Revilayshan 8:1-13
8 Wen di Lam oapm di sevent seel, hevn geh kwaiyet fi bowt haaf an owa.
2 An Ah mi si di sevn aynjel weh stan op fronta Gaad, ahn hihn gi dehn sevn chrompit.
3 Wahn nada aynjel get deh ahn gaahn stan op fronta di alta, an ih mi-di hoal wahn goal bowl fi bon insens. Ahn sombadi giv ahn wahn lata insens fi mek ih aafa it pahn di alta weh mek owta goal weh mi deh fronta di chroan. Den ih bon di insens az di hoali wan dehn mi-di aafa op fi dehn pryaaz.
4 Den di smoak fahn di insens weh di aynjel mi-di bon gaahn fronta Gaad lang wid di pryaaz a di hoali wan dehn.
5 Bot rait away di aynjel ful op di insens bowl wid som a di koal* fahn di alta ahn chroa it dong tu di ert. Den ih staat tu tonda, ahn laitnin staat tu flash eena di skai, ahn wahn ertkwayk hapm. Ah eevn hyaa sohn vais tu.
6 Ahn di sevn aynjel dehn geh redi fi bloa dehn chrompit.
7 Soh di fers aynjel bloa ih chrompit. Den hayl ahn faiya miks wid blod rayn dong pahn di ert, ahn wan-terd a di ert geh bon op, ahn wan-terd a di chree dehn geh bon op, an aala di graas geh bon op tu.
8 Di sekant aynjel bloa ih chrompit. Den sohnting az big az wahn hai mongtin mi-di bon wid faiya an ih jrap eena di see. Ahn wan-terd a di see ton tu blod,
9 ahn wan-terd a di animal dehn* weh liv eena di see ded, ahn wan-terd a di ship dehn geh dischrai.
10 Den di terd aynjel bloa ih chrompit. Ahn wahn big staar weh mi brait laik wahn lamp jrap fahn di skai, an ih jrap pahn wan-terd a di riva dehn ahn di waata spring* dehn.
11 Ahn da staar mi naym Bitanis.* Ahn wan-terd a di waata ton bita, ahn wahn lata peepl ded sayka weh dehn mi jrink di waata, bikaaz di waata mi bita.
12 Den di foat aynjel bloa ih chrompit. Ahn sohnting mek wan-terd a di son, wan-terd a di moon, ahn wan-terd a di staar dehn geh daak. Ahn di son neva shain no lait fi wan-terd a di day, ahn di moon ahn di staar dehn neva shain no lait fi wan-terd a di nait.
13 An Ah mi si wahn eegl di flai way op eena di skai an Ah hyaa ih seh wid wahn lowd vais: “Di peepl weh di liv pahn di ert wahn deh eena sohn big chrobl bikaaz a weh wahn hapm wen di ada chree aynjel bloa fi dehn chrompit!”
Futnoat
^ Er “som a di faiya.”
^ Er “di animal dehn weh ga soal.” Si di Glasari, “Soal.”
^ Er “waata fongtin.”
^ Er “Wermwud.” Si di Glasari, “Wermwud.”
