Root 1:1-22
1 Eena di dayz wen di joj dehn mi rispansabl fi leed di peepl ahn mek shoar dat dehn geh jostis, food mi stap groa da Izrel. Soh wahn man fahn di tong a Betlihem, weh deh da Jooda, gaahn liv da Moawab lang wid ih waif an ih too son.
2 Hihn mi naym Elimelek,* ih waif mi naym Nayomi,* ahn dehn too son mi naym Maalon* ahn Kiliyon.* Aala dehn da-mi fahn Efrata, weh dehn aalso kaal di tong a Betlihem, weh deh da Jooda, ahn dehn gaahn liv da Moawab.
3 Afta sohn taim paas, Nayomi hozban, Elimelek, mi ded; ahn soh da mi jos shee ahn fi shee too son mi lef.
4 Laytaraan, fi shee too son mi geh marid tu sohn laydi fahn Moawab. Wan a dehn mi naym Orpa, ahn di ada wan mi naym Root; ahn dehn mi liv deh fi bowt ten yaaz.
5 Afta sohn taim mi paas, Nayomi too son, Maalon ahn Kiliyon, mi ded tu; soh shee neva gat ih hozban ner ih too son nohmoh.
6 Wail Nayomi mi stil deh da Moawab, shee mi hyaa dat Jehoava mi staat tu bles fi hihn peepl agen, ahn hihn mi mek wahn lata food groa eena da lan. Soh shee an ih too daata-in-laa mi lef fahn Moawab.
7 Dehn mi lef di plays weh dehn mi liv. Ahn wail dehn mi-di waak pan di road fi goh da Jooda,
8 Nayomi tel ih too daata-in-laa: “Ih beta unu goh bak da unu ma hows. Ah hoap dat Jehoava aalwayz shoa unu lov,* jos laik how unu shoa lov tu mee ahn tu unu hozban wail dehn mi alaiv.
9 An Ah hoap dat Jehoava giv eech wan a unu wahn gud hozban weh wahn tek kayr a unu.” Den shee kis dehn, ahn dehn staat tu baal wahn lat.
10 Bot dehn mi stay di tel ahn: “No, wi gwehn goh liv wid yoo ahn yu peepl.”
11 Bot Nayomi tel dehn: “Mi daataz, unu pleez goh bak. Wai unu waahn kohn wid mee? Ai kyaahn ga nohmoh pikni weh ku bee unu hozban.
12 Mi daataz, unu pleez goh bak hoam. Unu goh, bikaaz Ai don tu oal fi geh marid. Eevn if Ah wuda fain wahn hozban tudeh ahn ga pikni,
13 unu wuda wayt til dehn groa op fi geh marid tu dehn? Unu wuda hoal bak fahn geh marid tu sohnbadi els joorin da hoal taim? No, Ah kyaahn mek unu du dat. Ah feel laik Jehoava di ponish mi. Ahn sayka dat unu deh eena dis sichuwayshan, an Ah feel reeli bad fi unu.”
14 Ahn dehn staat tu baal aal oava agen. Afta dat, Orpa kis ih mada-in-laa an ih gaahn hoam, bot Root stay wid ahn.
15 Soh Nayomi tel Root: “Yu si? Yu sista-in-laa di goh bak tu ih peepl ahn tu ih gaad dehn. Wai yoo noh goh wid ahn tu?”
16 Bot Root tel ahn: “Pleez stap tel mi fi goh bak hoam ahn lef yu bai yuself. Eniway wehpaat yoo goh, Ai gwehn tu. Wehpaat yoo stay, da deh Ai wahn stay tu. Fi yoo peepl wahn bee mai peepl, ahn fi yoo Gaad wahn bee mai Gaad.
17 Ah wahn stay wid yu til yu ded, ahn wen Ai ded Ah waahn dehn beri mi kloas tu wehpaat dehn beri yoo. Mek det bee di onli ting weh separayt mee ahn yoo. Soh if Ah lef yu fi eni ada reezn, den mek Jehoava ponish mi.”
18 Wen Nayomi noatis dat notn kuda mi chaynj Root main, shee mi stap chrai kanvins ahn fi goh bak hoam.
19 Soh di too a dehn kantinyu fi waak til dehn reech Betlihem. An evribadi eena di siti mi-di wanda da hoo dehn, ahn di laydi dehn staat tu aks: “Dat da Nayomi?”
20 Shee wuda tel di laydi dehn: “Noh kaal mi Nayomi.* Kaal mi Mayra,* bikaaz di Almaiti mek Ah sofa wahn lat.
21 Wen Ah mi lef fahn ya, Ah mi ga evriting. Bot Jehoava mek Ah kohn bak wid notn, nat eevn wid mi famili. Soh noh kaal mi Nayomi kaaz da Jehoava di Almaiti deh gens mi, ahn da hihn mek mi laif haad.”
22 Dis da di stoari bowt how Nayomi lef Moawab ahn gaahn bak hoam wid ih daata-in-laa Root, hoo da-mi fahn Moawab. Dehn reech da Betlihem rong di taim wen di peepl mi-di staat haavis baarli.*
Futnoat
^ Dis naym meenz “Mai Gaad Da King.”
^ Dis naym meenz ‘Sombadi Weh Ga Nais Wayz.’
^ Ih pasabl dat dis naym kohn fahn wahn Heebroo werd weh meen “fi geh week er geh sik.”
^ Dis naym meenz “Di Wan Weh Fayl; Di Wan Weh Kohn tu Wahn En.”
^ Er “laayal lov.” Si di Glasari, “Laayal lov.”
^ Dis naym meenz ‘Sombadi Weh Ga Nais Wayz.’
^ Dis naym meenz “Bita.”
^ Dis da wahn kaina grayn weh da laik weet.
