Roamanz 13:1-14
13 Aal atariti weh egzis kohn fahn Gaad, ahn dat da wai evribadi* fi bee wilin fi obay peepl weh ga atariti. Da Gaad put dehnya peepl weh ga atariti eena dehn difrent pozishan.
2 Soh den, enibadi weh goh gens di peepl weh ga atariti oava dehn di goh gens Gaad araynjment. Enibadi weh goh gens da araynjment wahn bring jojment pahn dehn oanself.
3 Enibadi weh du gud noh haftu frayd fi di peepl weh ga atariti oava dehn, bot peepl weh du bad haftu frayd. If unu noh waahn feel frayd fi di peepl weh ga atariti oava unu, den kantinyu fi du gud, ahn dehn wahn prayz unu far it.
4 Kaaz dehn da Gaad servant fi unu oan gud. Bot if unu di du weh bad, unu shuda frayd fi chroo, kaaz dehn ga di powa* fi ponish unu. Dehn da Gaad servant fi ponish* peepl weh du bad tingz.
5 Soh den, ih nesiseri fi mek unu bee wilin fi obay enibadi weh ga atariti oava unu, noh jos bikaaz a di ponishment, bot sayka unu kanshans tu.
6 Dat da wai unu di pay taks tu, bikaaz dehn da Gaad servant weh aalwayz di serv fi dis perpos.
7 Giv evribadi weh dehn aks fa: if di govament aks unu fi pay taks, pay it. If di govament chaaj unu fi sohnting els, pay it. If sombadi waahn rispek, shoa ahn rispek. If sombadi waahn mek unu aana ahn, shoa ahn aana.
8 Unu noh fi oa nobadi notn eksep fi lov wan anada. Bikaaz hooeva lov ih nayba di du weh di Laa seh fi du.
9 Di Laa seh: “Yu noh fi komit adolchri, yu noh fi merda, yu noh fi teef, ahn yu noh fi bee greedi fi weh ada peepl gat.” Dehnya laa an eni ada komanment da reeli jos wan laa: “Yu fi lov yu nayba jos laik how yu lov yuself.”
10 If yu lov yu nayba, yu noh wahn du eevl tingz tu ahn. Soh den, sombadi weh shoa lov di fala di hoal Laa.
11 Unu fi du dehnya tingz bikaaz unu noa di taim weh wi di liv eena, dat di owa don kohn fi mek unu wayk op. Kaaz wi salvayshan deh kloasa now dan wen wi mi fers put fayt eena Jeezas.
12 Di nait nayli oava, ahn di day soon kohn. Soh mek wi stap du di tingz weh bilangz tu daaknis, ahn mek wi put aan di wepan dehn weh bilangz tu di lait.
13 Mek wi liv deesent, laik peepl weh deh eena daylait. Wi noh fi goh da no wail paati ner bee jronkad. Wi noh fi praktis sekshwal imoraliti ner goh aan brayzn.* Wi noh fi bee jelos, ahn wi noh fi kwaaril ahn fait.
14 Bot fala di egzampl a di Laad Jeezas Krais,* ahn stap tink bowt how unu ku satisfai unu oan sinful dizaiyaz.
Futnoat
^ Er “evri soal.”
^ Lit., “soad.”
^ Er “fi bring ponishment pahn.”
^ Er “goh aan laik wi noh ga no shaym.” Dis da di plooral faam a di Greek werd a·selʹgei·a. Si di Glasari, “Brayzn kandok.”
^ Lit., “put aan di Laad Jeezas Krais.”
