Roamanz 1:1-32
1 Dis leta da fahn mee, Paal, wahn slayv a Krais Jeezas. Hihn kaal mi fi bee wahn apasl, an ih set mi wan said fi preech di gud nyooz fahn Gaad
2 weh hihn mi pramis wi fahn lang taim chroo ih prafit dehn eena di hoali Skripchaz.
3 Da gud nyooz tel wi bowt ih Son weh mi baan az wahn hyooman eena Dayvid famili lain.
4 Gaad mi yooz di powa a ih hoali spirit fi rezorek ahn, an dat proov tu wi dat hihn da Gaad Son. Dis Son da wi Laad Jeezas Krais,
5 ahn hihn shoa mi* grayt kainis* an apoint mi fi bee wahn apasl soh dat peepl fahn aal nayshanz ku shoa fayt an obay hihn ahn dis wahn bring aana tu fi hihn naym.
6 An unu deh monks aala dehnya nayshanz tu, ahn Gaad kaal unu fi mek unu bilangz tu Jeezas Krais.
7 Ah di rait dis leta tu unu weh deh da Roam, unu weh Gaad lov ahn pik fi bee ih hoali peepl:
Ah pray dat Gaad wi Faada ahn di Laad Jeezas Krais shoa unu lata kainis ahn giv unu pees.
8 Fers, Ah tank mi Gaad chroo Jeezas Krais wen Ah pray bowt aala unu, bikaaz peepl fahn aal oava di werl di taak bowt unu fayt.
9 Ah di serv Gaad wid aala mi haat wen Ah preech di gud nyooz bowt ih Son, ahn hihn noa dat Ah aalwayz pray bowt unu.
10 Ah di bayg hihn dat if pasabl Ah ku kohn si unu laik weh Ah waahn du fahn lang taim, if da Gaad wil.
11 Kaaz Ah reeli waahn kohn si unu, soh dat Ah ku giv unu sohn kaina spirichwal gif fi mek unu fayt geh schranga.
12 Laik dat, wi wahn ku inkorij wan anada bai wi fayt.
13 Ah waahn mek unu noa, mi bradaz, dat lata taimz Ah waahn kohn si unu soh dat mi preechin ku bayr gud froot monks unu jos laik monks di ada nayshan dehn. Bot evri taim Ah chrai kohn sohnting get eena mi way.
14 Ah ga wahn jooti fi preech tu evribadi, tu di Greek ahn tu di farinaz, tu peepl weh waiz ahn tu peepl weh noh waiz.
15 Soh Ah eega fi kohn preech di gud nyooz tu unu weh deh da Roam tu.
16 Kaaz Ai noh shaym a di gud nyooz ataal. Az a mata a fak, di gud nyooz da Gaad powaful way fi sayv evribadi weh ga fayt, fers tu di Jooz dehn ahn den tu di Greek dehn tu.
17 Bikaaz Gaad yooz di gud nyooz fi shoa ih raichosnis tu peepl weh ga fayt, ahn dis mek dehn fayt geh schranga, jos laik weh di skripcha seh: “Enibadi weh raichos wahn kip aan di liv bikaaz a dehn fayt.”
18 Gaad di shoa ih raat fahn hevn gens aala di peepl weh noh obay hihn ahn weh noh raichos. Dehn du aal kaina bad tingz fi haid di chroot fahn ada peepl.
19 Dehn wel ahn noa weh peepl shuda noa bowt Gaad, kaaz hihn mek it playn tu dehn.
20 Nobadi kyaahn si Gaad, bot fahn di taim hihn mek di werl, peepl ku si dat Gaad ga powa weh laas fareva ahn dat hihn da di onli chroo Gaad, kaaz dehn ku see’t eena di ting dehn weh hihn mek, soh dehn kyaahn seh dehn neva noa.
21 Soh eevn doa dehn noa dat hihn da Gaad, dehn noh giv ahn no gloari ner dehn noh tel ahn tanks fi notn. Insteda dat, dehn tinkin noh mek no sens ahn dehn haat eena daaknis kaaz dehn noh ga andastandin.
22 Dehn klaym seh dehn waiz, bot reeli, dehn foolish.
23 Soh insteda dehn gi gloari tu di Gaad weh kyaahn ded, dehn wership aidol weh luk laik peepl weh ku ded, er dehn wership sohnting weh luk laik berd, er animal, er reptail.
24 Soh, bikaaz dehn waahn goh afta weh dehn oan haat dizaiya, Gaad lef dehn loan mek dehn du aal kaina doti tingz weh bring shaym pahn dehn oan badi.
25 Insteda bileev di chroot bowt Gaad, dehn bileev loan lai. Dehn wership ahn serv kriyayshan insteda wership di Kriyayta. Hihn da di Gaad wi shuda prayz fareva an eva. Aymen.
26 Dat da wai Gaad lef dehn rait deh an alow dehn fi du di imoaral tingz weh dehn waahn du. Di uman dehn stap ga seks eena di nachral way ahn insted, dehn staat tu ga seks wid ada uman.
27 Saym way, di man dehn stap ga seks wid uman ahn fi dehn los fi wan anada bon laik faiya. Ahn soh di man dehn waahn du aal kaina disgostin tingz wid ada man. Sayka dat, dehn geh di ponishment weh dehn dizerv eena dehn oan badi.
28 Laik how dehn neva wilin fi geh fi noa Gaad gud, hihn lef dehn soh, an aal weh dehn ku tink bowt da fi du tingz weh noh pleez Gaad.
29 Dehn haat ful op wid aal kaina wikidnis, greedinis, badnis, an evriting weh noh raichos. Dehn ful op a jelosi ahn merda ahn dehn laik fait op wid wan anada. Dehn onli laiyad, dehn hoal malis, ahn dehn gasip bowt wan anada.
30 Dehn slanda wan anada, ahn dehn hayt Gaad. Dehn stobant, prowd, boasi, ahn dehn loan di plan op bad tingz aal di taim. Dehn noh obay dehn payrents.
31 Dehn noh ga andastandin, ahn dehn noh kip dehn werd. Dehn noh ga no lov fi wan anada, ahn dehn noh ga no mersi pahn nobadi.
32 Dehn wel ahn noa di raichos laa a Gaad, dat enibadi weh praktis tingz laik dehnya dizerv fi ded. Bot stilyet, dehn kip aan di du dehnya tingz, ahn pahn tap a dat, dehn hapi wen ada peepl du dehnya tingz tu.
