Roamanz 3:1-31
3 Soh den, wat da di benifit if yoo da wahn Joo er if yu serkomsaiz?
2 Di Jooz benifit eena wahn lata wayz. Fers, Gaad mi gi dehn fi hihn mesij.
3 Soh den, weh wi ku seh bowt som a dehn Jooz weh noh ga fayt? Bikaaz dehn noh ga fayt, yu tink dat meen dat peepl kyaahn chros Gaad nohmoh?
4 Neva! Gaad wahn aalwayz tel di chroot, eevn if evribadi els di tel lai. Da jos laik weh di skripcha seh: “Soh dat evribadi wahn ku si dat evriting weh yu seh raichos, ahn yu wahn win wen enibadi joj yu.”
5 Bot weh wi ku seh if di bad tingz weh wi du proov dat Gaad raichos? Dat meenz dat Gaad noh fyaa wen hihn ponish wi? (Dat da how som peepl wuda tink.)
6 Af koars nat! If Gaad noh fyaa, den how hihn wahn joj di werl?
7 Bot if Ah lai an dat shoa dat weh Gaad seh da chroo ahn mek peepl prayz hihn, den wai Gaad di kaal mee wahn sina?
8 Ahn wai wi noh seh: “Mek wi du bad tingz soh dat gud ku kom owt fahn di bad weh wi du”? Dat da weh som peepl seh wi di preech. Dehndeh peepl dizerv di jojment weh wahn kohn pahn dehn.
9 Soh den, yu tink dat wee Jooz deh eena wahn beta pozishan? Non ataal! Laik weh Ah mi don seh, aala di Jooz an eevn di Greek dehn deh anda sin.
10 Jos laik weh di skripcha dehn seh: “Non a dehn noh raichos, nat eevn wan a dehn.
11 Non a dehn ga andastandin, ahn non a dehn di saach fi Gaad.
12 Evribadi gaahn dehn oan way, ahn dehn noh wert notn. Non a dehn noh shoa kainis, nat eevn wan a dehn.”
13 “Dehn mowt da laik wahn oapm grayv, ahn dehn tong fool op peepl.” “Dehn werdz da laik snayk paizn.”
14 “Ahn weh kom owt fahn dehn mowt da loan kers ahn bitanis.”
15 “Dehn hori fi kil.”*
16 “Dehn aalwayz hert peepl ahn mek dehn sofa.
17 Dehn noh noa notn bowt pees.”
18 “Dehn noh fyaa Gaad ataal.”
19 Now wee noa dat evriting weh di Laa seh da fi peepl weh fala di Laa, soh dat nobadi kyaahn seh notn, ahn di hoal werl wahn haftu ansa tu Gaad fi weh dehn du.
20 Ahn soh jos kaaz sombadi du weh di Laa seh fi du noh meenz dehn ku bee raichos fronta hihn, kaaz di Laa mek wi noa dat wi di sin.
21 Bot now Gaad don shoa wi dat da noh di Laa weh mek wi raichos fronta hihn, ahn di Laa ahn weh di Prafit Dehn seh tel wi di saym ting.
22 Yes, eena Gaad sait wi raichos kaaz wi ga fayt eena Jeezas Krais. An enibadi weh ga fayt da wahn raichos persn tu, kaaz evribadi da di saym eena Gaad sait.
23 Evribadi sin ahn dehn kyaahn mezha op tu Gaad gloari.
24 Bot Gaad shoa wi grayt kainis* ahn gi wi wahn free gif soh dat wi ku bee raichos fronta hihn sayka weh Krais Jeezas pay di prais fi set wi free fahn sin.
25 Gaad mi aafa hihn az wahn sakrifais soh dat peepl ku mek pees wid Gaad bikaaz a dehn fayt eena Krais* blod. Gaad mi du dis fi shoa fi hihn oan raichosnis, bikaaz ih mi-di bayr payshens wen ih mi fergiv peepl sin eena di paas.
26 An eena dis way ih shoa wi ih oan raichosnis eena dis taim weh wi di liv eena, soh dat hihn ku bee raichos eevn wen ih aksep sombadi weh ga fayt eena Jeezas az raichos tu.
27 Unu tink wi ga reezn fi boas? Non ataal. Aftaraal, wich laa gi wi di rait fi boas? Di laa weh kaal fi akshan? No, da di laa weh kaal fi fayt.
28 Soh da fayt mek sombadi raichos eena Gaad sait, ahn noh di tingz weh dehn du fi obay di Laa.
29 Er yu tink hihn da Gaad onli fi di Jooz? Hihn da Gaad fi peepl fahn di nayshanz tu, noh chroo? Yes, hihn da Gaad fi peepl a di nayshanz.
30 Sins Gaad da wan, hihn wahn aksep peepl weh serkomsaiz ahn peepl weh noh serkomsaiz az raichos bikaaz a dehn fayt.
31 Unu tink dat meenz dat if wi ga fayt di Laa noh wert notn? Neva! Rada, wee shoa dat di Laa stil impoatant.
