Roamanz 14:1-23
14 Welkom enibadi weh week eena dehn fayt, bot noh joj dehn bikaaz a how dehn vyoo tingz.
2 Sombadi weh ga schrang fayt eet evriting, bot sombadi weh week eena ih fayt onli eet vejitablz.
3 Di wan weh di eet noh fi luk dong pahn di wan weh noh di eet, ahn di wan weh noh di eet noh fi joj di wan weh di eet, bikaaz Gaad don welkom ahn.
4 Da hoo yoo fi joj sombadi els servant? Da fi hihn maasta wahn joj weda ih du rait er ih du rang. Hihn wahn du weh rait bikaaz Jehoava ku help ahn.
5 Som peepl tink dat wan day fi bee moa impoatant dan di neks wan. Adaz si evri day az di saym. Evribadi fi bee shoar eena dehn oan main.
6 If sombadi tink dat wan day fi bee moa impoatant dan di ada dayz, ih di du dat fi aana Jehoava. If sombadi eet, ih eet fi aana Jehoava, bikaaz ih giv tanks tu Gaad. An if sombadi noh eet, ih du dat fi aana Jehoava, ahn stilyet ih gi tanks tu Gaad.
7 In fak, non a wi liv onli fi wiself, ahn non a wi ded onli fi wiself.
8 If wi liv, wi liv fi Jehoava, an if wi ded, wi ded fi Jehoava. Soh weda wi liv er wi ded, wi bilangz tu Jehoava.
9 Dis da di reezn wai Krais mi ded ahn kohn bak tu laif agen, soh dat hihn ku bee Laad oava evribadi, di ded ahn di livin.
10 Bot wai unu di joj unu brada? Ahn wai unu luk dong pahn unu brada? Kaaz Gaad wahn joj aala wi.
11 Dis da weh rait dong eena di skripcha: “Jehoava seh: ‘Az shoar az Ai di liv, evribadi wahn neel dong fronta mi, an evribadi wahn seh dat Ai da Gaad.’”
12 Soh den, Gaad wahn joj eech wan a wi akaadn tu weh wi du.
13 Soh, wi noh fi joj wan anada nohmoh, bot wi mos mek op wi main noh fi du notn weh ku kaaz wi brada fi stombl er schray weh fahn di fayt.
14 Bikaaz Ai da wahn falowa a di Laad Jeezas, Ai noa fi shoar dat evriting kleen. If sombadi tink dat sohnting noh kleen, den da onli tu dehn ih noh kleen.
15 Kaaz if di food weh yu eet ofen yu brada, den yu noh di liv akaadn tu lov nohmoh. Noh mek di food weh yu eet dischrai di fayt a yu brada weh Krais mi ded fa.
16 Soh noh du notn weh yu bileev fi bee gud if dat wahn mek ada peepl taak bad bowt yu.
17 Da noh weh wahn persn eet er jrink weh wahn mek dehn geh fi bee paat a Gaad Kingdom. Insteda dat, ih ga fi du wid how di hoali spirit help ahn fi ga jai ahn pees ahn fi bee raichos.
18 Kaaz Gaad aksep enibadi weh slayv fi Krais eena da way, ahn peepl wahn rispek da persn.
19 Soh den, mek wi du aal weh wi kud fi mek pees ahn fi bil op wan anada.
20 Unu fi stap tayr dong di werk a Gaad jos sayka food. Da chroo dat evriting kleen, bot ih rang fi wahn persn eet if dis wahn damij ada peepl fayt.
21 Ih beta noh fi eet meet ner jrink wain ner du eniting weh ku damij unu brada fayt.
22 Di fayt weh yu gat, kip it bitween yuself ahn Gaad. Wahn persn wahn bee hapi onli if ih noh haftu kandem ihself fi sohnting weh ih disaid fi du.
23 Bot if ih ga dowts, ih don kandem ihself if ih eet, bikaaz ih noh eet bays pahn fayt. Soh evriting weh noh bays pahn fayt da sin.
