ahn sevn aiy; ih aiy dehn stan fi di sevn spirit fahn Gaad weh Hihn sen aal oava di werl.
7 Den rait away di Lam gaan ahn tek di skroal fahn owta di rait han a di Wan weh mi-di sidong pahn di chroan.
8 Wen ih tek di skroal, di cherobz ahn di 24 eldaz bow dong fronta di Lam, an eech wan a dehn mi ga wahn haap ahn sohn goal bowl weh mi ful op wid insens. (Di insens stan fi di pryaaz a di hoali wan dehn.)
9 Ahn dehn mi-di sing wahn nyoo sang weh seh: “Yoo dizerv fi tek di skroal ahn brok oapm di seel dehn, kaaz yoo mi geh slaata ahn wid yu oan blod yu mi bai bak peepl fi Gaad fahn evri chraib, langwij, rays, ahn nayshan.
10 Ahn yu mek dehn bee king ahn prees fi wi Gaad—wahn kingdom. Ahn dehn wahn rool az kingz oava di ert.”
11 An Ah si wahn lata aynjel rong di chroan ahn di eldaz ahn di cherob dehn, an Ah hyaa dehn vais tu. Da mi honjridz a milyanz a aynjelz weh mi dehdeh,
12 ahn dehn mi-di seh wid wahn lowd vais: “Di Lam weh mi geh slaata dizerv fi geh powa ahn richiz ahn wizdom ahn schrent an aana ahn gloari ahn prayz.”
13 Den Ah hyaa evri livin ting eena hevn ahn pahn di ert ahn weh deh andaneeta di ert an eena di see, yes, evriting weh deh eena dehn, seh: “Di Wan weh di sidong pahn di chroan fi geh prayz, aana, ahn gloari fareva an eva.”
14 Di foa cherobz mi-di seh: “Aymen!” ahn di eldaz bow dong ahn wership Gaad.
