Roamanz 6:1-23
6 Now, weh wi ku seh? Unu tink wi shuda kantinyu sin soh dat wi ku benifit fahn Gaad grayt kainis* eevn moa?
2 Non ataal! Now dat sin noh ga nohmoh powa oava wee, how wi wahn kantinyu liv eena sin?
3 Er unu noh noa dat aala wi weh mi geh baptaiz intu Krais Jeezas mi geh baptaiz intu ih det?
4 Soh Gaad beri wi wid hihn wen wi mi geh baptaiz intu ih det. Dis mi hapm soh dat jos laik how Krais liv wahn nyoo laif wen ih Faada rezorek ahn fahn di ded wid ih grayt powa, saym way soh wi ku liv wahn nyoo way a laif.
5 If wi yoonaitid wid hihn wen wi ded laik hihn, den saym way soh wi wahn yoonaitid wid hihn wen wi geh rayz op bak tu laif jos laik hihn.
6 Kaaz wi noa dat di kaina persn weh wi yoostu bee mi geh heng pahn di stayk lang wid Krais soh dat wi sinful badi noh ga nohmoh powa oava wi. Wi noh sopoas tu bee slayv tu sin nohmoh,
7 kaaz weneva wahn persn ded, dat set dehn free fahn dehn sin.
8 Pahn tap a dat, if wi ded wid Krais, wee bileev dat wi wahn liv wid ahn tu.
9 Bikaaz wi noa dat Krais, weh geh rayz op bak fahn di ded, noh wahn eva ded agen, ahn dat det noh ga nohmoh powa oava hihn.
10 Hihn mi ded onli wan taim fi geh rid a fi wee sin dehn, ahn hihn noh wahn ded agen. Bot di kaina laif weh hihn liv, hihn liv fi du Gaad wil.
11 Eena da saym way, memba dat unu ded wen ih kohn tu sin, bot unu alaiv wen ih kohn tu Gaad, bikaaz unu ga wahn rilayshanship wid Krais Jeezas.
12 Bot, noh mek sin kantinyu fi rool az king oava unu badi weh wahn ded soh dat unu noh obay weh unu badi waahn unu du.
13 Noh giv unu badi* oava tu sin fi du weh bad. Insteda dat, giv unuself tu Gaad, laik peepl weh mi ded bot alaiv now. Giv unu badi* tu Gaad fi du weh gud.
14 Di Laa noh di rool oava unu nohmoh, bot Gaad shoa unu grayt kainis, soh unu mosn mek sin rool oava unu laik unu maasta.
15 Soh weh dis meen? Wi wahn sin bikaaz wi deh anda Gaad grayt kainis ahn noh deh anda di Laa nohmoh? Af koars nat!
16 Unu noh noa dat if unu put unuself anda sombadi els fi obay dehn, unu da dehn slayv? Unu ku bee wahn slayv tu sin ahn dat wahn leed tu det. Er, unu ku bee slayv tu Gaad an obay hihn, ahn den unu wahn bee raichos.
17 Bot tanks tu Gaad, eevn doa unu yoostu bee slayv tu sin, now unu obeedyant fahn unu haat tu di teechin weh Gaad giv unu.
18 Yes, sins unu mi geh set free fahn sin, now unu da slayv tu Gaad, an unu du weh rait.
19 Bikaaz unu flesh week, Ah di taak tu unu wid werdz weh eezi fi peepl andastan. Kaaz unu yoostu mek unu badi bee slayv tu tingz weh doti ahn wikid soh dat unu du loan wikidnis. Bot now unu mos mek unu badi bee slayv tu raichosnis soh dat unu du tingz weh hoali.
20 Kaaz wen unu da-mi slayv tu sin, raichosnis da neva unu maasta.
21 Soh den, wat da-mi di rizolt a weh unu yoostu du? Da tingz weh unu feel shaym fa now, kaaz dehndeh tingz leed tu det.
22 Bot now dat unu free fahn sin, ahn dat unu da slayv tu Gaad, unu di liv wahn hoali laif, ahn dat leed tu evalastin laif.
23 Bikaaz di pay weh sin gi wi da det, bot di gif weh Gaad gi wi da evalastin laif bikaaz a weh wi Laad Jeezas Krais mi du.
