Roamanz 16:1-27
16 Ah di inchrojoos wi sista, Feebi, tu unu. Shee mi-di serv eena di kangrigayshan da Senkriya.
2 Pleez welkom ahn az wahn felo bileeva eena di Laad, jos laik how unu sopoas tu welkom aala di hoali peepl. Help ahn wid eniting weh ih need, kaaz shee mi protek lata bradaz ahn sistaz, ahn shee mi protek mee tu.
3 Tel Priska an Akwila heloa fi mi. Dehn werk fi Krais Jeezas lang wid mi,
4 ahn dehn mi ris dehn oan laif* fi mi. Mee an aala di kangrigayshan monks di nayshanz tank dehn fi dat.
5 Tel di kangrigayshan weh meet da dehn hows heloa fi mi tu. Tel mi dyaa brada Epeenatos heloa fi mi. Hihn da wan a di fers peepl fi bee wahn disaipl a Krais da Aysha.
6 Tel Mayri heloa fi mi. Shee werk haad fi unu.
7 Tel Anjronikos ahn Joonyas heloa fi mi. Dehn da mi faamli, ahn dehn mi deh da prizn lang wid mi. Di apasl dehn noa dehn gud, ahn dehn di fala Krais langa dan mee.
8 Tel Ampliyatos heloa fi mi. Hihn da mi dyaa brada weh di fala di Laad.
9 Seh heloa tu Erbaanos, weh di werk lang wid wi fi di Laad. Ahn tel mi dyaa brada Stakis heloa fi mi tu.
10 Seh heloa tu Apelis, weh laayal tu Krais. Ahn seh heloa tu evribadi eena Aristabilos hows.
11 Seh heloa tu Heroadyan, weh da mi faamli. Seh heloa tu evribadi eena Narsisas hows weh di fala di Laad.
12 Tel Chraifeena ahn Chraifoasa heloa fi mi. Dehnya too uman di werk haad fi di Laad. Seh heloa tu mi dyaa sista, Persis, weh werk haad fi di Laad tu.
13 Seh heloa tu Roofos, weh da wahn speshal servant a di Laad. Ahn seh heloa tu ih ma, weh da laik wahn ma tu mee tu.
14 Seh heloa tu Asinkritos, Fleegon, Hermeez, Pachrobas, Hermas, ahn tu di bradaz ahn sistaz weh deh wid dehn.
15 Seh heloa tu Filoloagos ahn Joolya fi mi. Seh heloa tu Neeros an ih sista. Seh heloa tu Olimpas ahn tu aala di hoali peepl weh deh wid dehn.
16 Greet wan anada wid wahn hoali kis. Aala Krais kangrigayshan dehn sen heloa tu unu.
17 Now mi bradaz, Ah di bayg unu fi wach owt fi dehn wan weh goh gens di teechin weh unu mi laan. Dehn di kaaz divizhan ahn mek adaz schray weh fahn di fayt.* Unu mosn ga notn fi du wid dehn.
18 Dehnya kaina man da slayv tu dehn oan sinful dizaiyaz, noh tu wi Laad Krais. Ahn dehn di chrik inosent peepl wid dehn sweet mowt ahn fansi taak.
19 Evribadi noa dat unu obeedyant, ahn soh Ah rijais oava unu. Bot Ah waahn unu bee waiz soh dat unu ku aalwayz du weh gud, an Ah waahn unu bee inosent soh dat unu noh ga notn fi du wid weh eevl.
20 Ahn soon, di Gaad weh gi pees wahn krosh Saytan anda unu fut. Ah pray dat wi Laad Jeezas kantinyu shoa unu ih grayt kainis.*
21 Timoti, weh di werk lang wid mi, seh fi tel unu heloa tu. Ahn Looshos, Jaysn, ahn Sosipater, weh da mi faamli, sen heloa tu unu tu.
22 Mee, Tershos, weh rait dis leta fi Paal, tel unu heloa eena di naym a di Laad.
23 Gaiyos sen heloa fi unu. Ah di stay da fi hihn hows, ahn di kangrigayshan meet deh tu. Erastos, weh da di siti chrezhara, seh fi tel unu heloa. Fi hihn breda Kwartos seh heloa tu.
24 *——
25 Gaad ku mek unu schrang akaadn tu di gud nyooz weh Ah preech, an akaadn tu di mesij bowt Jeezas Krais. Dis gud nyooz gree wid weh Gaad tel wi bowt weh hihn mi kip seekrit fi wahn lang taim.
26 Bot now da seekrit klyaa tu wi. Ahn bikaaz a di prafesi dehn eena di Skripchaz, peepl fahn aala di nayshanz noa bowt it tu. Dat da akaadn tu di koman fahn di Gaad weh liv fareva. Fi hihn wil da fi mek peepl fahn aala di nayshan dehn shoa fayt an obay ahn.
27 Onli Gaad ga chroo chroo wizdom. Hihn dizerv di gloari fareva bikaaz a weh Jeezas Krais mi du. Aymen.
Futnoat
^ Lit., “nek.”
^ Er “mek adaz stombl.”
^ Si di Glasari, “Grayt kainis.”
^ Di oaldis Greek manyuskrip dehn lef owt dehnya werdz: “Ah pray dat wi Laad Jeezas kantinyu shoa unu ih grayt kainis. Aymen.” Dis da di saym ting weh di en a vers 20 seh.
